“რუსთავი 2”-ის ყოფილი მფლობელი, ამჟამად უცხოეთში მყოფი ბიზნესმენი ქიბარ ხალვაში, უკვე რამდენიმე თვეა, საკუთრების დასაბრუნებლად იბრძვის. მან საწადელს თითქმის მიაღწია და 1 ოქტომბერს უკვე თბილისის საქალაქო სასამართლომ შპს ტელეკომპანია “საქართველოს” წილებიც დააყადაღა, რომელიც, თავის მხრივ, ტელეკომპანია “რუსთავი 2”-ში 51%-იან წილს ფლობდა, თუმცა მანამდეც უკვე დაყადაღებული იყო “რუსთავი 2”-ის წილებიც და ქონებაც.
ამ ამბავს დიდი აჟიოტაჟი მოჰყვა. “რუსთავი 2”-ის თანამშრომლები ქუჩაში გამოვიდნენ, ტრაფარეტები დაიკავეს ხელში და მათხოვრობასაც შეუდგნენ.
“სულ ტყუილად ჰგონიათ, რომ მოსამართლესა და სასამართლოზე ზეწოლა არ იქნება. არავინ მოგცემთ შესაძლებლობას, რომ საქართველოში დამარხოთ დემოკრატია თქვენი უთავმოყვარეო გადაწყვეტილებით. იქნება ყველანაირი ზეწოლა კანონის ფარგლებში. რომელიღაც მოსამართლის, გაყიდული მოსამართლის პატივი და ღირსება აბსოლუტურად მეორეხარისხოვანია ჩემთვის და მიმაჩნია, რომ მას არავითარი პატივი და ღირსება არ აქვს. ყველა გზას გამოვიყენებთ იმისთვის, რომ ეს მოსამართლე ჩამოვაშოროთ საქმის განხილვას”, _ განაცხადა არხის ხელმძღვანელმა ნიკა გვარამიამ.
არადა, 2007 წელს ტელეიმედის დარბევას ბატონი გვარამია, რომელიც დღეს მოსამართლეებს ემუქრება და “თავისუფალი აზრის” ჩახშობას აპროტესტებს, ასე აფასებდა _ “არკადი პატარკაციშვილი მართავს “იმედის” ტელევიზიას და ამ პროცესებს, ბუნებრივია, ამ მიზეზით ტელევიზიას ყადაღა დაედო. გამოძიება მუშაობს სხვადასხვა ვერსიაზე და დასტურდება, რომ “იმედი” არ იყო მიუკერძოებელი გამშუქებელი იმ მოვლენებისა, რომლებიც ქვეყანაში მიმდინარეობდა”.
“რუსთავი 2”-ის გარშემო განვითარებულ მოვლენებზე “იმედის” ყოფილ ჟურნალისტს _ გიორგი ახვლედიანს ვესაუბრეთ.
_ ბატონო გიორგი, “რუსთავი 2”-ის ქონება დააყადაღეს. არხის ხელმძღვანელი ნიკოლოზ გვარამია და “ნაციონალები” აღშფოთებას ვერ მალავენ. თქვენ “იმედის” დარბევის მომსწრე ხართ. იქნებ გაავლოთ პარალელები “იმედის” დარბევასა და “რუსთავი 2”-ის ქონების დაყადაღებას შორის? იქნებ გაიხსენოთ, ვინ რას ამბობდა მაშინ?
_ ვითარება ძალიან ცუდია. პასუხისმგებლობა გადანაწილებულია როგორც დღევანდელ, ისე ყოფილ ხელისუფლებაზე. დღევანდელი ხელისუფლება თავისი ქმედებებით სულ უფრო ემსგავსება “ნაციონალურ მოძრაობას”, ხოლო “ნაცები” რისი გამკეთებლები და ჩამდენები იყვნენ ძალაუფლების შესანარჩუნებლად, კარგად დავინახეთ და ვიცით. რაც დღეს ხდება, თავისუფალ მედიაზე ზეწოლაა, მაგრამ ამ ყველაფერს აქვს მეორე მხარეც.
ნიკა გვარამიას პრესკონფერენციას რომ ვუყურებდი, დეჟავიუ მქონდა, ოღონ არა “ნოემბრიდან ნოემბრამდე”, არამედ “ოქტომბრიდან ოქტომბრამდე”. ნიკა გვარამია არის თავისუფალი მედიის წინააღმდეგ ხმალამოღებული მებრძოლი, რომელიც თავის დროზე ლეგენდებს თხზავდა, საშინელ ჭორებს იგონებდა არა მხოლოდ იმჟამინდელი ოპოზიციის, არამედ “იმედის” ჟურნალისტების წინააღმდეგაც. გვარამია იმხანად პროკურორის მოადგილე იყო და, შესაბამისად, “იმედის” წინააღმდეგ იდეოლოგიური ბრძოლაც მას ევალებოდა. სწორედ ამიტომ ვამბობ, დეჟავიუ მქონდა, მას რომ ვუსმენდი–მეთქი. 2007-ში ნიკა გვარამია იყო ავტორი ფილმისა “ნოემბრიდან ნოემბრამდე”. მან იმჟამინდელი ოპოზიციური პოლიტიკური სპექტრი და ჟურნალისტები არაადამიანურ ქმედებებში დაადანაშაულა, ახლა კი თავისუფალი მედიის აპოლოგეტად გამოვიდა და ისევ პოლიტიკოსებს ადანაშაულებს.
დროა, დასრულდეს იმაზე საუბარი, ვინ იყვნენ “ნაციონალები”. სამი წელი საკმარისი დრო იყო, ყველაფერი გამოსწორებულიყო. ეს დრო საკმარისია, რომ ხელისუფლებამ თავისი თავი წარმოაჩინოს და დაგვანახვოს, წინამორბედზე უკეთესი რომ არის. ეს ამ ხელისუფლებამ ვერ მოახერხა და ამის კლასიკური მაგალითი ფეხბურთის ფედერაციის პრეზიდენტის არჩევნები იყო.
_ ხელისუფლების წარმომადგენელი რომ გისმენდეთ, აუცილებლად გეტყოდათ, რომ “რუსთავის 2”-თან დავა ყოფილ მეპატრონეს აქვს და ხელისუფლება არაფერში ერევა…
_ ამით მანიპულირებს ხელისუფლება, მაგრამ ამას როგორი სამართლებრივი დავა ჰქვია, ნათელია, ქვეტექსტი ყველამ იცის. ხელისუფლებას პრობლემები აქვს და ძალაუფლების შენარჩუნებაზე ფიქრობს. ასე იქცეოდნენ “ნაცებიც”.
თუმცა სხვაობა “იმედის” დარბევასა და “რუსთავი 2”-ის დაყადაღებას შორის ძალიან დიდია, მოტივაცია კი _ ერთი.
“იმედთან” არც სამართლებრივად და არც იურიდიულად სადავო არაფერი იყო. ტელევიზია ბადრი პატარკაციშვილის დაარსებული და მისი საკუთრება იყო. ამ ადამიანს ვერავინ შეედავებოდა. მოძალადე რეჟიმმა, რომელსაც “ნაციონალური მოძრაობა” ერქვა, ნიკა გვარამიას ხელმძღვანელობით, ვერ მოახერხა “იმედის” განადგურება, დანგრევა, ჟურნალისტების გადაბირება… ჩვენ, ყველანი, მედგრად ვიდექით, ამიტომ გვარამიას ერთი გზა დარჩა _ სპეცნაზით შემოვარდნა და ჟურნალისტების დაჩოქება.
ამჟამინდელ ხელისუფლებას ლავირების მეტი საშუალება აქვს “რუსთავი 2”-ის მიმართ, უფრო მშვიდობიანად შეუძლია პრობლემის მოგვარება, მოდავეები ჰყავს. ეს ტელევიზია მას შემდეგ, რაც ეროსი კიწმარიშვილს წაართვეს, გამოსახსნელია. ქიბარ ხალვაშმაც “რუსთავი 2” ძალადობრივი მეთოდით ჩაიგდო ხელში. მაშინ ხმა არავის ამოუღია. მერე ხალვაშსაც წაართვეს და საბოლოოდ “ნაციონალების” პროკურორი დანიშნეს ხელმძღვანელად, ამიტომ დღევანდელ ხელისუფლებას სპეცდანიშნულების რაზმის შეყვანა არ სჭირდება, მაგრამ ასეთი მეთოდებით მედიასთან ბრძოლა არ შეიძლება. ხალხი ბრმა არ არის, ყველამ იცის, ვის რა მოტივაცია აქვს.
_ ბატონო გიორგი, როდესაც “იმედი” დაარბიეს, სოლიდარულები თუ იყვნენ სხვა არხის ჟურნალისტები? მახსენდება, მხოლოდ ერთი საინფორმაციო გადაცემა, რომელიც “რუსთავი 2”-მა გააკეთა…
_ სოლიდარობის მოლოდინი უფრო დიდი იყო. ვერავის დავადანაშაულებ… შემიძლია, კონკრეტულად გითხრათ, ეს იყო “კავკასია”. საგანგებო საათის შემდეგაც ყველა გადაცემა “იმედს” ეძღვნებოდა. იმხანად “იმედსა” და “კავკასიას” “ნაცები” ვერ აკონტროლებდნენ, ამიტომ სხვა არხების ჟურნალისტების მხრიდან სოლიდარობის გამოხატვა ადვილი არ იყო.
_ სიახლე თუ არის “იმედის” საქმეში? ვისაც ბრალი ედებოდა, ყველა გამართლდა. თქვენ ჩვენებას სტრასბურგის სასამართლოს აძლევდით…
_ სტრასბურგში ერთ-ერთი ეპიზოდი ასეთი სახელწოდებით იყო _ “გიორგი ახვლედიანი საქართველოს წინააღმდეგ”. ახალი ხელისუფლება რომ მოვიდა, იუსტიციის მინისტრმა თეა წულუკიანმა განაცხადა: “არ არის საჭირო სტრასბურგში ამ საქმის განხილვა, ქვეყანაში არის ხელისუფლება, რომელიც მზადაა, ყველა საკითხი გამოიძიოს”. მოგეხსენებათ, სტრასბურგში საქმეები იმიტომ მიდიოდა, რომ “ნაცები” არ იძიებდნენ.
“იმედის” საქმე საქართველოში “წამოვიდა”. სიმართლე გითხრათ, მას შედეგ არაფერი მსმენია არც ძიების პროცესის შესახებ, არც დაკითხვის, არც ჩემთან მოსულა ვინმე. არადა, 2007 წლის 7 ნოემბრის დარბევისა და კიდევ ბევრი ასეთი საქმის გამოძიების მანიპულირებით ამჟამინდელი ხელისუფლება ქვეყნის სათავეში მოვიდა, ბევრი ქულა ჩაიწერა, მაგრამ “იმედის” ამბის გამოძიება აღარავის სურს.
ცნობისთვის:
2003 წლის ბოლოს ნიკა გვარამია არჩეულ იქნა პარლამენტის წევრად და საქართველოს პარლამენტში მოღვაწეობდა 2004-2007 წლებში, როგორც პოლიტიკური პარტია “ერთიანი ნაციონალური მოძრაობის” წევრი. 2007 წელს იგი დაინიშნა საქართველოს გენერალური პროკურორის მოადგილედ. 2008 წლის 24 იანვარს გვარამია წარდგენილი იყო საქართველოს იუსტიციის მინისტრის თანამდებობაზე, ამავე წლის 31 იანვარს კი დაინიშნა საქართველოს იუსტიციის მინისტრად; 2008 წლის 27 ოქტომბერს კი _საქართველოს განათლებისა და მეცნიერების მინისტრად, მაგრამ 2009 წლის 27 ოქტომბერს თავისი ნებით დატოვა თანამდებობა და იგი დიმიტრი შაშკინმა ჩაანაცვლა. 2012 წლის 14 ნოემბერს სამაუწყებლო კომპანია “რუსთავი 2”-ის დამფუძნებელთა გადაწყვეტილებით, ნიკა გვარამია არხის გენერალურ დირექტორად დაინიშნა. ამავე წლის 19 დეკემბერს ნიკა გვარამია დააკავეს, მას ბრალი კორუფციაში ედებოდა, თუმცა დანაშაული ვერ დაუმტკიცეს და მალევე გაათავისუფლეს.
მოამზადა ეკა ნასყიდაშვილმა
ნაძირალა გვარამია, \\\”ნაციონალ ბანდიტების\\\” უველა დანაშაულის თანამზრახველი და მონაწილეა. არავითარი მორალური თუ ადამიანური პრინციპები არ გააჩნია და მანიაკალური ნაცპარტიის მარჯვენა ხელია. ამ სოხუმელ ნაძირალას ხელებზე ქართველების სისხლი და დაღუპულ-განადგურებული ოჯახებია. მას და მის შვილებს გაუჭირდებათ თბილისში სიარული. ის ცოდვებს აუცილებლად გადაყვება.