ისრაელის ყოფილმა პრემიერ-მინისტრმა ნაფტალი ბენეტმა განაცხადა, რომ უკრაინაში კონფლიქტის შესაძლო მშვიდობიანი დარეგულირება სწორედ დასავლელმა ლიდერებმა ჩაშალეს. ამის შესახებ მან ინტერვიუში განაცხადა.
მისი თქმით, მან შეძლო რუსეთის პრეზიდენტ ვლადიმერ პუტინთან შეთანხმება დათმობებზე და ცეცხლის შეწყვეტაზე. ამის შემდეგ ბენეტი გერმანიაში გაემგზავრა, სადაც დასავლელ ლიდერებთან შეეცადა შეთანხმების მიღწევას.
„იქ ჩვენ ამერიკელები, მაკრონი და ბორის ჯონსონი ჩავაყენეთ საქმის კურსში. ყველა ლიდერს თავისი მიდგომა აქვს. შეგიძლიათ ლიდერები დაყოთ ორ კატეგორიად – ისინი, ვინც ამბობს „ჩვენ უნდა ვიბრძოლოთ პუტინის წინააღმდეგ“ და ისინი, ვინც ამბობს „ნებისმიერ ომში არიან დამარცხებულები“, – განაცხადა ბენეტმა საუბრისას.
მისი თქმით, ბრიტანეთის პრემიერ-მინისტრმა ბორის ჯონსონმა ყველაზე რადიკალური პოზიცია დაიკავა, როდესაც საფრანგეთის პრეზიდენტმა ემანუელ მაკრონმა და გერმანიის კანცლერმა ოლაფ შოლცმა უფრო პრაგმატული პოზიცია შესთავაზეს. თეთრი სახლის ხელმძღვანელი ჯო ბაიდენი ორივე მიდგომით კმაყოფილი იყო.
ბენეტმა აღნიშნა, რომ შედეგად, დასავლეთმა უარი თქვა შემდგომ მოლაპარაკებებზე. ისრაელის ყოფილი პრემიერი მიიჩნევს, რომ ეს შეცდომა იყო, რადგან დიდი იყო შეთანხმების მიღწევის ალბათობა.
ახლახანს, რუსეთის პრეზიდენტმა ვლადიმერ პუტინმა მოლაპარაკებები გამართა აფრიკის ლიდერებთან უკრაინაში კონფლიქტის თაობაზე. შეხვედრა სანქტ-პეტერბურგში კონსტანტინოვსკის სასახლეში გაიმართა.
