ავსტრიის საგარეო საქმეთა მინისტრი ალექსანდერ შალენბერგი მიიჩნევს, რომ რუსეთის მიმართ პოლიტიკის განსაზღვრისას „ხაზები არ უნდა გადაკვეთო“. მისი აზრით, რუსებისთვის ვიზების გაცემის აკრძალვის დაწესება არ არის საჭირო. მინისტრმა ასევე მოუწოდა რუსეთის ჩართვა ევროპის უსაფრთხოების არქიტექტურაში, იმის გათვალისწინებით, რომ ის არის გაეროს უშიშროების საბჭოს წევრი და ბირთვული სახელმწიფო.
„ჩვენ არ უნდა გადავკვეთოთ ხაზები, მაგალითად, 144 მილიონი რუსისთვის სავიზო აკრძალვის შემოღებით. ჩვენ ასევე უნდა ვიფიქროთ იმაზე, თუ რა იქნება ხვალ, ერთი კვირის შემდეგ და თვეების შემდეგ. ასეა თუ ისე, ევროპული უსაფრთხოების არქიტექტურას მომავალში მოუწევს რუსეთის, როგორც გაეროს უშიშროების საბჭოს მუდმივი წევრის და როგორც ბირთვული სახელმწიფოს, ჩართვა“, – განაცხადა ბ-ნმა შალენბერგმა პარიზის პოლიტიკური კვლევების ინსტიტუტში Sciences Po. ამასთან, მან გააკრიტიკა რუსეთი უკრაინაში საომარი მოქმედებების გამო.
მინისტრმა ასევე გააკრიტიკა პოლონეთი იმ გადაწყვეტილების გამო, რომ რუსეთის საგარეო საქმეთა მინისტრი სერგეი ლავროვი ეუთოს შეხვედრაზე არ შეუშვეს. მისი აზრით, ორგანიზაცია უნდა შენარჩუნდეს როგორც მოლაპარაკების პლატფორმა.
ბ-ნი შალენბერგი პარიზში ასევე შეხვდა საფრანგეთის საგარეო საქმეთა მინისტრს კატრინ კოლონას. მოლაპარაკებების დროს ავსტრიელმა მინისტრმა განაცხადა, რომ წარმოუდგენელია რუსეთის როლის იგნორირება ევროპის უსაფრთხოების სტაბილური სისტემის მშენებლობაში, – იუწყება გაზეთი Kronen Zeitung.
ავსტრია, ევროკავშირის სხვა წევრებთან ერთად, მხარს უჭერს კიევს რუსეთ-უკრაინის კონფლიქტში. მაგალითად, 2022 წლის დეკემბერში ქვეყანამ გადაწყვიტა გამოეყო 5 მილიონი ევრო ენერგეტიკული ინფრასტრუქტურის სასწრაფო რემონტისთვის.
2022 წლის 12 სექტემბრიდან ევროკავშირმა რუსეთის ფედერაციასთან გამარტივებული სავიზო რეჟიმი შეაჩერა. რუსებს სავიზო მოსაკრებელი 35 ევროდან 80 ევრომდე გაუზარდეს. გაიზარდა რუსეთიდან განცხადებების განხილვის ვადაც. ევროკავშირის რამდენიმე ქვეყანამ რუსებისთვის ტურისტული ვიზების გაცემა შეწყვიტა.
