„ქართული ოცნება -დემოკრატიული საქართველოს“ ახმეტის მერობის კანდიდატი იოსებ ქარუმაშვილი სოფლებში მატანსა და ქისტაურში სხვადასხვა სფეროში მოღვაწე წარმატებულ ადამიანებს შეხვდა. შეხვედრაზე განიხილეს მუნიციპალიტეტის განვითარების პერსპექტივები და ამ პროცესის ხელისშემშლელი ფაქტორები. საკითხები, რომლის მოგვარებასაც მოსახლეობა პირველ ეტაპზე ითხოვს ინფრასტრუქტურას უკავშირდება. მათ შორის: სოფლის შიდა და სოფლის სამეურნეო ნაკვთებთან მისასვლელი გზების მოწესრიგება, სასმელი წყლის დასუფთავებისა და გარე განათების საკითხების მოგვარება..
ქარუმაშვლმა ისაუბრა რეგიონული პოლიტიკის მიმართულებებზე და სახელმწიფო მხარადაჭერაზე, რომელიც უკავშირდება ინფრასტრუქტურის განვითარებას, ბიზნესგარემოს გაუმჯობესებას, ფინანსურ რესურსებზე ხელმისაწვდომობას, ადგილებზე კონკურენტუნარიანი პროდუქციის წარმოების ხელშეწყობას. კანდიდატის განმარტებით, ამ მიმართულებებით მნიშვნელოვანი ნაბიჯებია გადადგმული. ხორციელდება ინფრასტრუქტურული პროექტები, გაზრდილია დაფინანსება სამელიორაციო და საირიგაციო სისტემების განვითარებისათვის, ასევე, სოფლის მეურნეობის პროგრამებისთვის. მნიშვნელოვანადაა გაზრდილი მაღალმთიანი დასახლებების განვითარების ფონდისათვის გათვალისწინებული თანხების და ადგილობრივი თვითმმართველი ერთეულებისათვის გადასაცემი ტრანსფერის მოცულობა. „მთავარია მოსახლეობის უფრო მეტი აქტივობა. ჩვენ ყველაზე უკეთ ვიცით რა გვჭირდება და რა შეგვიძლია. ამიტომ აუცილებელია გამოვიყენოთ ყველა შესაძლებლობა, რომ მივიღოთ სასურველი შედეგი-უკეთესი ცხოვრების პირობები“- განაცხადა იოსებ ქარუმაშვილმა.
