ევროკავშირიდან გამოსვლა სრულფასოვანი სავაჭრო შეთანხმების გარეშე დიდ ბრიტანეთს 80 მილიარდი ფუნტი სტერლინგი დაუჯდება, ნათქვამია ქვეყნის მინისტრთა კაბინეტის გასაიდუმლოებულ გაანგარიშებაში, რომელიც The Guardian -ისა და სხვა მედიასაშუალებებს ხელთ ჩაუვარდა.
სამთავრობო ეკონომისტების გათვლით, ბიუჯეტის დეფიციტი მომდევნო 15 წელიწადში 120 მილიარდი ფუნტით გაიზრდება. თუმცა, ისიცაა, რომ “ბრექსიტის” დადებითი ეფექტი, მათ შორის, ევროკავშირის ბიუჯეტში შესატანი თანხის არგადახდა, ქვეყანას 40 მილიარდს დაუზოგავს.
მოხსენებაში აღნიშნულია, რომ ხისტი “ბრექსიტი” დიდი ბრიტანეთის ცალკეულ რაიონებში სამომხმარებლო ფასების 21 პროცენტით გაძვირებას გამოიწვევს. ყველაზე მეტად დაზარალდება ის რეგიონები, რომლებმაც ხმა მისცეს “ბრექსიტს”. ესენია ჩრდილო-აღმოსავლეთისა და დასავლეთ მიდლენდის რაიონები.
