რესპუბლიკური პარტიის ფორმატში გადანაცვლებამ დავით უსუფაშვილის საქმიანობის ხარისხი მნიშვნელოვნად შეამცირა, _ განაცხადა ფრაქცია “ქართული ოცნება _ დემოკრატიული საქართველოს” თავმჯდომარემ გია ვოლსკიმ. დეპუტატის შეფასებით, რესპუბლიკელების წინასაარჩევნო განცხადებები ქვეყნის ინტერესებს მნიშვნელოვნად სცილდება.
“რასაკვირველია, რომ არა უმრავლესობის მხარდაჭერა, უსუფაშვილი ვერ იქნებოდა პარლამენტის თავმჯდომარე და გული მწყდება, რომ იგი ამ უმრავლესობის მხარდაჭერის იგნორირებით გამოდის რესპუბლიკური პარტიის პლატფორმიდან, იქცა ოპონენტად ბევრ საკითხზე.
მას ჯერ კიდევ მართებს პარლამენტის თავმჯდომარის პოზიციის დაკავება, რომელსაც კარგად ასრულებდა, თუმცა რესპუბლიკური პარტიის ფორმატში გადანაცვლებამ მისი დიაპაზონი, საქმიანობის ხარისხი მნიშვნელოვნად შეამცირა. რესპუბლიკური პარტიის პოზიციები ბევრ საკითხზე, მით უმეტეს, წინასაარჩევნო პერიოდში, არცთუ საფუძვლიან კომენტარებსა და განცხადებებზე არის დაყრდნობილი და მნიშვნელოვნად სცილდება იმ ინტერესებს, რომლებიც დღეს საქართველოს აქვს”, _ განაცხადა ვოლსკიმ.
