ავსტრიის ქალაქ ლინცში უარი თქვეს შუქნიშნებზე, რომლებზეც ერთნაირსქესიანი წყვილებია გამოსახული.
“შუქნიშნები საგზაო მოძრაობის რეგულირებისთვისაა საჭირო და არა იმისათვის, რომ გასცეს რჩევები, როგორ უნდა იცხოვროთ”, _ ასე განმარტა ადგილობრივი ხელისუფლების გადაწყვეტილება ქალაქის საბჭოს დეპუტატმა “თავისუფლების პარტიიდან” _ მარკუს ჰაინმა. მისი თქმით, ავსტრიაში ისედაც ბევრი უფლება აქვს ადამიანს. მწვანეთა პარტიის წარმომადგენლებმა კი გეიშუქნიშნებზე უარის თქმას სამარცხვინო გადაწყვეტილება უწოდეს. “ბი-ბი-სი” იუწყება, რომ, ბევრი ინტერნეტმომხმარებლის აზრით, ეს გადაწყვეტილება ლინცს იმიჯს შეულახავს.
ავსტრიის სხვა ქალაქებში, მაგალითად, დედაქალაქ ვენაში, აგრეთვე, ზალცბურგში გეიშუქნიშნები კვლავ მუშაობს. ვენაში ასეთი შუქნიშანი პირველად 2015 წლის მაისში დადგეს, მუსიკალური კონკურსის _ “ევროვიზიის” დაწყებამდე ცოტა ხნით ადრე.
ავსტრიაში აკრძალულია გეიქორწინებები, თუმცა 2010 წლიდან ლგბტ თემის წარმომადგენლებს შეუძლიათ “სამოქალაქო პარტნიორობა” გააფორმონ.