10 იანვარს ტელეარხ FOXNEWS–ისთვის მიცემულ ინტერვიუში აშშ–ის პრეზიდენტმა დონალდ ტრამპმა კიდევ ერთხელ გამოხატა თავისი მხარდაჭერა რუსეთთან სავაჭრო ურთიერთობის გაუმჯობესების მიმართ. მისი თქმით, ვაშინგტონს შეუძლია და ვალდებულია, აღადგინოს ნორმალური სავაჭრო ურთიერთობა მოსკოვთან.
აშშ-ის ლიდერის აზრით, ეს აუცილებლად უნდა გაკეთდეს, რადგან “კუდიანებზე ნადირობა” დასრულდა. როგორც ჩანს, ის გულისხმობდა გამოძიებას 2016 წლის აშშ-ის საპრეზიდენტო არჩევნებში რუსეთის თითქოსდა ჩარევის შესახებ, რომელსაც სპეცპროკურორი რობერტ მიულერი თითქმის 2 წლის განმავლობაში აწარმოებდა, მაგრამ აშშ-ის პრეზიდენტისა და მოსკოვის შეთქმულების დამამტკიცებელი ვერანაირი სამხილი ვერ მოიპოვა. ამის გახსენების შემდეგ ტრამპმა ხელიდან არ გაუშვა შესაძლებლობა, კენჭი ესროლა თავისი მოწინააღმდეგეების, დემოკრატების, ბოსტანში და განაცხადა, რომ ამერიკელმა გამომძიებლებმა “რუსეთის საქმეზე” 45 მლნ დოლარი დახარჯეს, მაგრამ ვერაფერი იპოვეს.
აღსანიშნავია, რომ ამერიკის პრეზიდენტმა აქამდეც არაერთხელ გამოხატა რუსეთთან ურთიერთობის გაუმჯობესების სურვილი. მაგალითად, გასული წლის ოქტომბერში თქვა, რომ ამერიკის შეერთებულმა შტატებმა უნდა მოაგვაროს ურთიერთობა რუსეთთან, “იმიტომ, რომ ის (რუსეთი) ჭკვიანია”.