იტალიის პარლამენტში შეტანილია კანონპროექტი, რომელიც ითვალისწინებს სისხლის სამართლის პასუხისმგებლობას მშობლებისთვის, თუ ისინი აიძულებენ შვილებს, დაიცვან ვეგანური (ვეგეტარიანელობის მკაცრი ფორმა) ან ვეგეტარიანული დიეტა, სასჯელის ზომა _ ციხე ოთხი წლით.
პროექტის ავტორია მემარჯვენე-ცენტრისტული პარტია “ფორცა იტალიას” წარმომადგენელი ელვირა სავინო. მისი აზრით, ბავშვები, რომლებიც არ იღებენ ცოცხალ ცილას, რჩებიან რკინის, თუთიისა და B12 ვიტამინის გარეშე. ეს კი იწვევს სხვადასხვა ნევროლოგიურ პრობლემასა და ანემიას.
_ თუ ზრდასრული ადამიანი ბრძანდებით, შეგიძლიათ იკვებოთ ისე, როგორც მოისურვებთ, მაგრამ არ შეიძლება ექსპერიმენტების ჩატარება ბავშვებზე, _ აღშფოთებულია პოლიტიკოსი ქალი.
ელვირა სავინო გვიხსნის: ვეგეტარიანელი მშობლებისთვის ასეთი მკაცრი სასჯელის შემოღება გადაწყვიტა რამდენიმე აღმაშფოთებელი შემთხვევის შემდეგ, რომლებიც მისთვის ცნობილი შეიქნა. მშობლები აიძულებდნენ შვილებს, “ეთიკური” დიეტა დაეცვათ და კინაღამ შიმშილით დახოცეს პატარები. ცნობისთვის: ამგვარი ინციდენტის გამო მილანში ახალგაზრდა ცოლ-ქმარს მშობლების უფლება ჩამოართვეს.
