მსოფლიო ისტორიიდან ასობით მაგალითის მოყვანა შეიძლება, როცა ყოფილი თანამოაზრეები უფრო დაუნდობლები არიან ერთმანეთის მიმართ, ვიდრე ისინი, ვინც ისტორიამ თავიდანვე მტრებად შეახვედრა. მაგალითისთვის ბოლშევიკებისა და მენშევიკების დაპირისპირებაც იკმარებდა. ჰოდა, ყოფილი «ნაციონალები» რომის პაპზე უფრო კათოლიკები არიან და გულში მჯიღის ბაგუნით მოითხოვენ «ნაცმოძრაობის» ნაციონალი ჩინოვნიკების და, მგონი, ყველაფერი ნაციონალურის აკრძალვას და ხანდახან (ზომიერად, რა თქმა უნდა, «მე ხომ არ მოვიჭრი კუდ»-ის პრინციპით) საკუთარ თავსაც აკრიტიკებენ ხოლმე. საინტერესოა, რა მიზანს ისახავდა კობა დავითაშვილი, როცა «ნაციონალების» ამკრძალავ კანონპროექტს წერდა? «საქართველო და მსოფლიოს» ესაუბრა ხალხის პარტიის ლიდერი კობა დავითაშვილი.
_ ბატონო კობა, ახლა, არჩევნების წინ რამ განაპირობა თქვენი მოთხოვნა ,,ნაციონალური მოძრაობის» წარმომადგენლებისთვის მაღალი სახელმწიფო თანამდებობების დაკავების აკრძალვის თაობაზე?
_ უკაცრავად და, მაინცდამაინც ახლა არ დამიყენებია ეს საკითხი, კარგა ხანია ვამბობ, რომ «ნაციონალური მოძრაობა» დამნაშავე ორგანიზაციაა და მასთან კოაბიტაცია არ შეიძლება. არჩევნები არის საშუალება, ხალხმა აირჩიოს გზა და მხარი დაუჭიროს იმ პოლიტიკას, რომელიც მოსწონს, ეს კანონი კი ხალხს მოსწონს, მათთვის სავსებით მისაღებია. სხვათა შორის, ეს პირველი პრეცენდენტი არ არის. გაგახსენებთ, მთელ აღმოსავლეთ ევროპაში ტოტალიტალური რეჟიმიდან თავის დაღწევის შემდეგ მიიღეს კანონები ლუსტრაციის შესახებ, რომლებიც ზუსტად გულისხმობს ტოტალიტალური რეჟიმის თანამდებობის პირებისთვის მაღალი სახელმწიფო თანამდებობების დაკავების აკრძალვას. შემდეგ ეს კანონი მიიღეს საქართველოშიც და მიმაჩნია, რომ «ნაციონალური მოძრაობა» არის ტოტალიტალური ტიპის ორგანიზაცია, რომელმაც 9 წელი ქვეყანა წამების, გაუპატიურების, შიშისა და ტერორის რეჟიმში ამყოფა, ამიტომ მის წევრებს სახელმწიფო თანამდებობები არ ეკუთვნით. დიახ, არ არიან სანდონი, ვერ ვანდობთ უმაღლეს სახელმწიფო თანამდებობებს; გამონაკლისი ის თანამდებობებია, რომლებსაც ირჩევს ხალხი და, თუ ხალხი ენდობა მათ, ჩვენ ხალხს ამ უფლებას ვერ შევუზღუდავთ. ასეთი პარტიის წევრები შეიძლება გახდნენ პარლამენტარები, მაგრამ დანიშვნად თანამდებობებზე, პარლამენტის მიერ ასარჩევ თანამდებობებზე ვერ მოხვდებიან.
_ კი, ბატონო, ამის თაობაზე ადრეც აცხადებდით, მაგრამ დღემდე არ დაგისვამთ ეს საკითხი… როდესაც «ქართულმა ოცნებამ» გაიმარჯვა, მაშინვე რატომ არ მოითხოვეთ ეს? სრულიად ნათელი იყო, რომ «ნაციონალური მოძრაობა» დანაშაულებრივი ორგანიზაცია იყო… ისე, ცოტა ხომ არ არის «ნაცებისთვის» მხოლოდ მაღალი სახელმწიფო თანამდებობების დაკავების აკრძალვა?
_ იცით, მე, არც მეტი, არც ნაკლები, ვიხელმძღვანელე იმ სტანდარტით, რომელიც გამოიყენეს აღმოსავლეთ ევროპაში. კომუნისტური პარტიის მიმართ ასეთი ჩანაწერი არსებობს, მაგრამ კომუნისტური პარტია, როგორც მოვლენა, არ არის აკრძალული. რამდენადაც ჩემთვის ცნობილია, დარეგისტრირებულიც არის რამდენიმე ასეთი პარტია, უბრალოდ, მათ თანამდებობის პირებს მაღალი თანამდებობების დაკავება ეკრძალებათ.
_ აი, გერმანიაში მეორე მსოფლიო ომის შემდეგ ნაცისტების პარტიის წევრებს და მათ ხელის ჟურნალისტებსაც კი აკრძალული ჰქონდათ პროფესიული საქმიანობა. თვლით, რომ «ნაცმოძრაობა» თავისი მასშტაბებით უტოლდება გერმანულ ნაციონალ–სოციალისტურ პარტიას?
_ გერმანიაში დენაციფიკაციის უფრო მკაცრი პოლიტიკა გატარდა. მე, უბრალოდ, ავიღე უფრო ეროვნული სტანდარტი და ამაზეც დიდი ამბავი ატყდა. პირდაპირ გეტყვით: ის ხელისუფლება, რომელიც არ ითვალისწინებს ხალხის აზრს, წყვეტს ხელისუფლებად ყოფნას!
_ და კანონის ეს შეზღუდვა უნდა გავრცელდეს თუ არა კობა დავითაშვილზე? თქვენ «ნაცმოძრაობის» პოლიტიკური მდივანი იყავით, ეს პარტია თქვენზე იდგა…
_ მე ხომ კანონში არ ვწერ, რომ ყველას ეხება, გარდა კობა დავითაშვილისა?! ეს ეხება ყველას, მათ შორის მეც. მე, «ნაციონალებისგან» განსხვავებით, საკუთარ თავზე არ ვირგებ კანონებს.
_ ალბათ, საინტერესოა, როგორი იქნება დასავლეთის რეაქცია ამ კანონპროექტის მიღების შემთხვევაში…
_ და რატომ უნდა მაინტერესებდეს ეს? მე, კობა დავითაშვილს, დასავლეთის რეაქცია არ მაინტერესებს. მე მაინტერესებს მხოლოდ სააკაშვილის მფარველების რეაქცია, რომლებიც საკუთარ ტყავს უფრთხილდებიან. სხვათა შორის, აღმოსავლეთ ევროპაში რომ გატარდა ლუსტრაცია, არ მახსოვს, ამაზე დასავლეთს პროტესტი გამოეხატოს, ვნახოთ, აქ რა დამოკიდებულება იქნება.
_ «ქართულ ოცნებას» კი ნამდვილად აინტერესებს დასავლეთის რეაქცია. ისიც მითხარით, როგორ აფასებთ თქვენს შანსებს არჩევნებზე?
_ ამას ხალხი გადაწყვეტს. ვხედავ, რომ იმ საკითხებს, რომლებსაც მე ვაყენებ, ხალხი მხარს უჭერს.
_ თქვენი აზრით, რა იქნება მარგველაშვილის გამარჯვების შემთხვევაში _ დასრულდება კოაბიტაცია, როგორც დაგვპირდა? ვითომ დასავლეთი კოაბიტაციას აღარ დააძალებს, თუ მათ პოზიციას აღარ გაითვალისწინებენ?
_ აი, ეს პროექტი ორმაგი ლუსტრაციის პროექტია _ «ნაციონალების» ლუსტრაცია მისი იმ კლასიკური გაგებით, რომ მაღალი სახელმწიფო თანამდებობების დაკავება აეკრძალოთ; და მეორე, მაინტერესებს «ქართული ოცნების» საპრეზიდენტო კანდიდატის აზრი, რომელიც რატომღაც გაჯორებულია ამ კანონზე («ოცნების» გარკვეული წარმომადგენლები უკვე გმობენ ამ კანონპროექტს), ანუ მე მაინტერესებს, მარგველაშვილის განცხადება კოაბიტაციის დასრულების შესახებ ბლეფი იყო თუ სიმართლე და ამას ნათლად აჩვენებს მისი და მისი პოლიტიკური გუნდის დამოკიდებულება ამ კანონპროექტის მიმართ. ეს არის ტესტი მისთვის და, რამდენად გაივლის, არ ვიცი. და თუ არ მოიწონებს ამ კანონპროექტს, გვეცოდინება, რომ მარგველაშვილმა იცრუა.
დასავლეთს რაც შეეხება, დასავლეთი, რა, ერთიანია? დასავლეთში არიან სააკაშვილის მფარველები, რომლებმაც თავის დროზე დიდი ფული და, ასე ვთქვათ, რეპუტაციაც კი დადეს სასწორზე, ახლა კი საკუთარ თავს იცავენ. დიახ, როდესაც სააკაშვილსა და მის რეჟიმს იცავენ, იცავენ საკუთარ თავს. მათთვის მომაკვდინებელია ჟვანიას მკვლელობის გამოძიება, დანაშაულების გახსნა, დამნაშავეთა დასჯა, სააკაშვილის დაპატიმრება, რადგან საკუთარ ქვეყანაში ვეღარ აუხსნიათ თავიანთი ამომრჩევლებისთვის, «დემოკრატიის შუქურა» რომ იყო და ამდენი ფული რომ ჩაახუტეს, რატომ ხდებოდა ამ ქვეყანაში კაცობრიობის წინააღმდეგ მიმართული ამდენი დანაშაული. აი, ეს გასაგებია და ვიმეორებ: დასავლეთში მარტო ეს ხალხი არ არის, იქ არიან მათი პოლიტიკური ოპონენტებიც, რომლებთანაც მუშაობა და ინფორმაციის მიწოდებაა საჭირო და არა ბუზების ყლაპვა.
_ ივანიშვილთან ერთად, ალბათ, ვეღარ იბრძოლებთ, როგორც ჩანს, უკვე დაალაგა ქვეყანა და მიდის…(?!)
_ პრაქტიკულად, ერთადერთი პოლიტიკოსი ვარ, რომელიც მიესალმება ამ პროცესს. ქვეყნის დალაგება ერთჯერადი პროცესი არ არის! ეს მუდმივი პროცესია და ჩვენ ვერასდროს ვიქნებით ისეთ მდგომარეობაში, როცა ვიტყვით, რომ ავშენდით, დავლაგდით და ახლა შეგვიძლია განცხრომას მივეცეთ-თქო. ადამიანმა თქვა, მალე წავალო და მიდის, უფლება აქვს, წავიდეს. სხვათა შორის, სწორადაც იქცევა. აი, აქამდე ჩვენი პრობლემა სულ ის იყო, რომ მოდიოდნენ ხელისუფლებაში ადამიანები და იძახდნენ, სიცოცხლის ბოლომდე არსად წავალთო. პირველი პრეცენდენტია, როდესაც ხელისუფალი თავისით მიდის და ამას უნდა მივესალმოთ.
ივანიშვილი პოლიტიკოსი არ არის, აქედან გამომდინარე, არ არის ეს მისი საქმე და, როცა ხედავს, რომ არ არის მისი საქმე, მიდის და სწორადაც იქცევა. ხალხი რომ ლაპარაკობს, ვის უტოვებს ქვეყანასო, ხალხს უტოვებს! იქნება არჩევნები და გაირკვევა, ხალხი რა გადაწყვეტილებას მიიღებს.
ესაუბრა
ქეთი ხომერიკი
