მმართველმა გუნდმა ევროპელი დეპუტატების შემდეგ იერიში დიპკორპუსზე მიიტანა. იმ დროს, როდესაც საქართველოში რეგიონალური ტურნეს ფარგლებში ვიზიტით ევროპარლამენტარები იმყოფებიან, მათთან მოლაპარაკების წინ “ქართული ოცნების“ თავმჯდომარე ირაკლი კობახიძე ევროკავშირის ელჩს საქართველოში კარლ ჰარცელს, რომელსაც ამ თანადებობაზე ყოფნის ვადა ეწურება, ფაქტობრივად, თავს დაესხა..
“თამამად შეიძლება ითქვას, რომ, სამწუხაროდ, კარლ ჰარცელი მხოლოდ უარყოფით როლს ასრულებდა ევროკავშირსა და საქართველოს ურთიერთობებში, – ასე შეაფასა ირაკლი კობახიძემ ევროკავშირის ელჩის კარლ ჰარცელის საქართველოში მუშაობა და იმედი გამოთქვა, რომ მომავალი ელჩი “განსხვავებულად იმოქმედებს“.
“ჩვენ მთელი ამ პერიოდის განმავლობაში, სხვადასხვა მიზეზის გამო, მათ შორის, იმის გამო, რომ ჩვენ განაცხადი გვქონდა წარდგენილი ევროკავშირში, ეს იყო მიმდინარე პროცესი და ა.შ. ვერიდებოდით მასზე კომენტარის გაკეთებას, ვიდრე ის იყო ევროკავშირის მოქმედი ელჩი, თუმცა დღეს როდესაც დაასრულა თავისი მისია, თამამად შეიძლება ითქვას, რომ სამწუხაროდ, კარლ ჰარცელი მხოლოდ უარყოფით როლს ასრულებდა ევროკავშირსა და საქართველოს ურთიერთობებში. ეს არის ძალიან სამწუხარო მოვლენა. ჩვენ დიდი იმედი გვაქვს, რომ მომავალი ელჩი განსხვავებულად იმოქმედებს”, – აღნიშნა კობახიძემ.
“ქართულმა ოცნებამ“, როგორც ჩანს, ეს განცხადება არასაკმარისად მიიჩნია და ირაკლი კობახიძის სულისკვეთება პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ გაიზიარა. დეპუტატმა ელჩს პირდაპირ დასდო ბრალი იმაში, რომ საქართველომ ევროკავშირის წევრის სტატუსი ვერ მიიღო.
“კარლ ჰარცელს შეეძლო უკეთ ემუშავა იმისთვის, რომ საქართველოს კანდიდატის სტატუსი მიეღო”, – თქვა დეპუტატმა.
შეგახსენებთ, რომ 4-წლიანი მისიის შემდეგ, შვედი დიპლომატი კარლ ჰარცელი საქართველოში ევროკავშირის ელჩის თანამდებობას ტოვებს.
მმართველი გუნდის მიერ დასავლეთთან გამოცხადებულ ომს ოპოზიცია ხელისუფლების მხრიდან ძალაუფლების შენარჩუნებისა და ბიძინა ივანიშვილის ფინანსური ინტერესების დაცვით ხსნის.
საერთაშორისო ურთიერთობის ექსპერტი თენგიზ ფხალაძე საგანგაშოდ მიიჩნევს ჩვენს სტრატეგიულ პარტნიორებზე შეტევას, იქნება ეს ევროკავშირი, თუ ამერიკის შეერთებული შტატები, რამაც ბოლო დროს ტენდენციის ხასიათი მიიღო.
![](https://cdn.ambebi.ge/media/images/2022/02-21/fxaladze123-38449.jpg)
“დავიწყებ იმით, რომ კარლ ჰარცელს დიდი ხანია ვიცნობ, ჯერ კიდევ იქიდან მოყოლებული, ვიდრე ელჩად დაინიშნებოდა საქართველოში და მუშაობდა ბრიუსელში. ეს ადამიანი არის საქართველოს გულშემატკივარი და ბევრი რამ აქვს გაკეთებული ჩვენი ევროინტეგრაციის წინსვლისთვის. ჩვენს სტრატეგიულ პარტნიორებზე შეტევამ, იქნება ეს ევროკავშირი, თუ ამერიკის შეერთებული შტატები, ტენდენციის ხასიათი მიიღო, რაც საგანგაშოა. მაშინ, როდესაც ჩვენს სტრატეგიულ პარტნიორებს უნდა ველაპარაკებოდეთ, მაგალითად, იმაზე, რომ ხდება ბიჭვინთის მიტაცება, რაც სულ ახალი ამბავია და, სამწუხაროდ, ჩვენს ხელისუფლებას ეს ფაქტი “გამორჩა“, ამაზე არანაირი რეაგირება არ გაუკეთებია. ჩვენს სტრატეგიულ პარტნიორებს უნდა ველაპარაკებოდეთ იმაზე, თუ როგორ გავაძლიეროთ საქართველოს თავდაცვისუნარიანობა, როგორ მოვახდინოთ მალე იმ 12 პუნქტის შესრულება, რაც დაგვაახლოვებს კანდიდატის სტატუსთან და ა.შ. ამის ნაცვლად ჩვენ ვხედავთ იმას, რომ ის ქმედებები, რასაც აგრესორი ახორციელებს საქართველოს წინააღმდეგ, რჩება რეაგირების გარეშე, ჩვენს სტრატეგიულ პარეტნიორებთან კი შევდივართ ისეთი ტიპის შუღლში, რომელიც არანაირად არ ემსახურება საქართველოს ინტერესებს. ამიტომ ვამბობ, ეს ყველაფერი არის ძალზე საგანგაშო. არ ვიცი, ამით კობახიძეს და სხვებს რისი თქმა უნდათ, მაგრამ ამით ისინი მხოლოდ საქართველოს ეროვნულ ინტერესებს აზიანებენ. ჩვენს პარტნიორებთან ურთიერთობები წლების განმავლობაში ძალიან დიდი შრომით, რუდუნებით და დიდი ძალისხმევის ფასად შენდებოდა. ამის გაფუჭება არის ძალიან დამაზიანებებლი ქართული სახელმწიფოებრიობისთვის, საქართველოს ეროვნული ინტერესებისთვის იმიტომ, რომ თუ კი ეს ქვეყანა დგას და ამ ქვეყანას აქვს წინსვლა-წარმატება, ეს ყველაფერი არის ჩვენი დასავლელი პარტნიორების ხელშეწყობით. ხოლო როდესაც ჩვენ შეტევა მიგვაქვს აშშ-ს, თუ ევროკავშირის ელჩზე, ეს არის ჩვენი დამაზიანებელი ქმედებები. კარლ ჰარცელის მიმართ მადლობის მეტი არაფერი გვეთქმის, ის შესანიშნავი დიპლომატია.
ნუთუ ვერ ხვდებიან, რომ ასეთი რიტორიკა მხოლოდ და მხოლოდ ჩვენ გვაზიანებს? ჩვენ თუ გვგონია, ამით ამერიკა, ან ევროკავშირი ზიანდება, ძალიან ვცდებით. ჩვენ ვიფუჭებთ ურთიერთობას იმ სტრატეგიულ პარტნიორებთან, რომლებიც იცავენ საქართველოს სუვერენიტეტს, დამოუკიდებლობას და ქართულ სახელმწიფოებრიობას. აქედან გამომდინარე, უფრო მარტივად გადასაყლაპი ლუკმა ვხდებით რუსეთის ფედერაციისთვის.
ჯერჯერობით ვერც ერთი ნაბიჯი ვერ დავინახე, რომელიც მიანიშნებს იმაზე, რომ 12 პუნქტის შესრულება არის რეალურად გადაწყვეტილი. მაშინ, როდესაც პარლამენტი საგანგებო სესიაზე აცხადებს უარს, როდესაც გრძელდება თავდასხმები დასავლელ პარტნიორებზე, როგორ შეიძლება ვილაპარაკოთ იმაზე, რომ რაღაც სერიოზული მზადება მიდის? აშკარად იკვეთება, რომ “ოცნებას“ არ უნდა სტატუსის მიღება, ვინაიდან ეს ყველაფერი ვალდებულებებთან არის დაკავშირებული – სტატუსის მიღება ხომ არ არის განყენებული თემა, ეს არის დასავლური ტიპის, დემოკრატიული, დაბალანსებული, ინსტიტუციურად მდგრადი სახელმწიფოს აშენება. ჩვენთან ახლა ძალიან სერიოზულად მიმდინარეობს ინსტიტუციების ნგრევა და ეს პრობლემები ახლა არ გამოჩენილა საქართველოში. ამის გამოსწორების სურვილი ან გაქვს, ან – არა. როგორც ჩანს, ამ ხელისუფლებას ამისი სურვილი არ აქვს“, – აცხადებს ფხალაძე.
რაც შეეხება ნიკოლოზ სამხარაძის მიერ ელჩ ჰარცელის დადანაშაულებას კანდიდატის სტატუსის არმიღებაში, ამ განცხადებაზე პოლიტოლოგს სერიოზული კომენტარის გაკეთება უჭირს.
“ძალიან გამიჭირდება ამ ბრალდებაზე სერიოზული განმარტება. ალბათ ეს ახალი სიტყვაა დიპლომატიაში – ევროკავშირის წარმომადგენელს აბრალებდე იმის არგაკეთებას, რაც შენი გასაკეთებელია. ევროკავშირთან იყო ჩვენი ხელისუფლების და არა კარლ ჰარცელის სამუშაო, ასე რომ, ამაზე რა უნდა ვთქვა? ის, რომ სტატუსი გადავადდა, ამაზე მთლიანად საქართველოს ხელისუფლებაა პასუხისმგებელი“, – ამბობს თენგიზ ფხალაძე.