აშშ-ის ყოფილ პრეზიდენტ დონალდ ტრამპის უსაფრთხოების საკითხებში მრჩევლის, ჯონ ბოლტონის, აღიარების შემდეგ, რომ სახელმწიფო გადატრიალებებს ამზადებდა, ვენესუელის ეროვნული ასამბლეის დეპუტატმა ერთიანი სოციალისტური პარტიიდან რაულ ორტეგამ აშშ-ს დამნაშავეთა ბანდა უწოდა.
“ეს არის დამნაშავეთა ბანდა და ამას ადასტურებს ბოლტონის აღიარება, ისევე, როგორც აღიარებები აშშ-ის სხვა ოფიციალური პირებისა, რომლებმაც წიგნებიც კი გამოაქვეყნეს, რომლებშიც პასუხისმგებლობას იღებენ მკვლელობების, ანტიდემოკრატიული გადატრიალებების, ადამიანის უფლებების დარღვევების, პირადი მიზნებით ნარკოტრაფიკის გამოყენების დაგეგმვაზე”, _ განაცხადა ორტეგამ “რია ნოვოსტისთან” საუბარში.
ვენესუელელი პარლამენტარის თქმით, ბოლტონის აღიარების შემდეგ საჭიროა აშშ-ის მთავრობების მიერ ჩადენილი დანაშაულების დამამტკიცებელი მასალების გამოქვეყნება.
“აშშ-ის ადმინისტრაციები, უბრალოდ, კრიმინალური ბანდები არიან, რომლებიც ჰეგემონისტური და საზღვრების დამრღვევი ძალების შემადგენლობაში არიან”, _ აღნიშნა ვენესუელელმა დეპუტატმა. მისი თქმით, ბოლტონის აღიარება საკმარისი არგუმენტია იმისთვის, რომ თვითონ ტრამპი და მისი ადმინისტრაცია განსასჯელთა სკამზე აღმოჩნდნენ, მაგრამ ამ ყველაფერში გარეულია აშშ-ის მართლმსაჯულება, რომელიც ქვეყნის ლიდერებს უფლებას აძლევს, მონაწილეობდნენ სხვა ქვეყნებში გადატრიალების მოწყობაში.
12 ივლისს ტელეარხ CNN-ის ეთერში ბოლტონმა განაცხადა რომ მონაწილეობდა სხვა ქვეყნებში სახელმწიფო გადატრიალების მომზადებაში”.
ამა წლის მაისში ბოლტონმა National Review-ში გამოაქვეყნა სტატია, რომელშიც ვაშინგტონს მოუწოდა, საკადრისი პასუხი გასცეს რუსეთს აფხაზეთსა და სამხრეთ ოსეთში. პოლიტიკოსმა აღნიშნა, რომ კავკასიასა და აღმოსავლეთ ევროპის 6 ქვეყანა “ნაცრისფერ ზონაში” დარჩა, რუსეთისა და ნატოს საზღვრებს შორის, და ეს სივრცე დასავლეთმა უნდა აითვისოს.
გიორგი გაჩეჩილაძე
