უნგრეთის პარლამენტს ჯერ არ გადაუწყვეტია დაეთანხმოს თუ არა ფინეთისა და შვედეთის განაცხადებს ჩრდილოატლანტიკურ ალიანსში გაწევრიანების თაობაზე. ამის შესახებ 4 მარტს უნგრეთის ტელევიზიის ეთერში ეროვნული ასამბლეის თავმჯდომარემ ლასლო კიოვერმა განაცხადა.
მისი თქმით, 7-8 მარტს დაგეგმილია ბუდაპეშტიდან დელეგაციის ვიზიტი ჰელსინკსა და სტოკჰოლმში, რათა გაქარწყლდეს სახელისუფლო ფრაქციების წევრების „შეშფოთება და ეჭვები“.
„ასეთი ვიზიტი აუცილებელია, რადგან სამთავრობო ფრაქციების წევრებს აქვთ შეშფოთება და ეჭვები და მათ არ სჯერათ, რომ ეს საკითხი ავტომატურად გადაწყდება“, – აღნიშნა კიოვერმა.
როგორც პარლამენტის თავმჯდომარემ განმარტა, დეპუტატები აღშფოთებულნი არიან ფინეთისა და შვედეთის პოლიტიკოსების ქცევით, რომლებიც ბოლო წლების განმავლობაში ევროკავშირის ტრიბუნიდან უნგრეთს ადანაშაულებდნენ დემოკრატიული ნორმებისა და კანონის უზენაესობის დარღვევაში.
მანამდე, 2 მარტს, უნგრეთის საკანონმდებლო ორგანოს მონაცემები გამოქვეყნდა, რომლის მიხედვითაც უნგრეთის ეროვნულ ასამბლეაში ფინეთისა და შვედეთის ნატოში გაწევრიანების შესახებ კენჭისყრა გადაიდო. ახლა კენჭისყრა გაიმართება პარლამენტის მორიგ სესიაზე, რომელიც 20 მარტს დაიწყება.
იმავდროულად, ნატო-ს გენერალურმა მდივანმა იენს სტოლტენბერგმა 28 თებერვალს განაცხადა, რომ ფინეთისა და შვედეთის სწრაფი გაწევრიანება ნატო-ში რჩება პრიორიტეტად. მისი თქმით, გაწევრიანების ორივე კანდიდატმა შეასრულა ის მოთხოვნები, რაც თურქეთმა გასული წლის ივლისში მადრიდში გაფორმებულ სამმხრივ შეთანხმებაში ასახა.
ფინეთმა და შვედეთმა ალიანსში გაწევრიანების შესახებ განაცხადი 2022 წლის 18 მაისს გააკეთეს. თურქეთი ეწინააღმდეგებოდა მათ გაწევრიანებას. ანკარამ წევრობაზე ვეტოს მოსახსნელად 10 პირობა წამოაყენა, რომელთა შორის არის თურქეთის მიერ აღიარებული ტერორისტული ორგანიზაციების, მათ შორის ქურთისტანის მუშათა პარტიის (PKK) წინააღმდეგ ბრძოლაში მხარდაჭერის შეთავაზება.
