აშშ–ის მეთაურობით მებრძოლი კოალიციის მასირებული საჰაერო რეიდების შედეგად 26 ივლისს ქალაქ რაკაში დაიღუპა 29 მშვიდობიანი მცხოვრები, მათ შორის 8 ბავშვი, _ იუწყება სააგენტო “ფრანს–პრესი” ლონდონში ბაზირებული არასამთავრობო ორგანიზაციის “ადამიანის უფლებათა სირიის ობსერვატორიის” მონაცემებზე დაყრდნობით.
არაბებისა და ქურთების ალიანსის მიერ “ისლამური სახელმწიფოს” “დედაქალაქ” რაკაზე განხორციელებული შეტევის შედეგად ქალაქის უმეტესი რაიონიდან ტერორისტები განდევნეს, _ ხაზს უსვამს “ფრანს-პრესი”.
2016 წლის ნოემბრიდან “სირიის დემოკრატიულმა ძალებმა” აშშ-ის მხარდაჭერით ალყაში მოაქციეს “სახალიფოს დედაქალაქი”, ივლისის დასაწყისში კი შეტევაზე გადავიდნენ. ამერიკული სარდლობის მონაცემებით, ოპოზიციური ძალების სამხედრო ქვედანაყოფების რაკაში შესვლამდე ამ მსხვილ დასახლებულ პუნქტში “ისლამური სახელმწიფოს” 3000-დან 4000-მდე “ბოევიკი” იმყოფებოდა. დღევანდელი მონაცემებით, ტერორისტები რაკას პროვინციის მხოლოდ 10 პროცენტს აკონტროლებენ. არაბულ-ქურთულმა კოალიციამ “ხალიფატს” წაართვა რაკას პროვინციის ორ მესამედზე მეტი. ამავე დროს სირიის აღნიშნული ოლქის რაიონების 22 პროცენტი დამასკოს სახელმწიფო ჯარების კონტროლს დაექვემდებარა.
