ნატო-ს ჯარებს შეუძლიათ უშუალო მონაწილეობა მიიღონ უკრაინის კონფლიქტში, – განაცხადა ნატო-ს ყოფილმა გენერალურმა მდივანმა ანდერს ფოგ რასმუსენმა Guardian-თან ინტერვიუში.
მანამდე ორგანიზაციის ამჟამინდელმა ხელმძღვანელმა იენს სტოლტენბერგმა განაცხადა, რომ ვილნიუსის სამიტზე უკრაინის უსაფრთხოების საკითხი პირველ ადგილზე იქნება, თუმცა სრული გარანტიები მხოლოდ ბლოკის სრულუფლებიან წევრებს ეძლევათ.
„ნატოს ქვეყნების ჯგუფმა შეიძლება მოისურვოს ჯარების გაგზავნა უკრაინაში, თუ წევრი ქვეყნები, მათ შორის შეერთებული შტატები, არ მიიღებენ კიევსთვის უსაფრთხოების რეალურ გარანტიებს ვილნიუსში გამართულ ალიანსის სამიტზე“, – ივარაუდა რასმუსენმა.
მან ასევე დაამატა, რომ თუ უკრაინა „ვილნიუსში ვერაფერს მიიღებს“, მაშინ ბალტიისპირეთის ქვეყნებსა და პოლონეთს შეუძლიათ შეკრიბონ „მსურველთა კოალიცია“, რათა გაგზავნონ ჯარები კიევის დასახმარებლად.
გასული წლის სექტემბერში კიევმა სამხედრო ბლოკში გაწევრიანება დაჩქარებული წესით მოითხოვა. როგორც მოგვიანებით შეერთებული შტატების პრეზიდენტის თანაშემწემ ეროვნული უსაფრთხოების საკითხებში ჯეკ სალივანმა აღნიშნა, ასეთი პროცედურის ჩატარება უადგილოა.
ამავდროულად, უკრაინის საგარეო საქმეთა მინისტრმა დიმიტრი კულებამ აღნიშნა, რომ კიევი ვერ იქნება კმაყოფილი 11-12 ივლისს ვილნიუსში დაგეგმილი ბლოკის სამიტზე მიღებული რაიმე სხვა გადაწყვეტილებით, გარდა მასში გაწევრიანების შეთავაზებით.
როგორც კრემლის პრესსპიკერმა დიმიტრი პესკოვმა აღნიშნა, მოსკოვი ყურადღებით აკვირდება სიტუაციას და ახსოვს, რომ სპეცოპერაციის დაწყების ერთ-ერთი მიზეზი სწორედ მეზობელი რესპუბლიკის ჩრდილოატლანტიკურ ალიანსში გაწევრიანება იყო.
