ცხინვალიდან გამოგდებულმა, დამარცხებით შეშფოთებულმა სააკაშვილმა, სატელეფონო საუბარში, რომელიც ტელეეკრანიდან ათიათასობით ქართველმა მაყურებელმა მოისმინა, საყვედურის ტონით მიმართა ბუშს: სად არის შეპირებული დახმარებაო. ამ მრავლისმთქმელი ფრაზით გამოაშკარავდა აშშ–ის ორმაგი სტანდარტის პოლიტიკის არსი: ერთი მხრივ, ბუში აფრთხილებდა სააკაშვილს, _ არ დაეწყო ომი, თორემ დამარცხდებოდა; ხოლო, მეორე მხრივ, აქეზებდა, თუ მაინც დაიწყებდა ომს, _ დაეხმარებოდა.
სააკაშვილი ბუშის მიერ დაგებულ ხაფანგში გაება და, მისი დახმარების იმედით, 8 აგვისტოს შეიჭრა მძინარე ცხინვალში; პირველივე წუთებში დახოცა იქ გაეროსა და ეუთოს ეგიდით მდგარი რუსი სამშვიდობოების ერთი ნაწილი. ამით სააკაშვილი საერთაშორისო დამნაშავედ იქცა; გაეროსა და ეუთოს განგაში უნდა აეტეხათ, მაგრამ ისინი ჯორჯ ბუშმა ჩააჩუმა.
ვლადიმერ პუტინი, იმხანად რუსეთის პრემიერი, სასწრაფოდ დაბრუნდა პეკინიდან, სადაც ოლიმპიადას ესწრებოდა; ბუნებრივია, არ გვაპატია რუსი სამშვიდობოების მკვლელობა, მათი დედების ატირება და გაგვიკეთა ის, რასაც დღეს ყველა ვხედავთ.
ხაზგასმით ვაცხადებ: რუსეთი აგრესორად და ოკუპანტად სააკაშვილმა აქცია. თვით რუსეთიც ეძებდა საბაბს, რომ ჯიბრზე აშშ-ისა, რომელმაც სერბეთისთვის წაგლეჯილი კოსოვო 2008 წლის თებერვალში დამოუკიდებლად გამოაცხადა, ერთბაშად ორი ქართული რეგიონის _ აფხაზეთისა და ცხინვალის _ დამოუკიდებლობა გამოეცხადებინა, რაც 2008 წლის სექტემბერში აღასრულა კიდეც.
ცხინვალის ომით ბუშმა გაიხარა _ კიდევ უფრო გაღრმავდა ქართველთა სიძულვილი რუსეთისადმი. სიბრიყვეა, სასაცილოა იმის გაფიქრებაც კი, რომ საქართველოს ტერიტორიული გამთლიანებისთვის აშშ რუსეთს დაეჯახება.
დასკვნა: ცხინვალის ომის გამჩაღებელი სააკაშვილი სამუდამო პატიმრობას იმსახურებს.
თითქმის 30 წელია, ჩვენი გზააბნეული შვილების წყალობით გეოპოლიტიკური სიბრმავით მოვაბიჯებთ; შედეგად კი ტრაგედიათა სერიალებს ვიმკით.
ყველაზე დიდ ტრაგედიად ქართველთა საცხოვრისი სივრცის 20 პროცენტის დაკარგვა და ჩვენი შვილების სიცოცხლის უნაყოფოდ შეწირვა მიმაჩნია. გამოვფხიზლდეთ!
გივი გურეშიძე,
ისტორიის მეცნიერებათა დოქტორი, პოლიტოლოგი,
ქუთაისი