“უახლოეს მომავალში ნატოს გაფართოების შანსი არ არსებობს, რადგან არის საშიშროება, რომ ეს რუსეთის დესტაბილიზაციას გამოიწვევს”. როგორც სააგენტო “როიტერი” იუწყება, ეს ნატოში აშშ–ის მუდმივმა წარმომადგენელმა დუგლას ლიუტმა ლონდონში უსაფრთხოების ფორუმზე განაცხადა.
“მე ვერ ვხედავ ბევრ შესაძლებლობას ნატოს შემდგომი გაფართოებისთვის უახლოეს მომავალში, უახლოეს რამდენიმე წელიწადში ან, შესაძლოა, უფრო მეტ ხანსაც კი”, _ განაცხადა ლიუტმა. მისი აზრით, სტრატეგიული ვითარება ჯერჯერობით არ იძლევა იმის საშუალებას, რომ ნატო გაფართოვდეს. ჩრდილოატლანტიკური ალიანსის კარი კვლავ ღია რჩება ახალი წევრებისთვის, მაგრამ მათ მისაღებად ნატოს 28-ვე წევრი ქვეყნის თანხმობაა საჭირო, რაც ამჟამად მოსალოდნელი არ არის.
“არ არის არანაირი გზა, რომ უახლოეს მომავალში მივაღწიოთ კონსენსუსს საქართველოს ან უკრაინის მიღების საკითხზე”, _ განაცხადა დუგლას ლიუტმა.
