„ერთიანმა ნაციონალურმა მოძრაობამ” პრემიერმინისტრ გიორგი კვირიკაშვილს 2012 წლის არჩევნების შემდეგ გახმაურებული და გამოუძიებელი საქმეების სია გაუზავნა. „პატრიოტთა ალიანსის” ერთ–ერთი ლიდერი ემზარ კვიციანი ამ საკითხზე საუბრისას აღნიშნავს, რომ “ნაციონალურ მოძრაობას” ასეთი საქმეების გახსნა თუ სურს, 2012 წლამდე გახმაურებული და გამოუძიებელი საქმეების სიაც უნდა გაეგზავნათ პრემიერმინისტრისთვის.
„ნაციონალები” თავგასული ადამიანები არიან. რაც ცხრა წლის განმავლობაში გააკეთეს, ყველამ კარგად ვიცით, შემდეგ რასაც აკეთებენ, ამასაც კარგად ვხედავთ. მათი თავგასულობა ხელისუფლების ბრალია, ეს პარტია საერთოდ ასაკრძალი იყო. ხელისუფლებამ მათ თავისუფლად მოქმედების საშუალება მისცა, ამიტომაც აკეთებენ ყველაფერს, რაც სურთ. თუ პრემიერთან გამოუძიებელი საქმეების მიტანა უნდოდათ, მიეტანათ 2012 წლამდე გამოუძიებელი საქმეებიც. 2012-მდეც და მის მერეც ჩადენილი ყველა დანაშაული გამოძიებული უნდა იყოს”, _ განაცხადა ემზარ კვიციანმა.