ამერიკული გამოცემა American Diplomacy–ი საქართველოს ექსპრეზიდენტისა და ოდესის ოლქის გუბერნატორის _ მიხეილ სააკაშვილის შესახებ, ინდიანას (აშშ) უნივერსიტეტის ისტორიის კათედრის პროფესორის _ დიმიტრი შლაპენტოხის ავტორობით ვრცელ მიმოხილვას აქვეყნებს, სადაც სააკაშვილი სამხრეთ ოსეთის სეპარატისტულ რეგიონზე თავდასხმაშია ეჭვმიტანილი. საინფორმაციო სააგენტო “ნიუსპრესი” მიმოხილვიდან ამონარიდს ავრცელებს:
“მიხეილ სააკაშვილის თავდასხმამ 2008 წლის ზაფხულში სეპარატისტულ სამხრეთ ოსეთზე, სადაც რუსეთის სამშვიდობო ძალები იყვნენ განლაგებულნი, სიტუაცია კიდევ უფრო გაამძაფრა და, საბოლოო ჯამში, რუსეთთან ომი გამოიწვია. მიუხედავად იმისა, რომ ამერიკელი ნეოკონსერვატორები თბილისს მხარს უჭერდნენ, საქართველო, ფაქტობრივად, ვაშინგტონის დახმარების გარეშე დარჩა და ომში დამარცხდა (აშშ-ის ინერტულობით). მიხეილ სააკაშვილი შეურაცხყოფილი იყო, რადგან მან წინა წლებში თბილისის ერთ-ერთ ქუჩას ჯორჯ ბუშის სახელი დაარქვა, რომელიც, ალბათ, მსოფლიოში ერთადერთი ქუჩაა ასეთი სახელწოდებით”, _ წერს ავტორი. ავტორის შეფასებით, როცა არჩევნებში მიხეილ სააკაშვილი (და მისი პარტია) დამარცხდა, ახალმა ხელისუფლებამ ყოფილი ხელისუფლების მიერ რეალურად თუ სავარაუდოდ ჩადენილი დანაშაულებრივი მოქმედების გამოძიება დაიწყო. შეიძლება ითქვას, რომ მიხეილ სააკაშვილის ბედი არ იქნებოდა განსხვავებული სხვა პოსტსაბჭოთა ლიდერების პოლიტიკური სიკვდილისაგან, რომ არა უკრაინა.
