“ისტორიულმა მეგობარმა” თურქეთმა პომპეზურად აღნიშნა “ქართველი ოკუპანტებისგან” ართვინის გათავისუფლება

2021 წელს ვადა გასდის ყარსის ხელშეკრულებას და ამის გათვალისწინებით კიდევ უფრო ნათლად ჩანს თურქეთის ფინანსურ–ეკონომიკური და იდეოლოგიური ექსპანსია.

საქართველოს ხელისუფლების წარმომადგენლები კი ისე არიან შეპყრობილნი ვასალის სინდრომით დასავლელი პატრონების მიმართ, რომ ისტორიის ფალსიფიკაციას არ ერიდებიან და თუთიყუშივით იმეორებენ სააკაშვილის მიერ წლების წინათ ნათქვამს, რომ თურმე “თურქეთი საქართველოს ისტორიული მეგობარია”. ეს 2017 წელს გაიმეორა პრემიერმა გიორგი კვირიკაშვილმა, ცოტა ხნის წინათ კი _ საქართველოს დაზვერვის ხელმძღვანელმა დავით სუჯაშვილმა, რომელმაც პარლამენტის კომიტეტის დახურულ სხდომაზე განაცხადა: “რუსეთი, რომელმაც საქართველოს ტერიტორიების ოკუპირება მოახდინა, მტერია; თურქეთი კი _ საქართველოს მთავარი მოკავშირე”. და ეს თქვა, იმის მიუხედავად, რომ აჭარა სწორედ რუსეთმა შემოუერთა დედასაქართველოს, ხოლო ართვინის, არტაანისა და ოლთისის ოლქები, ტაო–კლარჯეთი _ სულ 12 ათასი კვ.მ ტერიტორია, დღესაც მიტაცებული აქვს თურქეთს.

რამდენიმე დღის წინათ კი, 7 მარტს, თურქეთში, ართვინის ილში (პროვინცია) მდებარე დასახლებულ პუნქტ ბორჩხაში თურქებმა “ქართველი ოკუპანტებისგან” გათავისუფლების 97-ე წლისთავი აღნიშნეს. 97 წლის წინათ, 1921 წლის მარტის დასაწყისში, ქემალისტების მოთხოვნით, საქართველოს არმიის ნაწილებმა ართვინი დატოვეს. ამ მოვლენის აღსანიშნავად ართვინის მუნიციპალიტეტში სპეციალური სხდომაც გაიმართა საღამოს ქუჩებში საზეიმო მსვლელობაც მოეწყო _ ჩირაღდნებითა და თურქეთის დროშებით. ღონისძიებებში ართვინის მერი, მუნიციპალიტეტისა და თურქეთის გენშტაბის წევრებიც მონაწილეობდნენ. უფლებადამცველი ნიკოლოზ მჟავანაძის თქმით, “მიტინგზე გამოსვლისას ართვინის მერმა მეჰმედ კოჯატეპესმა განაცხადა: “დუშმანების (ქართველების) განდევნაში თურქმა ხალხმა უდიდესი ვაჟკაცობა და პატრიოტიზმი გამოამჟღავნა, დუშმანების (ქართველების) დამარცხებაში ჩვენ დიდი სისხლიც დავღვარეთ და თურქეთი არასდროს დაივიწყებს თავისი გმირი წინაპრების სახელს”.

თურქეთის ხელისუფლების მაღალჩინოსნებმა შარშან მოითხოვეს, რომ 1121 წლის 12 აგვისტოს დიდგორის ველზე უბრწყინვალესი გამარჯვების აღსანიშნავი დღე არ დაგვეწესებინა, დღეს კი “საქართველოს ისტორიულმა მეგობარმა” თურქეთმა პომპეზურად აღნიშნა “ქართველი ოკუპანტებისგან” ართვინის გათავისუფლება.