10 ყველაზე დიდი ქალაქი მოსახლეობის მიხედვით

ალბათ, იშვიათია ადამიანი, რომელსაც არასოდეს დაუსვამს კითხვა: რომელი ქალაქია დედამიწაზე ყველაზე დიდი? მეხიკო? ნიუ–იორკი?  მსოფლიო ისე სწრაფად ვითარდება, რომ ქალაქები, რომლებიც 1980-იან, თუნდაც 1990-იან წლებში ლიდერობდნენ, დღეს პირველ ათეულშიც ვერ შედიან.  როგორ გამოიყურება მსოფლიოს 10 ყველაზე დიდი ქალაქის სია?

10. დაკა, ბანგლადეში _ 12 მლნ

ბანგლადეშის დედაქალაქი და ამ ქვეყნის ყველაზე დიდი ქალაქი მდებარეობს მდინარე განგის დელტაზე. დაკა 1608-1717 წლებში იყო ბენგალიის დედაქალაქი, 1971 წლიდან კი ბანგლადეშის დედაქალაქია. დაარსებულია VII საუკუნეში. მოსახლეობა შეადგენს 12 მლნ კაცს, ტერიტორია _ 815,85 კვ.კმ-ს.

9. მოსკოვი, რუსეთი _ 12,45 მლნ

რუსეთის ფედერაციის დედაქალაქი და ევროპის კონტინენტის ყველაზე დიდი ქალაქი განლაგებულია მდინარე მოსკოვის ნაპირებზე. ისტორიულ წყაროებში მოიხსენიება 1147 წლიდან. ქალაქს ემსახურება 6 აეროპორტი, 9 რკინიგზის სადგური და 3 სამდინარო პორტი. მოსახლეობა 12,45 მლნ კაცია, ტერიტორია _ 2561,5 კვ.კმ.

8. მუმბაი, ინდოეთი _ 12,78 მლნ

მუმბაი, რომელსაც 1995 წლამდე უწოდებდნენ ბომბეის, მდებარეობს ინდოეთის დასავლეთში, არაბეთის ზღვის სანაპიროზე. მეცნიერთა აზრით, დაარსებულია ჩვ.წ. აღ-მდე III საუკუნეში. მოსახლეობა 12,478 მლნ-ია. ტერიტორია _ 602 კვ.კმ.

7. ლაგოსი, ნიგერია, 13,12 მლნ

საპორტო ქალაქი ნიგერიის სამხრეთ-დასავლეთში, ყველაზე დიდი დასახლებული პუნქტი აფრიკაში. დაარსებულია 1472 წელს. მოსახლეობა 13,12 მლნ, ტერიტორია _ 999,5 კვ.კმ.

6. გუანჯოუ, ჩინეთი _ 14 მლნ

ეს არის სამხრეთ ჩინეთის სახალხო რესპუბლიკის პოლიტიკური, ეკონომიკური, სამეცნიერო-ტექნიკური, საგანმანათლებლო, კულტურული და სატრანსპორტო ცენტრი. დაარსებულია 862 წელს ჩვ.წ.აღ-მდე. მოსახლეობა _ 14 მლნ, ტერიტორია _ 7434,4 კვ.კმ.

5. სტამბოლი, თურქეთი _ 15,0 მლნ

თურქეთის ეს უდიდესი ქალაქი ბოსფორის სრუტის ნაპირებზეა გაშენებული, რომელიც ქალაქს ევროპულ და აზიურ ნაწილებად ჰყოფს. დაარსებულია ჩვ.წ. აღ-მდე 667 წელს. 1930 წლამდე ეწოდებოდა კონსტანტინოპოლი, მოსახლეობა 15 მლნ, ტერიტორია _ 5343 კვ.კმ.

4. დელი, ინდოეთი _ 16,7 მლნ

ეს ქალაქი მდებარეობს ინდოეთის ჩრდილოეთში უტარ-პრადეშისა და ჰარიანას შტატების საზღვარზე. მეცნიერთა აზრით, ეს ქალაქი დაარსებულია ჩვ.წ.აღ-მდე VIII საუკუნეში. მოსახლეობა _ 16,7 მლნ, ტერიტორია _ 1483 კვ.კმ.

3. პეკინი, ჩინეთი _ 21,5 მლნ

ჩინეთის სახალხო რესპუბლიკის დედაქალაქი. ამ ქვეყნის უდიდესი სარკინიგზო, საავტომობილო და ავიაკვანძი. დაარსებულია დაახლოებით 3 ათასი წლის წინათ.

მოსახლეობა _ 21,5 მლნ, ტერიტორია _ 16801 კვ.კმ.

2. ყარაჩი, პაკისტანი _ 23,5 მლნ

საპორტო ქალაქი პაკისტანის სამხრეთში, პროვინცია სინდის ადმინისტრაციული ცენტრი, აგრეთვე, უმაღლესი განათლების უდიდესი ცენტრი ისლამურ სამყაროში.

დაარსებულია XVIII სააუკუნეში. მოსახლეობა _ 23,5 მლნ, ტერიტორია _ 3530 კვ.კმ.

1. შანხაი, ჩინეთი _ 24,15 მლნ

თანამედროვე მსოფლიოს უდიდესი ქალაქი მნახველებს აცვიფრებს თავისი ფუტურისტული ნაგებობებით. აქ არის ჩინეთის ყველაზე მაღალი _ 121-სართულიანი ცათამბჯენი, რომლის სიმაღლე 632 მეტრია. გაშენებულია მდინარე იანძის დელტაზე. დაარსებულია 751 წელს. მოსახლეობა _ 24,15 მლნ, ტერიტორია _ 6340 კვ.კმ.

მოამზადა ნიკა კორინთელმა