თითქმის 20 ქვეყანას სურს BRICS-ში გაწევრიანება, – განაცხადა რუსეთის საგარეო საქმეთა მინისტრის მოადგილემ სერგეი რიაბკოვმა. მისი თქმით, ეს ასახავს ასოციაციის მზარდ როლს მსოფლიო ასპარეზზე.
“ასოციაციაში გაწევრიანების მსურველთა სია კვლავ იზრდება. ამ ასოციაციაში გაწევრიანებით დაინტერესებული სახელმწიფოების რაოდენობა ორ ათეულს უახლოვდება. ეს არის BRICS-ის მზარდი და უკვე ძალიან მნიშვნელოვანი, როგორც თანამოაზრეთა ასოციაციის, როლის ასახვა საერთაშორისო არენაზე”, – განაცხადა მან TASS-თან საუბარში.
დიპლომატმა აღნიშნა, რომ BRICS-ის დღის წესრიგი კოლეგიურად ყალიბდება კონსენსუსის მიღწევის შემდეგ და არა “ლიდერ-მიმდევრის” პრინციპის მიხედვით. მისივე თქმით, ამის დასტურია ამ ფორმატში პრაქტიკული მუშაობა და „მიღებული ერთობლივი დოკუმენტების მნიშვნელოვანი რაოდენობა“.
რიაბკოვმა აღნიშნა, რომ ამჟამად განიხილება BRICS-ში ახალი სახელმწიფოების მიღების კრიტერიუმები, ამ თემაზე სიღრმისეული დისკუსია უკვე გაიმართა წევრი ქვეყნების საგარეო საქმეთა მინისტრების შეხვედრაზე, როგორც “ხუთეულის” ფორმატში, ასევე “ხუთეულს” პლუს BRICS-ის ე.წ. მეგობრების ფორმატით კეიპტაუნში. თუმცა, საბოლოო ჯამში, BRICS-ის გაფართოება არის პოლიტიკური გადაწყვეტილება, როგორც ერთ დროს მოხდა სამხრეთ აფრიკასთან დაკავშირებით.
„ვფიქრობ, რომ ძლიერ კანდიდატებს, რომლებიც არცთუ ისე ცოტაა, ასევე შეუძლიათ მიმართონ ამ გამოცდილებას და თავად იწინასწარმეტყველონ, რა შეიძლება მოხდეს და რა არა“, – დასძინა მან.
რიაბკოვმა აღნიშნა, რომ არაბული სამყაროს და აზია-წყნარი ოკეანის რეგიონის ქვეყნები ითხოვენ BRICS-ში გაწევრიანებას ასოციაციაში ამ რეგიონების არყოფნის გამო.
შეგახსენებთ, რომ BRICS-ში გაწევრიანების სურვილი არაერთმა ქვეყანამ გამოთქვა. ასე მაგალითად, ეგვიპტემ განაცხადი უკვე შეიტანა, ადრე კი ვენესუელამ, ჰონდურასმა, საუდის არაბეთმა და ტუნისმა გამოთქვეს სურვილი.
