საქართველოს ფინანსთა მინისტრის მოადგილე ნიკოლოზ გაგუა გალარების პროგრამის დეტალებზე საუბრობს. ნიკოლოზ გაგუა ყველას, ვისაც სესხების გალარების პროგრამა ეხება, მასში მონაწილეობას ურჩევს.
ფინანსთა მინისტრის მოადგილე განმარტავს, რომ გალარების პროგრამაში მონაწილეობა ნებაყოფლობითია და მასში მონაწილეობით მსესხებელი საკუთარი დოლარში არსებულ სესხის ლარში გადაყვანას შეღავათიანი პირობებით შეძლებს და წინსწრებით დაფარვის საკომისიოს არ გადაიხდის.
გარდა ამისა, გაგუა განმარტავს, რომ ბანკის პროცენტი იქნება საბაზრო და თუკი მისი მომსახურე ბანკის პირობები მსესხებელს არ დააკმაყოფილებს, მას შეეძლება სათანადო ხელშეკრულება იმ საფინანსო ორგანიზაციაში გააფორმოს, რომელიც მის ინტერესებს უკეთ დააკმაყოფილებს. ნიკოლოზ გაგუას თქმით, გალარების პროგრამა მას არ შეზღუდავს პარტნიორი ბანკის არჩევაში.
”კომერციული ბანკები გალარებულ სესხებს გასცემენ არსებული საბაზრო პროცენტით. მაგალითად, დღეის მდგომარეობით, ლარით გაცემული ცვლად პროცენტიანი იპოთეკური სესხების საბაზრო პროცენტი 10%-ის ფარგლებშია.
დღევანდელი პირობებით, აღნიშნული პროცენტის გაზრდა მოსალოდნელი არ არის. მით უფრო, რომ საქართველოს საბანკო სექტორში კონკურენციაა”, – აცხადებს ნიკოლოზ გაგუა.
მისივე ინფორმაციით, გალარების პროგრამა ერთჯერადია და ის მხოლოდ ორი თვე გაგრძელდება.
რაც შეეხება ლარში სესხების საპროცენტო განაკვეთს, ფინანსთა მინისტრის მოადგილის ინფორმაციით, პრინციპული გადაწყვეტილება იყო, რომ საპროცენტო განაკვეთები საბაზრო მექანიზმებით უნდა ყოფილიყო დარეგულირებული.
”ჩვენ ამ საკითხში არ ვერევით. ბოლო რამდენიმე თვის განმავლობაში ლარზე საპროცენტო განაკვეთები შემცირდა. ამდენად, ვთვლით, რომ საპროცენტო განაკვეთები ლარში იქნება მისაღები”, – განაცხადა ნიკოლოზ გაგუამ.
რაც შეეხება კონვერსიის ხარჯს, ფინანსთა მინისტრის მოადგილის ინფორმაციით, კონვერსიის პროექტი არ იქნება დაკავშირებული რაიმე ტიპის ხარჯებთან.
”აღნიშნული პროექტით ჩვენ ვეხმარებით არა მარტო ფიზიკურ პირებს, რომ მათ გააკეთონ კონვერსია, არამედ მთლიანად ეკონომიკას, რომ მოხდეს ლარიზაცია. ამით ისარგებლებს მთელი ეკონომიკა. გარდა ამისა, თუ საჭირო გახდა უზრუნველყოფაში გამოყენებული უძრავი ქონების რეგისტრაცია, აღნიშნული პროცესი საჯარო რეესტრში გათავისუფლებული იქნება ყველა სახის საფასურის გადახდისაგან. კიდევ ორ გარემოებაზე გავამახვილებ ყურადღებას – კონვერსიის შედეგად, ჩვენს მოქალაქეებს სესხები გაუიაფდებათ. გაიაფების პირველი წყარო არის ის, რომ გადახურდავება ხდება კურსით, რომელიც არის იმ დღეს არსებულ კურსს მინუს 20 პუნქტი, ანუ უკვე ეს არის მნიშვნელოვანი შეღავათი. და ასევე, როდესაც სესხი მსესხებელს აქვს ლარში და შემოსავალიც – ლარში, ეს გაცილებით უფრო მოხერხებულია მისთვის. მას არ უწევს თანხის გადახურდავება სესხის დაფარვის დღეს და ხშირად აღნიშნულ გადახურდავებასთან დაკავშირებული კონვერტაციის საკომისოების გადახდა. ყოველივე ეს შეიძლება იყოს საკმაოდ არსებითი (1 პროცენტი ან უფრო მეტიც). შესაბამისად, ეს გარემოება პროგრამას კიდევ უფრო მეტ მიმზიდველობას სძენს”, – განმარტავს ნიკოლოზ გაგუა.
ფინანსთა მინისტრის მოადგილე აცხადებს, რომ ლარის სესხი სავალუტო რისკისგან დაზღვევის საშუალებას იძლევა.
”აღნიშნული სესხები მოსახლეობამ აიღო ბინის შესაძენად, ანუ იმიტომ, რომ მნიშნელოვანი ცხოვრებისეული ინვესტიცია გაეკეთებინათ. ლარის სესხი მსესხებლებს უფრო მეტ სტაბილურობას სთავაზობს. მათი ხარჯები იქნება სტაბილური და პროგნოზირებადი. ყველას, ვისაც პროგრამა შეეხება, ვურჩევდი, სესხების გალარების პროგრამაში მონაწილეობას. ჯერ ერთი იმიტომ, რომ მთავრობის შეთავაზება მხოლოდ 2 თვე გრძელდება. ამდენად, თუკი ბანკმა განსაზღვრულ 5-დღიან ვადაში არ დაგირეკათ ან SMS არ გამოგიგზავნათ, აუცილებლად თავად მიდით ბანკში, თუკი მიიჩნევთ, რომ პროგრამის პოტენციური მონაწილე ხართ. მეორეც, თუკი აქამდეც გქონდათ სურვილი, თქვენი სადოლარე სესხი ლარში გადაგეყვანათ, ამისთვის ბანკი საკომისიოს გადაგახდევინებდათ. პროგრამა ამ ვალდებულებისგანაც გაგათავისუფლებთ. მესამეც, გაქვთ შეარჩიოთ ნებისმიერი ბანკი რომელიც საუკეთესო პირობებს შემოგთავაზებთ. საქართველოს საბანკო სექტორში საკმაოდ მაღალი კონკურენციაა და ვთვლით ბანკები მსესხებლებს კარგ პირობებს შესთავაზებენ”, – განაცხადა ნიკოლოზ გაგუამ.
წყარო: interpressnews.ge
