მთავარი საზოგადოება მამა გურამი (გამცემლიძე): როცა ქვეყანას, ტრადიციებს, ფასეულობებს, ეროვნულ თვითმყოფადობას გადაგვარების საფრთხისგან იცავ,...

მამა გურამი (გამცემლიძე): როცა ქვეყანას, ტრადიციებს, ფასეულობებს, ეროვნულ თვითმყოფადობას გადაგვარების საფრთხისგან იცავ, ეს ძალადობა არ არის!

“პირიქითაა _ ისინი არიან მოძალადეები. ისინი მოდიან და გვაძალებენ, რომ მაინცდამაინც “ასე” უნდა ვიცხოვროთ, თორემ ჩვენ არ მივდივართ არავისთან და არ ვაძალებთ არაფერს”

108
გააზიარეთ

5 ივლისს რუსთაველის გამზირზე გეიაღლუმის ვერჩატარებით გამოწვეულ საყოველთაო ლიბერალურ ისტერიკას, რომელიც, მიუხედავად ყველაფრისა, ინტერნეტსივრცეს ვერ გასცდა და, როგორც ყოველთვის, შეშფოთებად დარჩა, მოგვიანებით გეი მემორანდუმზე ხელისმომწერი 15 ლგბტ პარტია და დასავლეთის ელჩობაც ერთხმად შეუერთდნენ.

მედიითა თუ სოციალური ქსელებით არაერთი განცხადება და კომენტარი გავრცელდა, რომ თურმე აღლუმის ჩაშლით ქართულმა დემოკრატიამ სერიოზული დარტყმა მიიღო, “ცივილიზებულმა სამყარომ” კი, რომლისკენაც ქვეყანა ისწრაფვის _ დასავლური ფასეულობების დასაცავად საჭირო მოქმედებების დასაწყებად კიდევ ერთი მკაფიო სიგნალი. იყო შეფასებები, რომ ხელისუფლებამ ძალადობა წააქეზა, რომ ამით დასავლური ლიბერალური კურსისადმი ერთგულებას საფრთხე შეექმნა და ა.შ. თუმცა განსაკუთრებით მკაცრი და კატეგორიული თავის შეშფოთებაში, ისევ ამერიკის შეერთებული შტატების საელჩო იყო, რომელმაც განვითარებულ მოვლენებს ქართული “ტოლერანტული სტუმართმოყვარეობისთვის” შეუფერებელი და ქვეყანაში კანონის უზენაესობისთვის საფრთხისშემცველი ქმედებები უწოდა…

რას ნიშნავდა საქართველოსთვის, როგორც ტრადიციული ფასეულობების მატარებელი, მართლმადიდებელი სახელმწიფოსთვის 5 ივლისის აქცია, რომელმაც გეიაღლუმი ჩაშალა და რატომ შეშფოთდნენ ამ ფაქტით ყველაზე მეტად უცხოელი ელჩები, ამ და სხვა მნიშვნელოვან საკითხებზე გვესაუბრება დიღმის სამი მღვდელმთავრის ტაძრის წინამძღვარი, დეკანოზი გურამი (გამცემლიძე).

_ მამაო, 5 ივლისს სრულიად საქართველო, დედაქალაქის რუსთაველის გამზირზე გამოვიდა. მრავალათასიანმა აქციამ, რომელიც თამამად შეიძლება ითქვას, ნამდვილი სახალხო პროტესტი იყო, გეიაღლუმი ჩაშალა. როგორ შეაფასებთ ამ ფაქტს და იმ განცხადებებს, რომელიც აქციის ფონზე და შემდეგაც დასავლელმა ელჩებმა გაავრცელეს. მათ, მოგეხსენებათ, დაგმეს პრაიდის ჩაშლა.

_ ჩვენ ახალს არაფერს ვამბობთ და ისეთი არაფერი გაგვიკეთებია, რასაც აქამდე არ ვაკეთებდით. ქრისტიანები, ქართველები ვიცავდით ზნეობას, რომელიც მართლმადიდებლობის ფუნდამენტია და რომლის დასაცავად ყოველთვის გამოვალთ. თუ ადამიანი ზნეობრივად ჯანსაღია, მისთვის ეს ასახსნელი არ არის და უზნეო ადამიანი კიდევ ქრისტიანი ვერასოდეს ვერ იქნება. რაც შეეხება პოლიტიკურ რეაქციებს იმაზე, რაც მოხდა, მიგვაჩნია, რომ გარყვნილებას და, საერთოდ, ყველაფერს, რაც საზოგადოებას დეგრადაციისკენ უბიძგებს, უნდა დაერქვას თავის სახელი. გამომდინარე აქედან, როგორ შეაფასებენ ამას ესა თუ ის პოლიტიკოსები, მათ შორის უცხოელი ელჩები და დიპლომატები, გადამწყვეტი მნიშვნელობის არ მგონია. გნებავთ, გამოხატვის თავისუფლება დაარქვან, გნებავთ _ დემოკრატია, გარყვნილება არის გარყვნილება. ქრისტიანობაში ცოდვას ცოდვა ქვია, სიკეთეს _ სიკეთე, ბოროტებას _ ბოროტება და ა.შ. აი, ეს არის სიმართლე, ასე რომ, ის, რაც 5 ივლისს მოხდა, ნიშნავს ერთადერთ რამეს: ეს ნიშნავს, რომ ქართველ კაცს, ნამდვილ მართლმადიდებელს სურს, იცხოვროს ზნეობრივად. ჩვენ არავის არ ვჩაგვრავთ და, საერთოდ, ყოველგვარი ჩაგვრის წინააღმდეგი ვართ, მაგრამ არც იმის უფლებას მივცემთ ვინმეს, რომ გამოვიდეს და უზნეობა იქადაგოს. მამათმავლობის ზეიმზე საუბარიც ზედმეტია

_ ჩაგვრა და ძალადობა ახსენეთ, ფსევდოლიბერალური პროპაგანდა წლებია, საზოგადოებას თავს ახვევს იმ აზრს, რომ თურმე ნებისმიერი სახის მოქმედება, რომელიც მიმართულია ეროვნული იდენტობის დაცვისა და მასზე შეტევების მოგერიებისკენ, უკვე ძალადობაა. გამოდის, საზოგადოებამ არ უნდა გაუწიოს არანაირი წინააღმდეგობა, როცა მისთვის აბსოლუტურად მიუღებელ დღის წესრიგს ამყარებს გარედან მართული მარგინალური უმცირესობაროგორ ფიქრობთ, ძალადობაა, როცა ეკლესიაზე შეტევებს აპროტესტებს საზოგადოება, ან მამათმავლობის ნორმად გამოცხადებას, ან იუვენალურ დიქტატურას და ..?

_ ლოზუნგით “არა ძალადობას” თავიანთ თავსვე ეწინააღმდეგებიან. იმიტომ, რომ უწინარესად, თვითონ არიან მოძალადეები, როცა მოსახლეობის უმრავლესობას მისთვის მიუღებელ იდეოლოგიას გვახვევენ თავს და გვეუბნებიან, მოგწონთ თუ არ მოგწონთ, გინდათ თუ არა, გარყვნილების აღლუმი უნდა ჩავატაროთო… ძალადობა ნამდვილად არის დღეს საქართველოში, მაგრამ არა იმ ხალხზე, რომელიც ჩაგრულად აცხადებს თავს, არა, ძალადობაა უმრავლესობაზე. კანონები მიიღება უმრავლესობის ნების საწინააღმდეგოდ, ეკლესიას ებრძვიან, მედიის უდიდესი ნაწილი მათია, საელჩოები, უცხოეთიდან დაფინანსებული .. არასამთავრობოები მხარს უჭერენვინ არის ძალადობის მხვერპლი, ისინი? თუ ჩვენ, ქართველი ხალხი, რომელსაც საკუთარ ქვეყანაში არაფერს არ გვეკითხებიან?!

რაც შეეხება იმას, რომ თურმე ჩვენ, ეროვნულად მოაზროვნე ადამიანებმა ხელი არ უნდა გავანძრიოთ და ჩუმად უნდა ვიყოთ, როცა მარგინალური უმცირესობა თავზე გვამხობს ყველაფერს, მე ასე ვიცი და მჯერა, რომ ძალადობა არ არის, როცა შენს ქვეყანას, ტრადიციებს, ფასეულობებს, იდენტობას და ეროვნულ თვიდმყოფადობას ფიზიკური საფრთხისგან იცავ. ძალადობა არ არის, როცა სიმართლეს და ღვთის მცნებებს ემსახურები. პირიქითაა, ისინი არიან მოძალადეები. ისინი მოდიან და გვახვევენ თავს, რომ მაინცდამაინც “ასე” უნდა ვიცხოვროთ, თორემ ჩვენ არ მივდივართ არავისთან და არ ვაძალებთ არაფერს…

_ მათ ძალადობად მიაჩნიათ ისიც, თუ, მაგალითად, ბავშვი ტრადიციულ ოჯახში იზრდება და ასწავლიან, რომ ქრისტიანია

_ ამ ლოგიკითაც თავიანთ თავს ეწინააღმდეგებიან და ამაში ჩანს ფსევდოლიბერალიზმის ორმაგი სტანდარტიც _ თვითონ არ უტოვებენ ბავშვებს არჩევანის უფლებას, როცა ასწავლიან, რომ, მაგალითად, მამათმავლობა ნორმაა, ან სქესი თუ გენდერი, თურმე, არჩევითია. აი, ამ სიბინძურეებით ადამიანის მოწამლვაა ძალადობა, თორემ ქრისტიანობა არავის არაფერს არ აძალებს. არის შემთხვევები, როცა ადამიანი მართლმადიდებლურად გაიზარდა, მაგრამ თვითონ არ აირჩია მერე ეს გზა და აღარ ცხოვრობს ეკლესიურად. ადრეც ვთქვი და კიდევ გავიმეორებ, თავისუფლება ისაა, როცა საკუთარ თავს ფლობ და არა ის, რომ ყველას ჰქონდეს უფლება, საკუთარი ავადმყოფური, არაჯანსაღი მისწრაფებებისა თუ მიდრეკილებების დემონსტრირება მოახდინოს. ჩემთვის ეს არაა თავისუფლება. ჩემთვის ეს არის გარყვნილება, რომელიც ყოვლად მიუღებელია.

_ ხუთი ივლისის აქციაზე ერთი სიმბოლური ფაქტი მოხდა _ ჩამოხსნეს ევროკავშირის დროშა პარლამენტის წინ, მის ნაცვლად აღმართეს ქართული დროშა და წმინდა ნინოს ჯვარი. რა დატვირთვა ჰქონდა ამ ყველაფერს?

_ მოკლედ ვიტყვი, ევროპის და ჭეშმარიტი ევროპული კულტურის საწინააღმდეგო არაფერი არ მაქვს, პირიქით, ძალიან დიდ პატივს ვცემ, მაგრამ ის, რასაც თავს გვახვევენ ელჩები, თანაც ბოლო პერიოდში კატეგორიული ტონით, ჩემთვის მიუღებელია. ვერ ჩავთვლი მეგობრად და კეთილისმსურველად იმ ადამიანს, რომელიც ჩემს კულტურასთან აბსოლუტურად შეუსაბამო რამეს მაძალებს და მემუქრება, თუ არ მიიღებ ამას, მაშინ მხარში აღარ ამოგიდგებიო… ასეთი მოკავშირეობის არ მჯერა. ამიტომ გარყვნილებას ვერავისგან მივიღებთ, ვერც ამერიკის ელჩისგან და ვერც სხვა ვინმესგან. რაც შეეხება კონკრეტულად დროშის ჩამოხსნას, სიმბოლური იყო თუ არ იყო ეს და ისევ ჩამოკიდებენ თუ არა იმ დროშას იმავე ადგილზე, ჩემთვის არსებითი მნიშვნელობა არ აქვს. ჩემთვის მთავარია, რომ ხალხი გამოვიდა და საჯაროდ უთხრა უარი გარყვნილებას, უზნეობის პროპაგანდას, რომელსაც მთელი ე.წ. ცივილიზებული სამყარო დემოკრატიის სახელით გვახვევს და გვეუბნება, რომ ეს არის პროგრესი. ეს არ არის არანაირი პროგრესი, ეს არის რეგრესი და სრული დეგრადაცია

_ ელჩები რადგან ახსენეთ, ისინი და მათ შორის განსაკუთრებით ამერიკის შეერთებული შტატების ელჩი უკიდურესად შეშფოთებულები იყვნენ მომხდარით. ზოგმა დიპლომატმა პრემიერმინისტრს გადადგომისკენაც მოუწოდა. რას ეტყვით მათ?

_ ელჩებს ვეტყვი ერთადერთ რამეს: უცხო ქვეყნის შიგა საქმეებში არ ჩაერიონ და არ უკარნახონ არავის არაფერი! ელჩის მოვალეობაა, მოაგვაროს ქვეყნებს შორის ურთიერთობა, მათ შორის სავაჭრო, ეკონომიკური, პოლიტიკური თავისთავად და .. რაც შეეხება იმას, როგორ უნდა იყოს საზოგადოება მოწყობილი და რა უნდა იყოს ამ საზოგადოებაში მისაღები თუ მიუღებელი, ეს მაგათი საქმე არ არის. ეს ჩვენი გადასაწყვეტია და როგორმე ჩვენ მივხედავთ, ამიტომ მათგან ჭკუის სწავლებას ვერ მივიღებ. მიხედონ თავიანთ საქმეს. ნუ ცდიან ქართველი ხალხის მოთმინებას. ისე, ასეთი ერთგული მეგობრები თუ არიან ჩვენი და ჩვენს კეთილდღეობაზე ზრუნავენ, საზღვარგარეთ შავ მუშებად წასულ ჩვენს გასაცოდავებულ მოქალაქეებს მიხედონ. მიხედონ იმ ხალხს, რომელიც გერმანიაში წაიყვანეს, ვითომ დაგასაქმებთო და ახლა ფულს არ აძლევენ

_ ბოლოს ისევ პრაიდზე შეგეკითხებით: გეიაღლუმი მართალია, ვერ შედგა და ეს, ასეც იქნებოდა, მაგრამ ისინი გაჩერებას არ აპირებენ. პირიქით, სოციალურ ქსელებში აქტიურად წერენ, რომ .. ღირსების მარში, ადრე თუ გვიან, მაინც გაიმართება. როგორ ფიქრობთ, საპატრიარქო მომავალშიც იქნება და უნდა იყოს თუ არა საზოგადოების დარაზმვის ავანგარდში, თუ ცხადია, ამის აუცილებლობა დადგება?

_ საპატრიარქო ვერავის ვერ მოუწოდებს, იმიტომ, რომ საპატრიარქო ერის სულიერი დამცველია. ეს ერთი და მეორე _ არ მგონია, დღეს ვინმეს რამე მოწოდება სჭირდება, პირიქით, ჩვენ, საერთოდ, ხმა რომ არ ამოგვეღო, 5-ში ხალხი მაინც გამოვიდოდა. როცა საზოგადოებაში არის უკმაყოფილება და ეს უკმაყოფილება მზარდია, შეუძლებელია, მან არ ამოხეთქოს. ეს ვერ გააცნობიერეს გარყვნილების პროპაგანდისტებმა და ამას ვერ ხვდებიან. რაც შეეხება იმას, რომ პრაიდი, ადრე თუ გვიან, მაინც ჩაატარებს აღლუმს, სასულიერო პირის მოვალეობაა, დაიცვას ზნეობრიობა. ვინც ამას არ აკეთებს, ის სასულიერო პირი არ არის… თუ იქნება აღლუმის მცდელობა, რა თქმა უნდა, ისევ გამოვალთ, სხვანაირად ვერც წარმომიდგენია.

ესაუბრა ჯაბა ჟვანია

გააზიარეთ

დატოვეთ კომენტარი

Please enter your comment!
Please enter your name here