სააგენტო “როიტერის” ინფორმაციით, აშშ–ის უპილოტო თვითმფრინავის შეტევამ 15 ავღანელის სიცოცხლე შეიწირა. ინციდენტი მოხდა ავღანეთის აღმოსავლეთ ნაწილში, პროვინცია ნანგარჰარში.
ამერიკის დაზვერვამ მიიღო ცნობა ერთ-ერთ რაიონში “ისლამური სახელმწიფოს” მებრძოლების ყოფნის შესახებ და ტერორისტების თავშეყრის სავარაუდო ადგილზე უპილოტო საფრენი აპარატები გაუშვა.
დარტყმის შედეგად მართლაც მოკვდა რამდენიმე “ბოევიკი”, მაგრამ მსხვერპლი სამოქალაქო პირთა შორის უფრო მეტია _ დაიღუპა 15 მოქალაქე, 13 _ დაიჭრა. გაერო დამოუკიდებელი გამოძიების ჩატარებას აპირებს.
“გაეროს მისია ავღანეთში შეახსენებს ვალდებულებებს კონფლიქტში ჩართულ ყველა მხარეს, დაიცვან თავიანთი უფლებები საერთაშორისო ჰუმანიტარული სამართლის მიხედვით”, _ ნათქვამია გაეროს განცხადებაში.
აღსანიშნავია, რომ რამდენიმე კვირის წინათ ამერიკის ავიაციამ დაარტყა ავღანელი პოლიციელების პოზიციებს, დაიღუპა 8 სამართალდამცველი.
ამას გარდა, დასავლეთის კოალიციამ შეუტია “ისლამურ სახელმწიფოსთან” მებრძოლი სირიის სამთავრობო ჯარების პოზიციებს ქალაქ დეირ-ეზ-ზორთან. ავიადარტყმების შედეგად დაიღუპა 62 სირიელი სამხედრო მოსამსახურე, დაახლოებით 100 ადამიანი კი დაიჭრა. აშშ-ის საჰაერო შეტევის დასრულებისთანავე “ისლამურმა სახელმწიფომ” სახმელეთო ოპერაცია დაიწყო.
