26 სექტემბრის ღამეს სეისმოლოგიურმა ინსტრუმენტებმა დააფიქსირეს ორი წყალქვეშა აფეთქება Nord Stream-ის გაზსადენის მიდამოში.
სეისმოლოგებმა დანიასა და შვედეთში ორშაბათს დააფიქსირეს ძლიერი აფეთქებები იმ ადგილებში, სადაც Nord Stream-ის გაზსადენიდან მოხდა გაჟონვა. ამის შესახებ უფსალას უნივერსიტეტთან არსებულ შვედეთის ეროვნული სეისმოლოგიური ცენტრის თანამშრომელმა, სეისმოლოგმა ბიორნ ლუნდმა ტელეარხ SVT-ზე განაცხადა, – იუწყება Reuters.
”ეჭვგარეშეა, რომ ეს იყო აფეთქებები”, – თქვა მან.
იმას, რომ დანიის კუნძულ ბორნჰოლმზე სეისმოგრაფმა ორჯერ დააფიქსირა აფეთქება, ასევე იტყობინება პოტსდამის ჰელმჰოლცის ცენტრი (გეოლოგიური კვლევის ცენტრი GFZ).
აფეთქებები დაფიქსირდა გრინვიჩის დროით შუაღამისას (03:00 მოსკოვის დროით), შემდეგ კი 17:00 საათზე.
გაზის გაჟონვა Nord Stream 1 მილსადენის ორივე ხაზიდან, ასევე Nord Stream 2 მილსადენის ერთი ხაზიდან აღმოაჩინეს 26 სექტემბერს ღამით, როდესაც მილსადენებში წნევა მკვეთრად დაეცა. სამივე გაჟონვა მოხდა დანიის ექსკლუზიურ ეკონომიკურ ზონაში, კუნძულ ბორნჰოლმის ჩრდილო-აღმოსავლეთით. დანიის ენერგეტიკის სააგენტოს ხელმძღვანელმა კრისტოფერ ბეტზაუმ დასაშვებად სცნო გაზსადენის განზრახ დაზიანება.
კრემლმა, გაჟონვის შესახებ კომენტირებისას, არ გამორიცხა, რომ დაზიანება შესაძლოა დივერსიის შედეგი იყოს. გამოძიებას გერმანიის უსაფრთხოების სამსახური აწარმოებს. მათთან დაკავშირებულმა წყაროებმა Der Tagesspiegel-ს განუცხადეს, რომ განიხილება “სავარაუდო თავდასხმების ავტორობის” ორი ძირითადი ვარიანტი – ეს შეიძლება იყოს უკრაინული ძალების ოპერაცია, ან რუსული ოპერაცია, რომელიც განხორციელდა “ცრუ დროშის ქვეშ”. მოსკოვმა არაერთხელ უარყო ბრალდებები გაზის პოლიტიკურ იარაღად გამოყენების შესახებ.
აგვისტოს ბოლოდან Nord Stream-1-ის ამოტუმბვა მთლიანად შეჩერებულია, რათა შეკეთდეს ერთადერთი მუშა მდგომარეობაში დარჩენილი გაზსატუმბი აგრეგატი „პორტოვაიას“ საკომპრესორო სადგურზე. განრიგის მიხედვით, გაზსადენს გაზის მიწოდება 3 სექტემბერს უნდა განეახლებინა, მაგრამ წინა დღით გაზპრომმა განაცხადა, რომ დაფიქსირდა ზეთის გაჟონვა ბოლო გაზის ტურბინის ძრავის მოწყობილობაზე, ამიტომ მილსადენის მუშაობა შეჩერდა განუსაზღვრელი ვადით. ამავდროულად, Siemens-მა, ისევე როგორც გერმანიის ქსელის ფედერალურმა სააგენტომ, აღნიშნეს, რომ გაჟონვა, ჩვეულებრივ, გავლენას არ ახდენს ტურბინის მუშაობაზე, ეს გაუმართაობა შეიძლება აღმოიფხვრას გაზსადენის მუშაობის შეჩერების გარეშე.
Nord Stream 2 გაზსადენის მშენებლობა გასული წლის შემოდგომაზე დასრულდა, მაგრამ ექსპლუატაციაში არ შევიდა. გერმანიამ შეაჩერა მისი სერტიფიცირება მოსკოვის მიერ დონეცკის სახალხო რესპუბლიკის და ლუგანსკის სახალხო რესპუბლიკის დამოუკიდებლობის აღიარების და უკრაინაში საომარი მოქმედებების დაწყების გამო. გადაწყდა გაზსადენის სიმძლავრეების გამოყენება რუსეთის ჩრდილო-დასავლეთის რეგიონებისთვის გაზის მისაწოდებლად.
