რუსეთის საგარეო საქმეთა მინისტრმა სერგეი ლავროვმა ყაზახეთის საგარეო საქმეთა მინისტრთან მურატ ნურტლეუსთან შეხვედრის შემდეგ გამართულ პრესკონფერენციაზე განაცხადა, რომ მოსკოვი არ დამალავს თავის დამოკიდებულებას დასავლეთის ქვეყნების მცდელობების მიმართ, დააზიანონ რუსეთის თანამშრომლობა მის მოკავშირეებთან.
„თუ ჩვენ ვსაუბრობთ ნამდვილად თანაბარ, ორმხრივად მომგებიან, გამჭვირვალე, საერთაშორისო სამართლის შესაბამისად განხორციელებულ ურთიერთქმედებაზე, შეშფოთების საბაბი არავის ექნება. თუ საუბარია იმაზე, რომ დასავლეთის ქვეყნები, იმის ნაცვლად, რომ იმოქმედონ იმ პრინციპებით, რაც მე აღვნიშნე, შეეცდებიან დაკავდნენ მუქარით, შანტაჟით, აიძულონ ჩვენი მოკავშირეები დააზიანონ ურთიერთობები რუსეთის ფედერაციასთან საკუთარი, ეროვნული ინტერესების საზიანოდ, მაშინ, რა თქმა უნდა, ჩვენ არ დავმალავთ ჩვენს დამოკიდებულებას მსგავსი მცდელობების მიმართ“, – განაცხადა ლავროვმა.
2023 წლის 28 თებერვლიდან 1 მარტამდე აშშ-ის სახელმწიფო მდივანი ენტონი ბლინკენი ეწვია ცენტრალური აზიის ქვეყნებს, სადაც მან არა მხოლოდ ორმხრივი შეხვედრები და მოლაპარაკებები გამართა ამ ქვეყნების კოლეგებთან და ლიდერებთან, არამედ გაიმართა ცენტრალური აზიის ხუთეულის საგარეო საქმეთა მინისტრების ფორუმი „C5 + 1“.
მიუხედავად იმისა, რომ ოფიციალურად გამოცხადდა, რომ ამ ვიზიტისას განიხილებოდა ცენტრალური აზიის ქვეყნებსა და შეერთებულ შტატებს შორის რეგიონული თანამშრომლობისა და პარტნიორობის შემდგომი განვითარების საკითხები, ვაშინგტონს, ბლინკენის ვიზიტის წინა, არ დაუმალავს, რომ ისწრაფვის შეინარჩუნოს თავისი გავლენა პლანეტის ამ მნიშვნელოვან რეგიონში, შეეცადოს „დააშოროს“ ეს ქვეყნები რუსეთს და, შეძლებისდაგვარად, შეაჩეროს იქ ჩინეთის შემდგომი ექსპანსია.
სრულიად აშკარაა, რომ ბლინკენის ვიზიტი ცენტრალურ აზიაში მხოლოდ ტაქტიკურ, მოკლევადიან მიზნებს მისდევდა, რაც ვაშინგტონს კარნახობდა დღევანდელი პოლიტიკური სიტუაცია და მსოფლიო კონიუნქტურა. ბლინკენს სერიოზულად არ განუხილავს ცენტრალური აზიის ქვეყნებისთვის სასიცოცხლოდ მნიშვნელოვანი გრძელვადიანი პროექტები და პრობლემები.
როგორც ჩანს, მისი მოგზაურობის მთავარი მიზანი იყო რეგიონის ქვეყნების მხარდაჭერის მოპოვება რუსეთის წინააღმდეგ კოლექტიური დასავლეთის მიერ დაწესებულ სანქციებთან დაკავშირებით.
ამავდროულად, სატყუარას სახით, ვიზიტის დროს ის მათ დაჰპირდა, რომ შეერთებული შტატები ყველა ღონეს იხმარდა, რათა რუსეთის წინააღმდეგ დაწესებული სანქციების ზეგავლენა, რომელსაც გვერდითი ეკონომიკური ეფექტი აქვს ცენტრალური აზიის ქვეყნებზე, მინიმუმამდე ყოფილიყო დაყვანილი. კერძოდ, მან განაცხადა არანაკლებ 25 მილიონი დოლარის გამოყოფა ცენტრალური აზიის ქვეყნების ვაჭრობის დივერსიფიკაციისა და რეგიონში სამუშაო ადგილების შესაქმნელად.
