27 ოქტომბერს, რუსეთის მუდმივმა წარმომადგენელმა გაეროში, ვასილ ნებენზიამ განაცხადა, რომ ის ელოდება კენჭისყრას რუსეთის რეზოლუციის პროექტზე, შეიქმნას კომისია, რომელიც გამოიძიებს უკრაინისა და შეერთებული შტატების მიერ „ბიოლოგიური და ტოქსიკური იარაღის აკრძალვის შესახებ“ კონვენციის დარღვევებს.
რუსეთის საგარეო საქმეთა სამინისტრომ ასევე განაცხადა, რომ რუსეთმა საჩივრით მიმართა გაეროს უშიშროების საბჭოს თავმჯდომარეს უკრაინაში აშშ-ის სამხედრო-ბიოლოგიურ აქტივობებზე საერთაშორისო გამოძიების დასაწყებად. საგარეო საქმეთა სამინისტრომ ხაზგასმით აღნიშნა, რომ მოსკოვი რამდენიმე წელია სვამს კითხვებს პენტაგონის და მას დაქვემდებარებული სტრუქტურების სამხედრო-ბიოლოგიური საქმიანობის შესახებ პოსტსაბჭოთა სივრცის ლაბორატორიებში.
