თუკი ერთმანეთს შეადარებთ დღეს არსებულ და პირველ სკაფანდრებს, უამრავ განსხვავებას აღმოაჩენთ. ცხადია, პროგრესი ერთ ადგილას არ ჩერდება, თუმცა კოსმონავტების თანამედროვე ტანსაცმელს მნიშვნელოვანი ნაკლი აქვს _ ძალიან მძიმეა.
კომპანია “ბოინგმა”, რომელიც ამჟამად აქტიურად თანამშრომლობს კოსმოსურ სააგენტოებთან, ახლახან წარმოადგინა მომდევნი თაობის მსუბუქი და მაღალტექნოლოგიური სკაფანდრი. სკაფანდრს Boeing Blue უწოდეს. მის გამოყენებას აპირებენ ასტრონავტები, რომლებიც კოსმოსურ სივრცეში 2018 წელს გავლენ. Boeing Blue გათვალისწინებული არ არის ღია კოსმოსში ხანგრძლივი ყოფნისთვის, ამ სკაფანდრის დანიშნულებაა, დაიცვას კოსმონავტი მოულოდნელად ჰერმეტიზაციის დაზიანების შემთხვევაში.
Boeing Blue 60%-ით მსუბუქია NASA-ს სკაფანდრზე. მაგალითად, ნარინჯისფერი სკაფანდრი (რომელსაც ამჟამად იყენებენ) 13,5 კგ-ს იწონის, Boeing Blue კი _ 5,4-ს. ახალ სკაფანდრს აქვს განსაკუთრებული “რბილი” კონსტრუქციის ჩაფხუტი და აღჭურვილია საკომუნიკაციო სისტემებით.
სკაფანდრი Boeing Blue თანამედროვეობის ყველა მოთხოვნას აკმაყოფილებს. მისი გამოყენება გათვალისწინებულია ხომალდზე CST-100, რომლითაც მალე მოეწყობა კოსმოსური ექსპედიცია.