სხალთის ეპარქიის ეპისკოპოსმა, მეუფე სპირიდონმა ინტერნეტში გამოქვეყნებული ერთ–ერთი ქარველი მაღალჩინოსნის პირადი ცხოვრების ამსახველ კადრებზე პრეზიდენტ მარგველაშვილის გამოხმაურება ასე შეაფასა:
“ერთ-ერთი დიდი ყოფილი თანამდებობის პირისთვის რაღაც მრუშობის კადრები გადაუღიათ და ეს გავრცელდა სოციალურ ქსელში. როგორც ჩანს, ბევრმა ხალხმა ნახა და ამაზე გაკეთდა შეფასებები. ღმერთმა მიუტევოს იმ ადამიანს, რომელმაც ეს მრუშობა ჩაიდინა, და მან დიდი სინანული უნდა აჩვენოს იმიტომ, რომ ღვთის წინაშე არ არის კარი არასდროს დაკეტილი, მან აუცილებლად უნდა შეინანოს, რომ ღმერთმა ის ცოდვა აპატიოს, იმიტომ, რომ წერია: “ქორწილი არის წმიდა და საწოლი შეუგინებელი”. ოჯახის ღალატი _ ეს არის უმძიმესი ცოდვა, რომელზეც ძალიან მძიმე ეპიტემიას იყენებს ეკლესია და კაცის კვლას უთანაბრებს. რა თქმა უნდა, ამ დედაკაცმა ეს უნდა შეინანოს, ღმერთმა მიუტევოს მას ეს და მისცეს სინანული, რომ ეს შეინანოს. მაგრამ როგორ შეფასდა ეს ყველაფერი? სამწუხაროდ, მასმედიაში ხელისუფლების წევრის გამოსვლაში, ზოგიერთი პარლამენტარის გამოსვლაში სრულიად მოულოდნელი შეფასებები იყო, ისეთი, რომ კიდევ უფრო დიდი შიში დანერგა ჩვენში. დავინახეთ, რომ ჩვენი ერი გაცილებით მძიმედ არის ცოდვებში ჩაძირული… სახელმწიფოს მეთაური გამოდის ტელევიზორში და ამ ფაქტს ასეთ შეფასებას აძლევს: იცით რაო, რა არის ამაში ცუდი, მე ძალიან მდიდარი სექსი მქონდა, მაქვს და მექნებაო. არაფრით არ არის ეს სახელმწიფოს მეთაურის ლაპარაკი. როგორ შეიძლება, ეს შეადარო დავით აღმაშენებლის, ჩვენი მამულიშვილების ლაპარაკს? ეს არის საროსკიპოს, ანუ ბორდელის მენეჯერის, სუტენიორის ლაპარაკი და მისი ტერმინოლოგია. ასეთ საშინელ და უბედურ დღეში ვართ ჩვენ, ასეთ ადამიანებს დღეს სახელმწიფოში თანამდებობები უჭირავთ. თუ ჩვენ, სამღვდელოება, ხმას არ ამოვიღებთ და არ დავგმობთ ამ საშინელებას, პირველ რიგში, ჩვენ მოგვკითხავს უფალი. ხალხი უნდა გავაფრთხილოთ, რომ არ მოუსმინონ ასეთ სიბილწეს. გინდა პარლამენტარი იყოს, გინდა _ სახელმწიფოს მეთაური, ჩვენ რადგან მოგვცა ღმერთმა საშუალება, თვითონ ავირჩიოთ, ვინც გვინდა, და, თუ არ იქნება ისეთი ჩვენი ხელისუფლება, როგორიც ღმერთს მოსწონს, პირველ რიგში, ჩვენ დავისჯებით _ ქართველი ხალხი, იმიტომ, რომ ჩვენ ავირჩიეთ ის. ეს უნდა გვახსოვდეს ყოველთვის, ამიტომ ფრთხილად იყავით. როდესაც არჩევნები იქნება, არაფრის დიდებით არ მიუშვათ ხელისუფლებაში ის ხალხი, რომელიც ასეთი აზროვნებისაა, ზნედაცემული და გარყვნილია, თორემ გახსოვდეთ, პირველ რიგში, ღვთის წინაშე ერს მოეკითხება. კაცი, რომელიც ოჯახს ღალატობს, დედაკაცი, რომელიც ოჯახს ღალატობს, ორ შაურად გაყიდის თავის ქვეყანას. თავისი ოჯახი არ უყვარს და ქვეყანას შეიყვარებს?! სინანული კი არა, ტრაბახობს, ამაშია მთელი უბედურება. და სხვასაც მოუწოდებს, ასეთები იყავითო. უბედური! გარყვნილი! მაგრამ ჩვენ იმედი გვაქვს, რომ ასე არ გაგრძელდება დიდხანს. დედა-ღვთისმშობელი ამას არ გააგრძელებინებს ასე… ამათ ეს მოსწონთ, მათში არის ცოდვა და ასიამოვნებენ ოკეანის გაღმელ თავის მეგობრებს, დამფინანსებლებს და გრანტის მომცემებს”.
