ანაკლიაში, მშენებარე პორტის ტერიტორიაზე, მიმდინარე არქეოლოგიური გათხრებისას აღმოჩენილია კულტურის ნიმუშების ორი ფენა, რომელიც კოლხურ ნამოსახლარს წარმოადგენს და ჩვ. წ. აღ–მდე VI-IV საუკუნეებით თარიღდება. ეს ინფორმაცია რადიო “ათინათმა” გაავრცელა.
არქეოლოგიური კვლევა-ძიება ე.წ. ლაზიკის იუსტიციის სახლის მიმდებარე ტერიტორიაზე განხორციელდა. ექსპედიციას არქეოლოგი რევაზ პაპუაშვილი ხელმძღვანელობდა. ზუგდიდის გამგეობის ძეგლთა დაცვის განყოფილების უფროსის _ ლაშა ჯიქიას ინფორმაციით, კულტურული მემკვიდრეობის ძეგლი 4 ჰექტარზეა გადაჭიმული. ზუგდიდის გამგეობაში ამბობენ, რომ არქეოლოგიური აღმოჩენით “ანაკლიის განვითარების კონსორციუმის” წარმომადგენლები დაინტერესდნენ. მათივე თქმით, პროექტი უკვე მზადდება და ანაკლიაში გათხრები მომდევნო წლის ზაფხულში განახლდება.
