ჯერემი როზნერის რჩევა გიგა ბოკერიასთვის _ «გადაეცით დავით ბაქრაძეს, თავი დაანებოს მეგრელების სახალხოდ ლანძღვას»!

ამ დღეებში ინტერნეტსაიტებზე გავრცელდა ამერიკელი პოლიტტექნოლოგების სკანდალური ინსტრუქცია «ნაციონალურ მოძრაობის», კერძოდ, მათი რუხი კარდინალის _ გიგა ბოკერიასა და საპრეზიდენტო კანდიდატის _ დავით ბაქრაძისთვის. წერილი წარმოადგენს ამერიკელი პოლიტტექნოლოგების ინსტრუქციას თავიანთი კლიენტის – პარტია «ერთიანი ნაციონალური მოძრაობის» პრეზიდენტობის კანდიდატ დავით ბაქრაძისადმი. ამერიკელი ინსტრუქტორები ცნობილი კომპანიიდან, რომლის სპეციალობაა პიარი და რომლის ოფიციალური კლიენტი გახლავთ საქართველოს პრეზიდენტი მიხეილ სააკაშვილი და პარტია «ერთიანი ნაციონალური მოძრაობა», ჭკუას არიგებენ, თუ როგორ უნდა იმოქმედონ საპრეზიდენტო მარათონის განმავლობაში, რათა გადაუსწრონ მთავარ პრეტენდენტებს. კომპანია Greenberg Quinlan Rosner–ის  ვიცეპრეზიდენტ Jeremi D. Rosner –ის წერილი, რომელიც მან მანამდე, ზუსტად ერთი თვით ადრე _ 2013 წლის 15 სექტემბერს – მისწერა საქართველოს პრეზიდენტთან არსებული ეროვნული უშიშროების საბჭოს მდივან გიგა ბოკერიას. მნიშვნელოვან ამონარიდებს ამ წერილიდან აქვე გთავაზობთ.

«ჩვენ ვერ გვამშვიდებს ბოლო გამოკითხვის შედეგები. უეჭველია, რომ ბურჯანაძე მყარად ინარჩუნებს მეორე პოზიციას და თანდათან უახლოვდება პირველ პოზიციას, თან 10%-იან ჩამორჩენას, რომელიც უკავია მარგველაშვილს. აქედან გამომდინარე, გთავაზობთ, ჩვენმა მეგობრებმა NDI-დან გამოაქვეყნონ კვლევის ისეთი შედეგები, რომლებიც არ დაუშვებს დაეჭვებას:

_ მეორე ტურის პერსპექტივაში;

_ დავითის მეორე ადგილში;

_ ბურჯანაძის პოზიციების სრულ უპერსპექტივობაში.

გარდა ამისა, აუცილებელია მარგველაშვილისა და განსაკუთრებით ბურჯანაძის წინააღმდეგ ნეგატიური კამპანიის მკვეთრი გაძლიერება. ოჯახის წევრების, ცოლების, შვილების, მშობლებისა და ქმრების მაკომპრომეტირებელი მასალების გავრცელებას. ამ მიმართულებით, რამდენიმე გამონაკლისის გარდა, დავითს, კონკურენტებისგან განსხვავებით, ნაკლებად მოწყვლადი სიტუაცია აქვს.

სხვათა შორის, გადაეცით დავითს, თავი დაანებოს მეგრელების სახალხოდ ლანძღვას. ჩემი თანდასწრებით მან ისინი რამდენიმეჯერ მოიხსენია ყველაზე ჩამორჩენილ, თითქმის კანიბალებთან გათანაბრებულ ეთნიკურ ჯგუფად. სასაცილო ისაა, რომ ამ რეგიონში მას ყველაზე მაღალი რეიტიგი აქვს.

გამოკითხვების შედეგების შესწავლის შედეგად მე კიდევ ერთხელ დავრწუნდი, რომ ბურჯანაძის ძირითად სტრატეგიულ რესურსს წარმოადგენს «მეოცნებეებში» იმედგაცრუებული ამომრჩეველი. მე გთავაზობთ, რომ უფრო ნაკლები რესურსი დახარჯოთ მთლიანად «ოცნების» ნეგატიურ კამპანიაზე და ძალისხმევის კონცენტრაცია გააკეთოთ პირადად მარგველაშვილის და, პირველ რიგში, ბურჯანაძის წინააღმდეგ მიმართულ კამპანიაზე. გიორგი, გაითვალისწინეთ, რომ ჩვენი მოკავშირეებია ამომრჩევლების გამოცხადების დაბალი მაჩვენებელი და თქვენი მომხრეების მაქსიმალური მობილიზაცია.

რაც შეეხება ვაშინგტონში მომავალ ვიზიტებს, უკვე მიღწეულია რამდენიმე განსაკუთრებით მნიშვნელოვანი შეთანხმება. რა თქმა უნდა, ამას დიდი შრომა და დრო დასჭირდა, მაგრამ ამის შესახებ ჩვენ დავილაპარაკებთ ევროპაში ჩვენი შეხვედრისას. უაღრესად მნიშვნელოვანია ჩვენი ევროპელი მეგობრების მხარდაჭერის მოპოვება. დამკვირვებელთა ჯგუფის შედგენა უკვე მიმდინარეობს. ჩვენი მოკრძალებული შესაძლებლობებიდან გამომდინარე, შევეცდებით, ორგანიზება გავუკეთოთ საქართველოში დაახლოებით 10 ევროპული მისიის, ასევე აშშ–დან დამკვირვებლების სოლიდური ჯგუფის ჩამოსვლას. ჯერჯერობით ვერ ავიღებ ჩემს თავზე ზუსტი რაოდენობის დასახელებას, მაგრამ ერთი კვირის შემდეგ შევძლებ უფრო კონკრეტული ციფრის დასახელებას.

რაც შეეხება ევროპული მედიის ჩართვას, აქ ჩვენ ვაწყდებით დაუგეგმავ პრობლემებს. ჩვენი ბევრი მეგობარი სხვადასხვა საბაბით უარს ამბობს თანამშრომლობაზე. ჩემი აზრით, ჩვენ გვჭირდება საინფორმაციო სტრატეგიის შეცვლა, იმის გამო, რომ ახალი ხელისუფლების ძალისხმევა თანდათან ცვლის საქართველოს საგარეო პოლიტიკის აღქმის პარადიგმას.

ახლა უკვე ცოტა ვინმეს თუ შეაქვს ეჭვი ახლანდელი მთავრობის პროდასავლურ ორიენტაციაში. მე ინტუიციურად ვგრძნობ, თუმცა ზოგიერთი რამ შეიძლება აღმოვაჩინოთ ბოლო კვლევებშიც,  რომ ხელისუფლების კრიტიკა უნდა გადიოდეს სამოქალაქო უფლებების, ძირითადად, რელიგიური, ეთნიკური და სექსუალური უმცირესობების უფლებების დარღვევის პარადიგმაზე.

ეს თემა იოლად პოულობს მხარდაჭერას ევროპულ და ამერიკულ მედიაში. იფიქრე ამაზე და მომწერე,» _ წერენ ამერიკელი ინსტრუქტორები გიგა ბოკერიას.

საქართველო და მსოფლიო» გთავაზობთ კომენტარებს აღნიშნულთან დაკავშირებით.

ზაურ ნაჭყებია, სააგენტო «ივერიონის» ხელმძღვანელი:

_ ამ «ინსტრუქციაში» უჩვეულო არაფერია _ ამერიკელი პოლიტექნოლოგები შესაძლებლად მიიჩნევენ ქართველი ამომრჩევლის «დაბოლებას» და მათთვის სასურველი კანდიდატის მეორე ადგილზე გათრევას. სხვათა შორის, მათ კარგად აქვთ შესწავლილი ჩვენი ფსიქოლოგია და ზუსტად იციან, როგორ «დაარტყან» ჩვენს ცნობიერებას!

თუ ამ «ინსტრუქციებიდან» გამოვალთ, ივანიშვილმა ბრწყინვალედ შეასრულა ეს დავალება, როცა ღიად დააფიქსირა, რომ დავით ბაქრაძე «ცოტათი უსწრებს» ნინო ბურჯანაძეს. ამ განცხადებით მან ბაქრაძეს მეორე ადგილი უკვე «დაუბევა» და ვადამდელი საპარლამენტო არჩევნების ჩატარების ალბათობაც გამორიცხა. შესრულებულია მესამე ამოცანაც _ «ნინო ბურჯანაძის სრული უპერსპექტივობა».

ძალიან საინტერესოა ისიც, რომ ბაქრაძეს ყველაზე დიდი მხარდაჭერა თურმე საქართველოში «ყველაზე მეტად ჩამორჩენილ», «კანიბალიზმთან» წილნაყარ სამეგრელოში ჰქონია. რამდენადაც ვიცი, იქ სიმპათიები უფრო ბურჯანაძის მხარეს იხრება. არა მგონია, ჩემი მშობლიური კუთხე კიდევ ერთხელ შეცდეს და ხმა «ნაციონალური მოძრაობის» კანდიდატს მისცეს.

ერთი სიტყვით, მათი «ინსტრუქციის» მთავარი პირობა შესრულებულია _ სახეზეა ანტიბურჯანაძისეული ისტერია და იმ «პერსპექტივების» წინა პლანზე წამოწევა, რომელსაც ისინი «ნაციონალების» საპრეზიდენტო კანდიდატს ურჩევენ (პრობლემები რელიგიურ, ეთნიკურ და სექსუალური უმცირესობებთან დაკავშირებით).

ეჭვი მეპარება, რომ, მიუხედავად ასეთი «ინსტრუქციისა», ქართველ ამომრჩეველთა ტვინის გამორეცხვა იმდენად შეძლონ, რომ ბაქრაძე მეორე ადგილზე გავიდეს. ეს მხოლოდ «ქართული ოცნების» «კეთილი ნების» შემთხვევაში იქნება შესაძლებელი, რისი ალბათობაც ძალიან დიდია.

თემურ შაშიაშვილი, პოლიტიკური პარტია «თეთრების» ლიდერი:

_ ბატონი ბიძინა ივანიშვილი, სარგებლობს რა ხალხის კეთილგანწყობით და მიიჩნევს, რომ, რადაც უნდა დაუჯდეს, შეასრულოს დასავლეთის გარკვეული დაჯგუფებების დავალება მარგველაშვილის გაპრეზიდენტების თაობაზე, მიდის დემოკრატიული აზროვნებისა და დემოკრატიულ პრინციპებისთვის აბსოლუტურად მიუღებელზე, როდესაც ამბობს, რომ, თუ მისი პროტეჟე პირველივე ტურში ვერ გიმარჯვებს, მან მეორე ტურში მონაწილეობა არ უნდა მიიღოს. ეს უკვე შანტაჟის გზაა, რაც შეურაცხმყოფელია საქართველოსთვის, საქართველოს მოსახლეობისთვის, ქართული აზროვნებისთვის.

დამაფიქრებელია, რომ ამ ანტიდემოკრატიულ გამოთქმას მყისიერი შეფასება არ მოჰყვა ამერიკაში, საერთოდ, დასავლეთის პოლიტიკურ წრეებში. გავიხსენოთ, როგორი მომენტალური და მკვეთრი შეფასებები მოჰყვა ბიძინა ივანიშვილის გამონათქვამს პრეზიდენტ სააკაშვილის საპრეზიდენტო ვადის 20 იანვარს დასრულებასთან დაკავშირებით. კანონიერ მოთხოვნას დასავლეთის პროტესტი მოჰყვა, უკანონო და ანტიდემოკრატიულ განცხადებას _ ოფიციალური წრეების სრული დუმილი. სწორედ ეს ადასტურებს, რომ მარგველაშვილის გაპრეზიდენტება დიდი შეთქმულებაა საქართველოს წინააღმდეგ.

ამ აზრს გვიძლიერებს ამერიკელი პოლიტტექნოლოგების სკანდალური ინსტრუქცია «ნაციონალურ მოძრაობის» NDI-ის მომავალ კვლევებთან დაკავშირებით. ნახეთ, რა მზაკვრეული რჩევა და ჩანაწერია: «გთავაზობთ, რომ ჩვენმა მეგობრებმა NDI-დან გამოაქვეყნონ კვლევის ისეთი შედეგები, რომლებიც არ დაუშვებს დაეჭვებას: 1. მეორე ტურის პერსპექტივაში; 2. დავით ბაქრაძის მეორე ადგილში; 3. ბურჯანაძის პოზიციების სრულ უპერსპექტივობაში»…

შექმნილი სიტუაცია კიდევ ერთხელ ადასტურებს «თეთრების» პოზიციას, რომ პრეზიდენტი არ უნდა იყოს არჩეული ბიძინა ივანიშვილის კოალიციიდან, მით უფრო _ «ნაციონალების» დამნაშავე პოლიტიკური ორგანიზაციიდან და უნდა დავიწყოთ დიდი სახალხო მოძრაობა საქართველოს გადასარჩენად «ოცნებისა» და «ნაცების» გარეშე. ეს ბიძინა ივანიშვილის მიერ დეკლარირებული მიზნების გადარჩენაც იქნება!

მოამზადა კოტე ჩიკვილაძემ

P.S. ამ წერილის წაკითხვის შემდეგ, სამეგრელოში ალბათ არ მოიძებნება თავმოყვარე ამომრჩეველი, რომელიც ხმას მისცემს მეგრელთმოძულე პრეზიდენტობის კანდიდატს, ვინც ამ კუთხის მკვიდრთ `ყველაზე ჩამორჩენილ, თითქმის კაციჭამიებთან გათანაბრებულ ეთნიკურ ჯგუფად~ მოიხსენიებს.

მსგავს შეურაცხყოფას და დამცირებას თავმოყვარე მეგრელები არავის შეარჩენენ; ეს განცხადება აშკარად არაჯანმრთელი ჰაბიტუსის მქონე ბაქრაძისთვის ნამდვილი განაჩენია – როგორც ჩანს, მას არაქართული გენეტიკა აყეფებს, თორემ წარმოუდგენელია, ადამიანმა, ვისაც იოტისოდენა წარმოდგენა მაინც აქვს საქართველოს ისტორიაზე, ქართველობასა და სამეგრელოზე, მეგრელებზე ასეთი სიძულვილით ისაუბროს. რაც შეეხება ინსტრუქციის ავტორის გაკვირვებას `სასაცილო ისაა, რომ ამ რეგიონში (სამეგრელოში. _ რედ.) მას (ბაქრაძეს. _ რედ.) ყველაზე მაღალი რეიტინგი აქვს~, _ ეს თუ სიმართლეა, მაშინ საქმე არათუ სასაცილო, სამარცხვინო პარადოქსთან გვაქვს. შავი და თეთრი არჩევნებზე გამოჩნდება, თუმცა ეს ცალკე თემაა.