ვოლგოგრადის ოლქში დაიწყო მუშაობა საზოგადოებრივმა საბჭომ, რომელიც შეისწავლის მოსახლეობის აზრს – რეგიონულ ცენტრის გადაერქვას სახელი და დაუბრუნდეს ძველი სახელწოდება, სტალინგრადი.
5 დეკემბერს, საბჭოს პირველ სხდომაზე, გუბერნატორმა ანდრეი ბოჩაროვმა ქალაქის ძველ სახელწოდებას უწოდა ხალხის „სიმამაცისა და გმირობის სიმბოლო“, მაგრამ ხაზგასმით აღნიშნა, რომ გადარქმევის გადაწყვეტილება მიღებული უნდა იქნას „მხოლოდ მოსახლეობის პოზიციის საფუძველზე“. ექსპერტი მიიჩნევს, რომ რეალური გამოკითხვის შემთხვევაში, მოსახლეობა ამის წინააღმდეგი იქნება.
საზოგადოებრივი საბჭოს პირველი სხდომის გახსნისას გუბერნატორმა ანდრეი ბოჩაროვმა განაცხადა, რომ დისკუსია დაიწყო ვეტერანთა რეგიონული საბჭოს პლენუმის გადაწყვეტილების შესაბამისად. 19 ნოემბერს, სტალინგრადის მახლობლად საბჭოთა ჯარების კონტრშეტევის დაწყებიდან 80 წლისთავის დღეს, ომის ვეტერანებმა სურვილი გამოთქვეს „ქალაქ ვოლგოგრადს დაუბრუნდეს ლეგენდარული, უძლეველი სტალინგრადის სახელწოდება – ჩვენი სამშობლოს მრავალეროვნული ხალხის სიმამაცისა და გმირობის სიმბოლო დიდ სამამულო ომსა და მთელ მეორე მსოფლიო ომში“.
სამხარეო ადმინისტრაციის პრესსამსახურის ცნობით, საზოგადოებრივ საბჭოში შედიოდნენ პარტიების, საზოგადოებრივი გაერთიანებების, პროფკავშირების, საწარმოებისა და ორგანიზაციების, საგანმანათლებლო დაწესებულებების წარმომადგენლები და ექსპერტები.
