თამაზ წულაია: მაშინ როლანდ ახალაიას ვერ შევებრძოლებოდი, ახლა კი ამის დრო დადგა

სააკაშვილის ხელისუფლებას ყველაზე მძლავრი დასაყრდენი საქართველოს რეგიონებიდან სამეგრელო იყო, სადაც გუბერნატორ ზაზა გოროზიასა და საოლქო პროკურორ როლანდ ახალაიას განუსაზღვრელი უფლებები გააჩნდათ და ხელყოფდნენ მოსახლეობის საკუთრების უფლებას, ამიტომ მოსახლეობა შიშისგან დათრგუნული იყო. ახლა კი ხალხი უსამართლოდ და უკანონოდ წართმეული საკუთრების დაბრუნებას ითხოვს.

სააქციო საზოგადოება «ზუგდიდვაჭრობის»  სამსართულიან უნივერმაღ «ენგურის» გარშემო, დიდი ხანია, დავა და დაპირისპირება მიმდინარეობს უკანონო გასხვისებისა და სამეგრელო-ზემო სვანეთის საოლქო პროკურატურის უკანონო მოქმედებასთან დაკავშირებით. მოგვიანებით გაირკვა, რომ უნივერმაღ «ენგურის» ხელში ჩაგდებით დაინტერესებული ყოფილა საოლქო პროკურორი როლანდ ახალაია.

ამ საქმესთან დაკავშირებით უნივერმაღ «ენგურის» დირექტორმა და აქციათა ერთ-ერთმა ფლობელმა თამაზ წულაიამ საჩივარი შეიტანეს საქართელოს მთავარ პროკურატურაში. «1964 წლიდან ვმუშაობდი ზუგდიდიში ვაჭრობის სისტემაში სხვადასხვა თანამდებობაზე. ვიყავი «ენგურში» სხვადასხვა დროს საქონელმცოდნე, დირექტოის მოადგილე, დირექტორი.  შევძელი, საქართველოში და განსაკუთრებით სამეგრელოში არსებულ მძიმე პერიოდში შემენარჩუნებინა ხსენებული ობიექტი დაუზიანებლად. «ზუგდიდვაჭრობის» სააქციო საზოგადოებად გადაკეთების შემდეგ მე გავხდი აქციათა 17%-ის მფლობელი. როგორც შემდეგ გახდა ცნობილი, სააქციო საზოგადოება «ზუგდიდვაჭორობის» პასუხიმგებელმა პირებმა მოახდინეს ენგურის გასხვისება, რომელშიც მოექცა ჩემი კუთვნილი აქციების წილიც, ჩემთან შეთანხმების გარეშე. იმ პერიოდში ვიმყოფებოდი პატიმრობაში. როგორც შემდგომში გაირკვა, უნივერმაღ «ენგურის» დაუფლებით დაინტერესებული ყოფილა საოლქო პროკურორი როლანდ ახალაია, რომელიც თურმე თავისივე პროკურორის, რ. საჯაიას, მეშვეობით მოლაპარაკებას აწარმოებდა «ზუგდიდვაჭრობის» ხელმძღვანელობასთან. ემუქრებოდნენ და აშინებდნენ მათ, რათა დაეთმოთ ეს ობიექტი და, რაკი ვერ მიაღწიეს სასურველ უკანონო გარიგებას პასუხისგებაში მისცეს და გაასამართლეს ერთ-ერთი ხელმძღვანელი პირი გ. ჯინჯოლავა, რომელსაც დაუსწრებლად მიუსაჯეს 14 წელი.  გაასამართლეს აქციის შემსყიდველი პირები თ. ქანთარია და თ. ცხადაია. მეც და ჩემი შვილებიც მოგონილი და შეთითხნილი ამბებით დაგვაკავეს. მე მომისაჯეს 4-ნახევარი წელი, რათა არ ჩავრთულიყავით ამ დავაში. გთხოვთ ჩატარდეს გამოძიება, დადგინდეს სიმართლე, აღდგენილ იქნეს როგორც ჩემი, ასევე იმ  148 აქციონერის უფლებები, რომლებიც ასევე დაიჩაგრნენ ჩემსავით», _ ნათქვამია თამაზ წულაიას მიერ მთავარ პროკურორ არჩილ კბილაშვილისადმი გაგზავნილ საჩივრის წერილში.

თამაზ წულაიას განმარტებით, გასაკვირია, რომ აქციათა წილის დასაბრუნებლად ყველაზე მეტად აქტიურობს ზუგდიდელი დავით როგავა, რომელსაც არასოდეს არანაირი შეხება არ ჰქონია უნივერმაღ «ენგურთან».  «დავით როგავა იყო «ნაციონალური მოძრაობის» აქტიური წევრი და ახლო ურთიერთობა ჰქონდა ზაზა გოროზიასთან და გასაკუთრებით როლანდ ახალაიასთან. აქედან გამომდინარე,  სწორედ მათი დახმარებით შეეცადა ის, უნივერმაღ «ენგურში» აქციათა წილი მოეპოვებინა, მაშინ, როდესაც უნივერმაღში მას აქციათა წილი არასოდეს ჰქონია, თუმცა არაოფიციალურად რატომღაც ის ფიგურირებს აქციონერთა შორის. შემდგომ დავით როგავა და როლანდ ახალაია, ეტყობა, ვერ მორიგდნენ და გადაეკიდნენ ერთმანეთს», _ აცხადებს თამაზ წულაია.

გავრცელებული ვერსიით, დავით როგავას სურდა, როლანდ ახალაია როგორმე გამოეყენებინა თავისი მიზნის მისაღწევად და დაუფლებოდა აქციათა გარკვეულ წილს, თუმცა კი მოხდა პირიქით _ როლანდ ახალაიამ  დავით როგავა გამოიყენა თავისი სურვილის განსახორციელებლად. ახალაიამ როგავას ხელშეწყობით თ. ქანთარიასა და თ. ცხადაიას დახმარებით უნივერმაღ «ენგურის» აქციონერებს აქციათა წილები წაართვა, გაყარა ისინის სააქციო საზოგადოებიდან, შემდეგ კი მათ როგავაც, ქანთარიაც და ცხადაიაც მიაყოლა და არაოფიციალურად დაეუფლა უნივერმაღ «ენგურს». მეგის ქარდავასთან ერთად მან კეთილმოაწყო შენობის მესამე სართული, დანარჩენი სართულების კეთილმოწყობა კი ვერ მოასწრო, «ქართულმა ოცნებამ» შეუშალა ხელი.

თამაზ წულაიას განცხადებით, მან რამდენიმეჯერ მიუგზავნა დავით როგავას, როგორც თვითმარქვია აქციონერს, ანგარიშგასაწევი პიროვნებები. «ვინ არ მივუგზავნე დავით როგავას, რომ ხელი აეღო ასეთ უკანონო, უსამართლო ქმედებაზე, არ ესარგებლა ჩემი ციხეში ყოფნით, მაგრამ მან არ შეისმინა ჩემი თხოვნა. ახლა ის წილს ითხოვს, წილს, რომელიც არასოდეს ეკუთვნოდა. ყველამ ნახოს, რომ შემწევს ძალა, სამართლიანობა აღვადგინო. მე მაშინ ახალაიას ვერ შევებრძოლებოდი, ახლა კი სწორედ ამის დრო დადგა. მე, როგორც უნივერმაღ «ენგურის» დირექტორი, უნივერმაღს არ დავთმობ, რადგან ეს ჩემი კაცობისა და პრინციპის საქმეა», _ აღნიშნა თამაზ წულაიამ.

ლადო ქირია, ზუგდიდი