ქართველი საზოგადოება მოუთმენლად ელის ,,ნაცმოძრაობის” გასამართლებასა და მის გაქრობას პოლიტიკური ველიდან…
ოქტომბერში თვითმმართველობის არჩევნები უნდა ჩატარდეს. ამომრჩეველი დიდი ინტერესით ელოდება, რომელი პარტიები მიიღებენ მასში მონაწილეობას. ელექტორატის ძირითად ნაწილს სურს, ,,ნაცმოძრაობა” და მისი სატელიტები საარჩევნო სიაში აღარ იხილოს. არადა, სააკაშვილის ხელისუფლების ბევრი წარმომადგენელი (მათ შორის დამკვეთიც და შემსრულებელიც) დღეს ამჟამინდელი ხელისუფლების ფლანგზე არის და “პროფესიონალ” კადრადაც ითვლება…
ქვეყანაში მიმდინარე პროცესებზე ანალიტიკოსი ლევან ადეიშვილი გვესაუბრება:
_ აუცილებლად უნდა დაისაჯონ წინა ხელისუფლების დამნაშავე წარმომადგენლები, განსაკუთრებით _ ლიდერები, დანარჩენები დაიქსაქსებიან.
დიდი ხანია, ჩვენი საზოგადოება თვალყურს ადევნებს ბიძინა ივანიშვილის საკადრო პოლიტიკას. ნათქვამია: ,,გყავდეს მეგობრები ახლოს, მტრები კი _ უფრო ახლოს”. აი, ამ პრინციპით მოქმედებს ივანიშვილი. კომპრომეტებული ადამიანებით მანიპულირება ბიძინას გატაცებაა, მისთვის ნაცები ადვილი სამართავია. ის ნაცებს შორის ეძებს გამოცდილ კადრებს, რადგან თვლის, რომ ქვეყანაში პროფესიონალების ნაკლებობაა, წინა ხელისუფლების ზოგიერთი წარმომადგენელი კი გამოცდილი კადრია. მას ჰგონია, რომ ამით წინა ხელისუფლების გუნდის წარმომადგენლებს თავისიანად აქცევს, მაგრამ იმაზე არ ფიქრობს, გადაბირებული ადამიანები არიან თუ არა მისიანები და მისთვის ხმის მიმცემები. ალბათ, გახსოვთ ივანიშვილის ნათქვამი: მერაბიშვილი და ადეიშვილი კარგი კადრები არიან და ჩემს ხელში კარგი მენეჯერები იქნებოდნენო. მას სწამს, რომ დიდი ნდობა აქვს და მრუდ ხეს სწორ ჩრდილს გამოაცემინებს…
სახელმწიფო ინსტიტუტებს გამოცდილი კადრები სჭირდება. ჩვენ გვყავს კარგი კადრები, რომლებსაც გამოცდილება არ აქვთ, ამიტომ ერთი და იგივე კადრები ტრიალებენ, პროფესიონალები კი დაიკარგნენ. ახალგაზრდა კადრები ლიბერალებმა წაგვართვეს, დასავლეთმოვლილი ახალგაზრდები ინიშნებიან დიდ თანამდებობებზე, ინიშნებიან მინისტრებად; თუ არ გამოდგებიან _ იცვლებიან. ახალგაზრდები არიან, მაგრამ ერთმანეთზე უარესი. ამ ხელისუფლებას შეიძლება აქვს კადრების შეცვლის სურვილი, მაგრამ ვეღარ ახერხებს…
_ სარწმუნოა მოსაზრება, რომ ხელისუფლება შეძლებს “ნაციონალური მოძრაობისა” და მისი განშტოებების ძირფესვიანად ამოძირკვას? სააკაშვილის რეჟიმის ერთ–ერთ აქტიურ ფიგურას _ გიგა ბოკერიას და მის ცოლს ცოტა ხნის წინათ პარტია ,,ფედერალისტები” დაურეგისტრირეს…
_ ხელისუფლება ვერ შეძლებს ნაცების ძირფესვიანად ამოძირკვას, რადგან დასავლეთს ჯერ კიდევ აქვს გავლენა საქართველოზე. ბოკერიასა და მისი ცოლისთვის პარტიის დარეგისტრირება ნიშნავს იმას, რომ ამ ეტაპზე ხელისუფლება ვერ ბედავს მკვეთრ მოძრაობებს, ვერ გაუკეთებს ბოკერიას იმას, რაც “ალტ-ინფოს” გაუკეთა. ბოკერიას პარტია იქნება თავის გასამართლებელი თემა დასავლეთის წინაშე: იტყვიან, რომ კონსტიტუციის ფარგლებში იმოქმედეს. დასავლეთის თვალში ასამაღლებლად ხელისუფლებას ხელს აძლევს ბოკერიას ყოფნა პოლიტიკურ ველზე. აგრეთვე, ხელს აძლევს ახალგაზრდა ლიბერალების წინა პლანზე წამოწევა, იტყვიან: ისინი გასვრილები არ არიანო. ახალგაზრდა დარეხვილ ლიბერალებს, შესაძლოა, შეუქმნან პარტია და ჩამოაყალიბონ ახალი ოპოზიცია.
_ გჯერათ, რომ თვითმმართველობის არჩევნებამდე არც ერთი ნაცის _ ყოფილის თუ მოქმედის, ჭაჭანება არ იქნება ამ ქვეყანაში?
_ ხმამაღალი ნათქვამია. თუ არ იქნება პარტია, არის ამომრჩეველი, რომლის ხელში ჩაგდებაც შეიძლება. იგივე ნაცები იზამენ ამას, ოღონდ სხვა სახელით.
საქართველოს პარლამენტი სრულყოფილი არ არის. საკანონმდებლო ორგანოში გიორგი გახარიას პარტიაც რომ შევიდეს, 49 ადგილი მაინც რჩება. ეს შეიძლება არ ჩაითვალოს არაკონსტიტუციურად, მაგრამ მეეჭვება, 2028 წლის არჩევნებამდე ასე ნაკლული პარლამენტით მივიდეთ, ყოველ შემთხვევაში, ეს სასურველი არ არის.
ივანიშვილს მოქმედების რამდენიმე ვარიანტი აქვს. ადგილობრივ არჩევნებამდე ასე მივალთ და მერე იქნებ გამოჩნდნენ ჯანსაღი ძალები, რომლებიც კონსოლიდაციას შეძლებენ. ასეთ შემთხვევაში ის გზას გაუხსნის ასეთ ძალებს. არის სხვა ვარიანტიც: წინა ხელისუფლების ოდიოზური ფიგურები მოიშოროს და ნარჩენებისგან გააკეთოს ცუდი ოპოზიცია, რომლის ფონზეც თვითონ კვლავ კარგი გამოჩნდება. ეს ცუდი ვარიანტებია. უკეთესი ვარიანტი კი არის ის, რომ ივანიშვილი მიხვდეს ახალი სისხლის საჭიროებას და მისცეს ინტელექტუალებს საშუალება, შექმნან კონსტრუქციული ოპოზიცია. ეს მნიშვნელოვანია. კარგია, თუ ამას გაიგებს, მაგრამ ამის საშუალებას მისცემენ ,,ოცნებას” დაპატრონებული ექსლიბერალები და ექსნაცები? ასე რომ, ყველაფერი მიდის საზოგადოების აქტიურობამდე, საზოგადოებამ თუ ვერ აიძულა ამ ხელისუფლებას ცვლილებები, ახალი პარტიების შექმნა, მაშინ “ოცნებას” ყველაფერი გაუვა…
ამ შემადგენლობამ, რომელიც ივანიშვილს ჰყავს, ჯაგლაგები არიან თუ ბედაურები, ყველა ბრძოლა მოიგო, ამიტომ მას არ შეცვლის. სასურველია, ერთი ბრძოლა მაინც წააგოს, რომ შეცვლაზე იფიქროს. ასეთი უნდა იყოს ადგილობრივი არჩევნები. ვფიქრობ, ამ არჩევნებზე ყველაფერს ვერ დაალაგებენ და წაგებამდე მივლენ. ასეთ შემთხვევაში შეიძლება ცვლილებები განხორციელდეს, მაგრამ, თუ ამომრჩეველმა ნაცების შიშით კვლავ ბრმად დაუჭირა მხარი, არაფერი შეიცვლება და 2028 წლის საპარლამენტო არჩევნებამდე ამ შემადგენლობით მივალთ… ასე რომ, კიდევ ვიმეორებ: ახლა საზოგადოების აქტიურობის დროა, რათა ხელისუფლებაში ჩანერგილი ექსლიბერალები და ექსნაცები მოვიშოროთ, მოვაშორებინოთ ივანიშვილს.
ესაუბრა ეკა ნასყიდაშვილი
