ჯანდაცვის მინისტრის მოადგილემ ვალერი კვარაცხელიამ განაცხადა, რომ ელიმინაციის პროგრამაში ჩართული 32 პაციენტიდან 23-ს, ერთი თვის მკურნალობის შემდეგ, C ჰეპატიტის ვირუსი აღარ აღენიშნება.
“შედეგები არის იმაზე უფრო კარგი, ვიდრე ჩვენ გვქონდა მოლოდინი. პაციენტების ნაწილი განიკურნა, თუმცა ვირუსის გაქრობა არ ნიშნავს, რომ მათ მკურნალობა მიატოვონ. ხელშეკრულებებში აღნიშნულია, რომ მკურნალობის კურსი ბოლომდე უნდა გაიარონ”, _ აღნიშნა მინისტრის მოადგილემ. ვალერი კვარაცხელიას თქმით, სისხლში ვირუსის გაქრობის შემდეგ პაციენტებმა მკურნალობა დაზიანებული ღვიძლის ფუნქციის აღსადგენად უნდა გააგრძელონ.
ამჟამად C ჰეპატიტის ელიმინაციის პროგრამის ფარგლებში მკურნალობს 1700 პაციენტი, სულ კი რეგისტრაცია გაიარა 7000-მდე პაციენტმა, რომლებიც ეტაპობრივად ჩაერთვებიან აღნიშნულ პროგრამაში.