რუსეთის თავდაცვის მინისტრი სერგეი შოიგუ ტელეფონით ესაუბრა ბრიტანეთის თავდაცვის მინისტრს ბენ უოლესს, – განაცხადეს რუსეთის სამინისტროს პრესსამსახურში. ეს არის შოიგუს მესამე მოლაპარაკებები უცხოელ კოლეგებთან ერთი დღის მანძილზე.
საუბრისას შოიგუმ უოლესს მიაწოდა ინფორმაცია უკრაინის მიერ შესაძლო პროვოკაციების შესახებ „ბინძური ბომბის“ გამოყენებით, – ნათქვამია სამინისტროს განცხადებაში.
მანამდე, 23 ოქტომბერს, შოიგუმ სატელეფონო საუბარი გამართა თურქეთის თავდაცვის მინისტრთან აქარ ჰულუსისთან და საფრანგეთის თავდაცვის მინისტრთან სებასტიან ლეკორნუსთან. საუბრისას რუსი მინისტრი კოლეგებს “ბინძური ბომბის” შესახებაც ესაუბრა.
მოგვიანებით, თავდაცვის სამინისტრომ განაცხადა, რომ შოიგუს სატელეფონო საუბარი ჰქონდა პენტაგონის ხელმძღვანელთან, ლოიდ ოსტინთან. მათ უკრაინაში არსებული ვითარება განიხილეს. თავდაცვის სამინისტროს განცხადებაში ოსტინთან მოლაპარაკებების შესახებ არ არის ნახსენები შეშფოთება “ბინძური ბომბის” შესახებ.
უკრაინის შეიარაღებული ძალების მიერ უკრაინის ტერიტორიაზე „ბინძური ბომბის“ გამოყენებით პროვოკაციის მომზადების შესახებ ადრე იტყობინებოდა სახელმწიფო სააგენტო „რია ნოვოსტი“ „სხვადასხვა ქვეყნის სანდო წყაროებზე დაყრდნობით“. სააგენტოს ცნობით, პროვოკაციის მიზანია მოსკოვის დადანაშაულება მასობრივი განადგურების იარაღის გამოყენებაში.
უკრაინის პრეზიდენტის აპარატის უფროსის მრჩეველმა მიხაილ პოდოლიაკმა Liga.net-ს განუცხადა, რომ ცნობები „ბინძური ბომბით“ პროვოკაციის მომზადების შესახებ არის „აბსოლუტური და სრულიად პროგნოზირებადი აბსურდი“.
„ბინძური ბომბის“ აფეთქება არის თავდასხმის ფორმა რადიოაქტიური მასალის გამოყენებით, როგორიცაა არასამხედრო დანადგარის აფეთქება. ამ კონტექსტში „ბინძური ბომბი“ უკვე იყო ნახსენები უკრაინის კონფლიქტის დროს.
მაგალითად, ვლადიმერ როგოვმა, ზაპოროჟიეს რეგიონის ადმინისტრაციის საბჭოს წევრმა, განახადა, რომ ჭურვი, რომელიც მოხვდება გახარჯული საწვავის საცავს ზაპოროჟიეს ატომურ ელექტროსადგურზე, შეიძლება შევადაროთ “ბინძური ბომბის” აფეთქებას.
