თურქული მედიის ცნობით, 14 თებერვალს, შავი ზღვის სანაპიროზე, აგვას რაიონში (სტამბოლის პროვინციის შილის რაიონში მდებარე დასახლება და კურორტი) ზღვის ნაღმი აფეთქდა. ეს ინციდენტი დაფიქსირდა, როგორც შავი ზღვის თურქეთის სანაპიროზე საზღვაო ნაღმის პირველი აფეთქება, – წერს საინფორმაციო და ანალიტიკური პორტალი Naval News (პარიზში დაფუძნებული, საზღვაო თემების სპეციალობით).
თურქული წყაროების ცნობით, აგვის სანაპირო ზოლში მდებარე რესტორანი აფეთქების შედეგად დაზიანდა, დაშავებულები არ არიან. ოფიციალურ პირებს მომხდართან დაკავშირებით განცხადებები ჯერ არ გაუკეთებიათ.
შავი ზღვის რეგიონში ნაღმების საფრთხე პირველად მას შემდეგ გაჩნდა, რაც ესტონური სატვირთო გემი ოდესის სანაპიროსთან 2022 წლის 3 მარტს ჩაიძირა, როდესაც ის ნაღმს დაეჯახა. ამ ინციდენტიდან ორი კვირის შემდეგ, 18 მარტს, რუსეთის სანაპირო სადგურმა ნოვოროსიისკში გამოაქვეყნა Navtex-ის სანავიგაციო გაფრთხილება, რომ უკრაინის საზღვაო ძალების მიერ ოდესის პორტის მახლობლად განთავსებული ზოგიერთი ნაღმი აფეთქდა მათზე ზემოქმედების გამო. შემდეგ აღინიშნა, რომ უკრაინის შეიარაღებულმა ძალებმა ოდესის სანაპირო წყლებში დაახლოებით 420 საზღვაო ნაღმი განათავსა.
იმავე დღეს სოჭის პორტმა გაფრთხილება გაუგზავნა რეგიონში სავაჭრო გემების გემთმფლობელებსა და კაპიტნებს შავ ზღვაში უკრაინული საზღვაო ნაღმების აფეთქების საშიშროების შესახებ.
რუსული განგაშის შემდეგ, სამსუნგის თურქულმა სადგურმა გამოაქვეყნა Navtex-ის სანავიგაციო გაფრთხილება, რომელიც გულისხმობდა შავი ზღვის აკვატორიაში ნაღმების საფრთხეს, – აღნიშნავს Naval News.
რუმინეთის სასაზღვრო პოლიციის თანამშრომლებმა გასულ თვეში აღმოაჩინეს კიდევ ერთი ზღვის ნაღმი Sfintul Gheorghe-ის სანაპიროზე.
20 იანვარს უკრაინის ოპერატიული სარდლობის “სამხრეთის” ხელმძღვანელმა, გენერალ-მაიორმა ანდრეი კოვალჩუკმა მიკოლაევისა და ოდესის რეგიონების სანაპირო ტერიტორიის გაძლიერების შესახებ განაცხადა. მისი თქმით, უკრაინის შეიარაღებული ძალები აგრძელებენ სანაპიროს დაცვას, “არავითარ შანსს არ უტოვებენ” რუსეთის არმიას დესანტის გადასხმისთვის. ამავდროულად, უკრაინელმა მეთაურმა ისაუბრა შავ ზღვაში განლაგებულ ნაღმებზე.
