ბოლო დროს განვითარებულ მნიშვნელოვან მოვლენებზე «საქართველო და მსოფლიოს» ესაუბრება მწერალი მერაბ შათირიშვილი.
_ ბატონო მერაბ, როგორც ვიცი, თქვენ მიერ დაფუძნებული მოძრაობა «ერისკაცთა სათათბირო» სექტემბრიდან გააქტიურებას გეგმავს და რიგი სოციალური თუ საზოგადოებრივი მიმართულებებით სერიოზულ მოქმედებას აპირებს. კერძოდ, რა გეგმები გაქვთ და რა იქნება თქვენი პრიორიტეტი? განსაკუთრებით რა საკითხებზე იმუშავებთ?
_ ვიდრე შეკითხვაზე გიპასუხებდეთ, მინდა, გამოვეხმაურო ჩვენი სახელგანთქმული სოპრანოს, ქალბატონი თამარ ივერის განცხადებას, რომელიც მან ამას წინათ ერთ-ერთი ე. წ. არასამთავრობო ორგანიზაციის ოფისში გააკეთა.
მოგეხსენებათ, დაახლოებით ერთი თვის წინათ მის მიერ სოციალურ ქსელში გამოქვეყნებულმა სტატუსმა «ლიბერალების» ბანაკში სერიოზული ვნებათაღელვა გამოიწვია. საუბარი იყო სექსუალური უმცირესობების უფლებებზე, რომლებიც თურმე ქალბატონ ივერს უხეშად დაურღვევია თავისი «ჰომოფობიური» განცხადებით. ჩემთვის პირადად გულის ამრევი იყო ის, რომ ამ განცხადების გამო მას ბოდიში მოახდევინეს. სწორედ რომ მოახდევინეს, თორემ დარწმუნებული ვარ, ის ამას საკუთარი ნებით არ გააკეთებდა; მით უფრო კონფერენციას არ მოაწყობდა ამის გამო და კონცერტის ჩატარებასაც არ დაგეგმავდა ე.წ. უმცირესობების უფლებების დასაცავად. პირდაპირ ვამბობ მათ გასაგონად, ვინც სათავეში უდგას ამ ბნელ და ცოდვით სავსე კასტას: საზოგადოების მოთმინებას აქვს საზღვარი და ერთხელაც იქნება, ერი აფეთქდება. მერე იძახონ, ჩვენი უფლებები ირღვევაო, როცა ხალხი აღდგება…
პირადად ქალბატონ ივერს რაც შეეხება, თუ გავრცელებული ინფორმაცია მართალია და თუ ის მართლა აპირებს ამ ე. წ. სექსუალური უმცირესობების უფლებების დასაცავად კონცერტის ჩატარებას, მე მას მოვუწოდებ თქვენი გაზეთის მეშვეობით, რომ ივერის გვარი გამოიცვალოს. ივერი ასოცირდება ივერიასთან, ერთან, მართლმადიდებლობასთან და მისი განცხადება აბსოლუტურად არ შეესაბამება ამ ყველაფერს.
ახლა რაც შეეხება თქვენს შეკითხვას, _ რას ვაპირებთ და რა მიმართულებებით ვიმუშავებთ: უპირველესი ამოცანა იქნება ეროვნული ცნობიერების გაღვივება. ერთი შეხედვით, ეს შეიძლება ძალიან ზოგადად ისმოდეს, მაგრამ ჩვენ გვაქვს კონკრეტული გეგმა, კონკრეტული სტრატეგია და, როცა დავიწყებთ მოქმედებას, ყველა დაინახავს, რომ ჩვენ არ ვართ მხოლოდ ზეპირ განცხადებებზე და რაღაც მოწოდებებზე ორიენტირებული ორგანიზაცია.
_ რა აზრისაა თქვენი მოძრაობა ასოცირების ხელშეკრულებაზე და საერთოდ ევროინტეგრაციაზე?
_ გააჩნია, რას ვგულისხმობთ ევროინტეგრაციაში, დასავლეთს კარგიც ბევრი აქვს და ცუდიც. თქვენ კონკრეტულ დოკუმენტზე თუ მეკითხებით, ეს დოკუმენტი მე კი არა, მგონი, თვით მის ხელმომწერებსაც არ აქვთ წაკითხული, ამიტომ გადაჭრით ვერაფერს ვიტყვი; თუმცა ერთი რამ ცხადია, თუ ჩვენ ამ ე. წ. ლიბერალური ღირებულებებით მივდივართ ევროპაში, ესე იგი, სულიერებას ვთმობთ და ეს პროცესი ქართველ ერს კარგს არაფერს მოუტანს.
_ როგორ ფიქრობთ, ეს ყველაფერი მიზანმიმართული პოლიტიკაა?
_ ცხადია, ამას რა მიხვედრა უნდა?! აი, მაგალითად, წინა კვირას პარლამენტმა ასოცირების ხელშეკრულების რატიფიცირება რომ მოახდინა, თინა ხიდაშელმა განაცხადა: ხელისუფლებას ძალიან დიდი ძალისხმევა დაჭირდება, რათა საქართველოში დამკვიდრდეს ევროპული ღირებულება და ცხოვრების წესიო. ეს ხომ აბსუდია?! ხიდაშელებს ჰგონიათ, რომ ჩვენ სული არ გვაქვს და, რასაც უნდათ, იმას მოგვახვევენ თავს… რა თქმა უნდა, ეს არის ხელისუფლების მიზანმიმართული პოლიტიკა. ესენი საზოგადოებას ნაცარს აყრიან თვალში…
_ თქვენი აზრით, ბიძინა ივანიშვილი რამდენად მონაწილეობს ამ პროცესში?
_ ივანიშვილი წვრილმან გადაწყვეტილებებში ნამდვილად არ ერევა. ბევრ რამეში ხელისუფლება აბსოლუტურად თავისუფალია, მაგრამ, გლობალურ პოლიტიკას რაც შეეხება, რა თქმა უნდა, აქ ყველაფერს ის მართავს. იგივე ანტიდისკრიმინაციული კანონი რომ ავიღოთ, არავინ უარყოფს, რომ მან მოსთხოვა უმრავლესობას ამ კანონის ერთხმად მიღება. ეს, რაც ჩვენ ვიცით, მაგრამ დარწმუნებული ვარ, ასევე მონაწილეობს იგი სხვა არანაკლებ მნიშვნელოვანი გადაწყვეტილებების მიღებასა და განხორციელებაში; ასე რომ, რა თქმა უნდა, ივანიშვილის გავლენა მთავრობაზე, პარლამენტზე ძალიან დიდია და ხელისუფლების პოლიტიკაშიც სერიოზულ როლს თამაშობს.
_ ანტიდისკრიმინაციული კანონი ახსენეთ, აგერ უკვე მესამე თვე გადის, რაც ეს კანონი მიღებულია და ჯერჯერობით არ გაგვიგია, ვინმეს მიმართ რამე სამართლებრივი დევნა ყოფილიყო. მაინც რას ხედავთ საშიშს ამ საკანონმდებლო ცვლილებაში?
_ მე ჯერ კიდევ მის მიღებამდე ვამბობდი, რომ ეს კანონი არის ბომბი და ის გამოიწვევს სერიოზულ საზოგადოებრივ აფეთქებას. დღესაც ამავე აზრზე ვარ. რაც შეეხება შეკითხვას, კონკრეტულად რას ვხედავ საშიშს, სტატისტიკას რომ გადახედოთ, ყველა იმ ქვეყანაში, რომელშიც დღეს ერთსქესიანთა ქორწინება მიღებულია, 2-3 წლით ადრე ასეთი ცვლილება განხორციელდა, ანუ რის თქმა მინდა: ეს არის ერთგვარი ტრამპლინი, მოსამზადებელი ეტაპი შემდგომში უფრო თამამი ნაბიჯებისთვის და, როცა ამ საფუძველს შეამზადებენ, მერე უკვე ერთსქესიანთა ქორწინებასაც დაგიკანონებენ, აღლუმებსაც ჩაგიტარებენ და ხმას ვერ ამოიღებ.
_ ფიქრობთ, ჩვენი საზოგადოება იმდენად შეიძლება შეცვალოს პროპაგანდამ, რომ ერთსქესიან ქორწინებას და გეიაღლუმს მშვიდად შეხვდება?
მშვიდად შეხვედრა-არშეხვედრაზე არაა ლაპარაკი. აქ საუბარია იმაზე, რომ კანონში ჩაგიწერენ ამ ყველაფერს, ანუ დაგიკანონებენ და, თუ წინააღმდეგი წახვალ, უკვე კანონთან, სახელმწიფოსთან გექნება საქმე. ხვდებით, საით მივდივართ?! ამაშია ზუსტად მთელი უბედურება და ამიტომ ვამბობ, ყველგან, სადაც ამის საშუალება მეძლევა, რომ, სანამ კანონით განისაზღვრება ამ ე. წ. უმცირესობების უფლებები, ვიდრე ოფიციალური სახე მიეცემა ამ მომაკვდინებელ ცოდვას, მანამდეა საჭირო ბრძოლა, თორემ მერე, დამერწმუნეთ, შესაძლებლობაც ბევრად ნაკლები გვექნება და შედეგიც.
_ ბრძოლაში რას გულისხმობთ, რა ბერკეტები აქვს დღეს საზოგადოებას ამ პროცესთან დასაპირისპირებლად?
_ საზოგადოებას ბერკეტი არ სჭირდება, საზოგადოება თვითონაა ბერკეტი და ყველაფერი. ხელისუფლებას ირჩევს ხალხი, ამიტომ ხელისუფლება, რა ორიენტაციისაც უნდა იყოს, ვალდებულია, ხალხის ნებას დაემორჩილოს; თუ არა და პარლამეტსაც, კანცელარიასაც ორი კარი აქვს _ შემოსასვლელი და გასასვლელი.
ახლა ბრძოლაში რას ვგულისხმობ: ვფიქრობ, რომ დღეს ქართველი ხალხი ცოტა მოდუნებულია. ამას შეიძლება გარკვეული მიზეზიც აქვს, მაგრამ არავითარ შემთხვევაში გამართლება არ უნდა მოვუძებნოთ. ნახეთ, რა ხდება ქუჩაში, ტელევიზიებში, საზოგადოებრივი თავშეყრის ადგილებში _ ყოველ ფეხის ნაბიჯზე წააწყდებით ადამიანების აღვირახსნილ მოქმედებას… ეს იეღოველები ხომ მომრავლდნენ და მომრავლდნენ და ახლა კიდევ მეგრულად და სვანურად დაიწყეს თავიანთი ლიტერატურის თარგმნა და გამოცემა. ხელისუფლება რომ გვყავდეს, არ უნდა უთხრას იმ ევროპასაც და ამერიკასაც, რომ ეს არ არის არც დემოკრატია და არც ჭეშმარიტი დასავლური ცივილიზაცია?! აქვე მინდა ვკითხო ამერიკის ელჩს, ბატონ ნორლანდს, რომელიც, როგორც ვიცი, ერთ-ერთი პირველი დამცველია ამ სექტანტების: ბატონო ელჩო, გასაგებია, რომ ეს სექტა დაკანონებულია საქართველოში და არც არავინ ეხება მათ, მაგრამ რატომ მითარგმნიან ისინი ამ თავიანთ ე. წ. რელიგიურ ლიტერატურას კუთხურ ენებზე და რატომ მიღვივებენ სეპარატიზმს?! _ ეს ერთი.
მეორე. 20 ათასიდან 40 ათასამდე იეღოველია უკვე ამ ქვეყანაში და, ბატონო ელჩო, მილიონი რომ გახდებიან, არჩევნები არ ჩავატაროთ საერთოდ?! ჯარი არ გვყავდეს?! აღარ გინდათ: მერე ავღანეთსა და აფრიკაში ნატოს ეგიდით ჩვენი შეიარაღებული ძალები თქვენ გვერდით დადგეს?! რა ხდება, ამაზე ხელისუფლებამ ხმა არ უნდა ამოიღოს, არ უნდა უთხრას ევროპასაც და ამერიკასაც, რომ ჩვენ ასეთ რაღაცებს არ დავუშვებთ?!
_ რაც შეეხება გიგი უგულავას დაპატიმრებას, საზოგადოებაში გაჩნდა მოლოდინი, რომ სამართლიანობის აღდგენა რეალურად დაიწყო. თქვენი აზრით, ხელისუფლება, ამ შემთხვევაში, მართლა დაინტერესებულია დამნაშავეთა დასჯით თუ ეს ყველაფერი პიარზე ან სხვა რამეზე გათვლილი მორიგი ფარსია?
_ არა, ეს არის ბლეფი. უგულავას დაიჭერ, მერაბიშვილს თუ სააკაშვილს, სამართლიანობის აღდგენის ფსიქოლოგიური მომენტი უკვე ხელიდანაა გაშვებული. გარდა ამისა, შენ თუ მართლა გინდა, რომ სამართალი აღადგინო, იმ კაცს რომ ათეულობით და ასობით ადამიანი ჰყავს გაუბედურებული, იმათ დაუბრუნე წართმეული ქონება, ბიზნესები, წილები და მერე დავიჯერებ, რომ რეალურად საქმეზე ფიქრობ. მაგალითად, წარმოიდგინეთ იური ვაზაგაშვილი, კაცმა 300 ათასი ხელმოწერა მოაგროვა ბიძინა ივანიშვილის მოქალაქეობის მოთხოვნით და თეთრი რომ თეთრია, არავისგან მიუღია, ყველაფერი საკუთარი სახსრებით გააკეთა. ახლა როგორ ფიქრობთ, რისთვის გააკეთა ეს ამ კაცმა? _ იმისთვის, რომ მოსულიყო ახალი ხელსუფლება და სამართლიანობა აღედგინა. ამ დროს ახალი ხელისუფლება ისე იქცევა, თითქოს იური ვაზაგაშვილი მარტო თავისი შვილის მკვლელების დასჯისთვის იბრძვის. ეს ხომ დაცინვაა და ადამიანის აბუჩად აგდება?!
დასაწყისშიც აღვნიშნე და კიდევ ერთხელ გავიმეორებ, რომ ვაპირებთ სერიოზულ მუშაობას, ერთი მხრივ, ეროვნული ცნობიერების გასაღრმავებლად და, მეორე მხრივ, იმ ადამიანების დასაცავად, რომელთა უფლებები დღესაც ისე ირღვევა, როგორც წინა ხელისუფლების დროს. უამრავი ასეთი მოქალაქე მოდის ყოველდღე ჩვენს ოფისში და ჩვენც აუცილებლად დავუდგებით მათ გვერდით. არაუგვიანეს 10 სექტემბრისა ერისკაცთა სათათბირო შეიკრიბება და ვიმსჯელებთ, დეტალურად, სად, როდის, როგორ და რა ფორმით წარმოჩინდება ამ მოძრაობის აქტივობა.
_ ე. ი. თქვენი ელექტორატი ძირითადად ის ადამიანები იქნებიან, რომელთაც დღემდე ვერ დაიბრუნეს წართმეული ქონება, ანუ რომელთა მიმართაც სამართლიანობა არ ან ვერ აღდგა?
_ სათათბიროს კარი ყველასთვის ღიაა, ამიტომ ვიტყოდი, რომ ჩვენი ელექტორატი პოტენციურად მთელი საქართველოა. აქ საკითხი ძალიან მარტივად დგას, არ შეიძლება უსასრულოდ გრძელდებოდეს უსამართლობა და ადამიანი იჩაგრებოდეს. საერთოდ, შეურაცხყოფა ისეთი რამაა, თუ ადამიანი არ განიკურნა და გათავისუფლდა ამ შეურაცხყოფის ტვირთისგან, მისგან აუცილებლად მივიღებთ სოციალურ აგრესორს. ჩვენ ეს არ გვინდა და ამისთვის ვიბრძვით. დარწმუნებული ვარ, ეს ბრძოლა შედეგს მალე გამოიღებს…
ესაუბრა ჯაბა ჟვანია
