ამერიკელმა სკოლის მოსწავლემ ნიკოლას სენდმენმა გაზეთ “ვაშინგტონ პოსტის” წინააღმდეგ სარჩელი შეიტანა და ცილისწამებისთვის 250 მილიონ დოლარს ითხოვს. საუბარია “ვაშინგტონ პოსტის” სტატიაზე, რომელშიც ნათქვამია, რომ ნიკოლას სენდმენმა საპროტესტო აქციაზე ერთ–ერთ დემონსტრანტთან დაპირისპირება გამოიწვია.
ინციდენტი მოხდა 18 იანვარს აბორტების საწინააღმდეგოდ გამართულ მიტინგზე, რომელშიც სენდმენი და მისი თანაკლასელები მონაწილეობდნენ. გაზეთ “ვაშინგტონ პოსტში” გამოქვეყნებულ ფოტოზე ჩანს, როგორ დგას ნიკოლას სენდმენი ქუდით, რომელზეც აწერია “ამერიკა კვლავ დიადი გავხადოთ” ამერიკელი ინდიელის _ ნეიტან ფილიპსის პირისპირ. ფოტოს ქვეშ აღნიშნულ ინფორმაციიდან ირკვევა, რომ სენდმენი აგრესიულად მოექცა ფილიპს და რასისტული საქციელი გამოამჟღავნა.
ფილიპსის განცხადებით, სენდმენი თავის მეგობრებთან ერთად ყვიროდა: “ავაშენოთ კედელი”, ამაში მექსიკასთან საზღვარზე კედლის მშენებლობა იგულისხმებოდა. თვითონ სკოლის მოსწავლე უარყოფს ამ ბრალდებებს და ამბობს, რომ მსგავსი რამ არც ერთ ჩანაწერში არ ისმის.
სასარჩელო განცხადებაში ნათქვამია, რომ “ვაშინგტონ პოსტმა” ცილი დასწამა სკოლის მოსწავლეს, რითაც დონალდ ტრამპის წინააღმდეგ მიმართული სარედაქციო პოლიტიკა წინა პლანზე გამოიტანა. ადვოკატების თქმით, გაზეთში გამოქვეყნებული ფოტომასალის გამო ნიკოლას სენდმენი დევნის ობიექტი გახდა.
“რათა ნიკოლასს სრულად აუნაზღაურდეს ზიანი და დავსაჯოთ გაზეთი “ვაშინგტონ პოსტი”, აღნიშნული საქმე მოითხოვს 250 მილიონი აშშ დოლარის ოდენობით ზიანის ანაზღაურებას”, _ ნათქვამია სასარჩელო განცხადებაში.
