შეერთებული შტატები იაპონიისგან ითხოვს ნებართვას, განათავსოს LRHW ზებგერითი და Tomahawk-ის ფრთოსანი რაკეტები ჩინეთის ქმედებების საპირისპიროდ. ამის შესახებ გაზეთი Sankei იტყობინება წყაროებზე დაყრდნობით. იანვრის ბოლოს, სხვა იაპონურმა გამოცემამ გაავრცელა ინფორმაცია, რომ შეერთებულმა შტატებმა უარი თქვა ამ გეგმაზე.
მისი თქმით, იაპონიის ტერიტორიაზე რაკეტების განლაგება განიხილება, როგორც კუნძულების ეგრეთ წოდებულ პირველ ჯაჭვზე ასეთი იარაღის განლაგების სტრატეგიის ერთ-ერთი ელემენტი, რომელიც ბლოკავს ჩინეთის წვდომას წყნარ ოკეანეში. გაზეთის ცნობით, შეერთებულმა შტატებმა იაპონიასთან ამ საკითხზე მუშაობა სამი-ოთხი წლის წინ დაიწყო, ტოკიო კი დადებითად არის განწყობილი და სურს დათანხმდეს რაკეტების განთავსებას.
თუმცა, ეს თემა, გაზეთის ცნობით, არ წამოჭრილა იაპონიის პრემიერ მინისტრ ფუმიო კიშიდასა და აშშ-ის პრეზიდენტ ჯო ბაიდენის შეხვედრისას, ასევე არც იანვარში, საგარეო პოლიტიკისა და თავდაცვის დეპარტამენტების ხელმძღვანელების 2+2 ფორმატში გამართულ კონსულტაციებზე.
საშუალო და მოკლე რადიუსის მქონე რაკეტების ლიკვიდაციის შესახებ ხელშეკრულების თანახმად, შეერთებულ შტატებს არ გააჩნდა სახმელეთო რაკეტები 500-დან 5500 კმ-მდე, მაშინ როცა ჩინეთს აქვს ათასზე მეტი ასეთი რაკეტა, – წერს გაზეთი. 2019 წელს ხელშეკრულებით ნაკისრი ვალდებულებების შეჩერების შემდეგ, ვაშინგტონი ცდილობს რაც შეიძლება სწრაფად განავითაროს საშუალო რადიუსის რაკეტები, კერძოდ ზებგერითი რაკეტები, რათა განალაგოს ისინი უკვე მიმდინარე წელს.
გაზეთ Sankei-ს ცნობით, ეს არის LRHW რაკეტები და Tomahawk-ის დაახლოებით 100 რაკეტა. ამასთან, არ არის მითითებული, რამდენი მათგანის განთავსებას აპირებს აშშ იაპონიაში. არც ადგილმდებარეობის შესახებ არის მიღებული გადაწყვეტილება, თუმცა, სამთავრობო წყარომ აღნიშნა, რომ ერთ-ერთ კანდიდატად განიხილება კუნძული კიუსიუ.
ჯერ კიდევ ორი კვირის წინ იაპონური გამოცემა Yomiuri, წყაროებზე დაყრდნობით, იტყობინებოდა, რომ შეერთებულმა შტატებმა, პირიქით, უარი თქვა იაპონიაში საშუალო რადიუსის რაკეტების განლაგების გეგმებზე, რადგან ჩინეთის შესაკავებლად საკმარისად მიიჩნია ტოკიოს განზრახვა გაზარდოს საკუთარი კონტრშეტევითი პოტენციალი Tomahawk-ის ფრთოსანი რაკეტების განლაგებით და არსებული Type 12 რაკეტების დიაპაზონის ზრდით. რამდენიმე დღის შემდეგ პენტაგონის სპიკერმა საბრინა სინგმა უარყო ეს ინფორმაცია, მაგრამ დეტალებზე არ უსაუბრია.
