რა მოხდა ჭაბუა ამირეჯიბის ორმოცზე- რისთვის დასჭირდა ივანიშვილს პატრიარქის გაკრიტიკება?

ყოფილი პრემიერმინისტრის, ბიძინა ივანიშვილის, მიერ არასამთავრობო ორგანიზაცია «მოქალაქის» პრეზენტაცია-პრესკონფერენციაზე საქართველოს პატრიარქის არცთუ სახარბიელოდ მოხსენიებამ ქართველ საზოგადოებაში დიდი ვნებათაღელვა გამოიწვია. ამ და სხვა საკითხებზე გვესაუბრება პოეტი ვაჟა ოთარაშვილი:  

_ ბატონო ვაჟა, ბიძინა ივანიშვილის განცხადებამ, ეკლესიაც საჭიროებს კრიტიკას და პატრიარქსაც შეიძლება შეეშალოსო, საზოგადოების დიდი გაღიზიანება გამოიწვია. თქვენი აზრით, რატომ თქვა ეს?

_ ბიძინა ივანიშვილისგან ეს სიტყვები პირველად არ მომისმენია. არ ვაპირებდი ამის გამხელას არც ერთი გაზეთისა და ტელევიზიისთვის, რადგან ეს ამბავი ჩვენი უდიდესი კლასიკოსი მწერლის, ჭაბუა ამირეჯიბის, ორმოცზე მოხდა, მაგრამ ახლა თავს ვეღარ ვიკავებ და თქვენი გაზეთის ფურცლებზე ვამბობ პირველად, რომ ეს სიტყვები ბიძინა ივანიშვილმა სწორედ ჭაბუას ორმოცზე განაცხადა. როდესაც ლაშა თაბუკაშვილმა პატრიარქი ადღეგრძელა და მზეგრძელობა უსურვა ქართულ ეკლესიას, სწორედ მაშინ თქვა ივანიშვილმა ის, რაც შემდეგ პრესკონფენციაზეც გაიმეორა.

_ კონკრეტულად რა თქვა?

_ რომ პატრიარქიც კაცია, უამრავი ნაკლი აქვს, რომ პატრიარქს ნუ ვაფეტიშებთ და ა. შ. როდესაც ეს ამბავი ოჯახში მოვყევი, არ დამიჯერეს.

_ სუფრის წევრებმა არ გააპროტესტეთ, ივანიშვილს არაფერი უთხარით?

_ მე პროტესტი გამოვხატე აღნიშნულთან დაკავშირებით… საზოგადოებაც გაოცებული, განაწყენებული და უაღრესად გულნატკენი დარჩა… მას შემდეგ ჩემთვის ბევრი რამ ცხადი გახდა… არავის აქვს ჩვენი უწმინდესის, 80 წელს გადაცილებული სპეტაკი, ბრძენი მოხუცის გაკრიტიკების უფლება. ჩვენს პატრიარქს აქვს უდიდესი ავტორიტეტი, იგი მთელი ქართველი ერის სულიერი მწყემსი და ჭეშმარიტი მოძღვარია. ბატონ ბიძინას ურჩევნია გამინისტრებული და გაპარლამენტარებული უგემოვნო პოლიტიკური გვამები გააკრიტიკოს, რომლებიც, წელიწად-ნახევარია, ხელისუფლებაში არიან და ქვეყნისთვის კარგი არაფერი გაუკეთებიათ.

_ მაინც რისთვის დასჭირდა ივანიშვილს პატრიარქის გაკრიტიკება?

_ სოროსელები, კმარელები, «თავისუფლების ინსტიტუტი», «რუსთავი 2»-ის მიერ «გაპიარებული» «ტელებიჭუნები» და, აგრეთვე, ამჟამინდელ პარლამენტში მოკალათებული პოლიტიკური გვამები მასონური ძალების დავალებას კარგად ვეღარ ასრულებენ, რადგან ქართველ ხალხში ავტორიტეტი აღარ აქვთ. გიგა ბოკერიას, ბერძენიშვილების, თუთბერიძეების, ბუღაძეების, კიკაბიძეებისა და კორძაიების პირით პატრიარქის გინება ქართველი ერისთვის მიუღებელი და ყავლგასულია. ამიტომ ამერიკიდან ეს დავალება სხვა, გაცილებით ძლიერ ფიგურას მისცეს, რომელსაც მათთან შედარებით მეტი ავტორიტეტი აქვს, გავიხსენოთ რაფიელ ერისთავის უკვდავი სიტყვები: «როგორც უფალი, სამშობლოც ერთია ქვეყანაზედა». თავმდაბლობაა სიკეთის სათავე, ღმერთი ჩვენთვის, კაცთათვის, დამდაბლდა. ჩვენც დავმდაბლდეთ საქართველოსთვის, ჩვენი წინაპართა სისხლით მორწყული მამულისთვის. დავმდაბლდეთ ქართველობის გადასარჩენად…

სამშობლოს გადარჩენა კი პატრიარქის გინებით, ეკლესიის შეურაცხყოფით, სასულიერო პირთა გასამართლებით არ ხდება. ბატონ ბიძინა ივანიშვილს პატივისცემით ვურჩევ, კარგად გაეცნოს ჩვენი დიდი მეფის, დავით აღმაშენებლის, ცხოვრებას და წაიკითხოს «გალობანი სინანულისანი». როდესაც დიდი დავითი იწყებს თავისი ცოდვების ჩამოთვლას, ამბობს: «ესენი ვსცოდე სახარებასა, სჯულთა და მცნებათა შინა… ზარი მეფობისაი წარხდეს და დიდებაი დაშრტეს, შვებანი უქმ იქმნენ, ყვავილოვნებაი დაჭნეს, სხვამან მიიღოს სკიპტრაი, სხვასა შეუდგენ სპანი, მაშინ შემიწყალე, მსაჯულო ჩემო». ყველა სკამი და ჩინ-მედალი წარმავალია. ნაძირალა, ნაპრეზიდენტალი სააკაშვილიც იფიცებდა აღმაშენებლის საფლავზე, სამების ტაძარშიც ხშირად გვინახავს ამბიონზე ავარდნილი, მაგრამ… ეკლესიაში შესვლა, ეკლესიისთვის დახმარების გაწევა და აშენება არ ნიშნავს, რომ ეკლესიური ცხოვრებით ცხოვრობ და ერის დამოძღვრის უფლება გაქვს! ვისაც სულიერი ცხოვრებისა არაფერი გაეგება, ის ამ სიტყვებსაც ვერ გაიგებს და ვისურვებდი, რომ საქართველოს ჰყავდეს ქრისტიანი, სულიერებით სავსე ხელისუფლება და არა სხვადასხვა პატრონის ანტიქართული, ანტიეროვნული მოძღვრებებით გაჟღენთილი!

ხშირად ვფიქრობ, რამ გამოიწვია ბიძინა ივანიშვილის გაღიზიანება პატრიარქისადმი, ალბათ, _ პატრიარქის საშობაო ეპისტოლემ. მოგეხსენებათ, პატრიარქის საშობაო ეპისტოლეს გამოქვეყნების შემდეგ, საპატრიარქოსთან მივარდა ურწმუნოთა ჯგუფი, რომლებსაც სული ეშმაკისთვის აქვთ მიყიდული. იუდას ვერცხლი ყოველთვის 30 როდია! ხან ასი დოლარია და ხანაც _ სამი მილიონი. დღეს ქართველი ერის ყოფნა-არ ყოფნაზეა საუბარი და, თუ არ გესმის, როდესაც პატრიარქი გვეუბნება, რომ სუროგატი დედების, ხელოვნურად განაყოფიერების, ქალის ქალთან და კაცის კაცთან ქორწინების გზა ღვთიური არ არის, ეს რა საკამათოა. შენ აირჩიე გზა ღვთისკენ ან ეშმაკისკენ. პატრიარქი ხომ არ გიკრძალავს ამას? ჩვენი სულიერი მამა უფლისკენ სავალ გზას გვიჩვენებს, ღვთიური კანონებით გვირჩევს ცხოვრებას. ვისაც არ მოსწონს ეს გზა, იცხოვროს ადამიანის მიერ შექმნილი არასწორი კანონებით, არაბუნებრივად, იქორწინონ მამაკაცებმა ერთმანეთზე, ასევე ქალებმაც; აღარ გამრავლდნენ ბუნებრივად, გაამრალონ სუროგატი დედები და მხოლოდ სინჯარაში მოხდეს განაყოფიერება. არ შემიძლია, არ ვახსენო, რომ სწორედ ივანიშვილის მოყვანილი პარლამენტარები გვიქადაგებენ საქართველოს რეგიონულ _ ტერიტორიულ მოწყობას, რეგიონული დაყოფის პრინციპს, რომელიც საქართველოს დაშლის დასაწყისი იქნება.

დაანგრიეს მწერალთა კავშირი, მოსპეს ენის პალატა და გაანადგურეს ყველაფერი, რაც ქართული სულიერების საძირკველს წარმოადგენდა. დარჩა მართლმადიდებელი ეკლესია და ქართული ოჯახი. დღეს იმასაც ამტკიცებენ, რომ ქართული ოჯახი არ არის აუცილებელი და მისაღებია, რომ კაცმა კაცი მოიყვანოს ცოლად და ქალი ქალზე გათხოვდეს. ვინც ამ სიბინძურის აგიტაციას ეწევით, თქვენს ოჯახში არ გამოილიოს ქალის ქალზე და კაცის კაცზე დაქორწინება! ოთხი შვილის მამა ვარ და ამისგან საქართველო ღმერთმა დაიფაროს. არც ასეთი ამერიკა მინდა და არც ასეთი ევროპა. თუ საქართველო არ იქნება ერთიანი და არ დაგვიბრუნდება აფხაზეთი და სამაჩაბლო, არც ნატო მინდა, არც ევროკავშირი და არც ევრაზიის კავშირი. ეპისკოპოსი გაბრიელ ქიქოძე ბრძანებდა: «საქართველო ნეიტრალური სახელმწიფო უნდა იყოსო!». იქნებ გაგვეხსენებინა გამორჩეული ღვთისმოსავის ეს მოწოდებაც. მე ვარ ქართველი და საქართველოში საქართველოს ვეძებ. ჩვენ უდიდესი კულტურის მქონე ერი ვართ. გავიხსენოთ შალვა ნუცუბიძის გენიალური აღმოჩენა, რომელიც შემდეგ დიდმა ავსტრიელმა მეცნიერმა ერნესტ ჰონიგმანმაც დაადასტურა, რომ ევროპული რენესანსი სათავეს იღებს ივერიიდან, რომელიც ღვთისმშობლის წილხვედრია. ბატონო ბიძინა, ილია ჭავჭავაძის სიტყვებს უფრო ჩაუღრმავდით. ილია ამბობს, ქრისტიანობა და ქართველობა არა მხოლოდ აზიაში, არამედ მსოფლიოში სინონიმურ ტერმინებად ითვლებოდაო. ასე რომ, ქართველი ერი ვერსადროს შეეგუება ეკლესიისა და პატრიარქის კონტროლს. თითის ქნევას და ლანძღვა-გინებას. ყველას ცუდად წაუვიდა საქმე, ვინც ქართულ ეკლესიას დაუპირისპირდა. სხვათა შორის, 22 წლის ილია ჭავჭავაძეს უკვე შექმნილი ჰქონდა თავის უკვდავი ლექსი «მამაო ჩვენო…» რაც მის მაღალ ქრისტიანულ მრწამსზე მეტყველებს. ილიას თავისი ერის ბედი აწუხებდა უპირველესად და არა ავლა-დიდება…

დღეს, ბეჭდური მედიის გარდა, არ არსებობს, ქართული ორიენტაციის  საინფორმაციო საშუალება. საუბედუროდ, ჩვენი ტელევიზიები ტელემეძავებით არის სავსე, რომლებიც ეროვნულობას ებრძვიან და ხალხისთვის ტვინების გამორეცხვას ცდილობენ, ტელეზომბირების ამაზრზენი საშუალებებით მუშაობენ მოსახლების გამოთაყვანებაზე, სოდომ-გომორული ცოდვის შემოტანაზე, ყალბი ღირებულებების ე. წ. პიარზე…

_ ბიძინა ივანიშვილის პირველ წერილი, რომელიც 2011 წლის შემოდგომაზე გამოქვეყნდა, ეროვნული სულისკვეთებით იყო გაჟღენთილი, რასაც მის ბოლოდროინდელ განცხადებებზე ვერ ვიტყვით…

_ პიარკამპანიები, რომელთაც არჩევნების წინ ატარებენ პოლიტიკური ძალები, საქართველოს მტრების, ანუ, როგორც გოგლა ლეონიძე იტყოდა, ქართველთყლაპიების შტაბებშია დამუშავებული. იციან, რომ ქართველი კაცისთვის ძალიან სათუთი და ფაქიზია ეროვნულ სიმებზე შეხება, ამიტომაც წინასაარჩევნო პერიოდი ყოველთვის დატვირთულია ფარისევლური ეროვნული შტრიხებით. ფარისევლობა უმძიმესი ცოდვაა. ბიძინა ივანიშვილს პირველ ღია წერილში პატრიარქი და ეკლესია ასე რომ გაეკრიტიკებინა, ქართული მედიისთვის, რომელმაც მას შეუსრულებელი დაპირებები შეახსენა, თითი დაექნია და ჭკუა ესწავლებინა, მოიყვანდნენ ხელისუფლებაში?

მეც გავახსენებ მის დაპირებებს: საწვავი გაიაფდება, საწარმოები ამუშავდება, ხელფასები და პენსიები გაიზრდება, ქართველი გლეხის შრომას და მოწეულს ფასი დაედება, ჯანდაცვა იქნება უფასო, სამართლიანობა აღდგება, დამნაშავენი დაისჯებიან და ა. შ. ბატონო ბიძინა, იქნებ გადაიცვათ გლახუნას ფორმა და თქვენ მიერ მოწონებულ მინისტრებთან ერთად გახვიდეთ ხალხში! ქართველი ხალხი ღვთის ანაბარაა მიტოვებული და ახლა თითსაც უქნევთ, რომ ღვთის გზაზე არ იაროს?

ასე არ შეიძლება! საკითხავია, რა ასპექტში დაეტყო ქვეყანას წინსვლა? ბედნიერია გლეხობა, პედაგოგები, ექიმები, მეცნიერები და ა.შ.? რატომ არ აღადგინეს კვლევითი ინსტიტუტები, რომლებიც სააკაშვილმა ჩალის ფასად გაყიდა? რით ვერ მოახერხეთ დავით აღმაშენებლის ძეგლის დაბრუნება თავის ადგილზე? გვითხარით, რომელი პროფესიის ადამიანია ბედნიერი? _ არც ერთი! ბედნიერები არიან მხოლოდ თქვენი პარლამენტარები, მინისტრები 5 და 7-ათასლარიანი ხელფასებით, 27-ათასლარიანი ქეიფებით და ა. შ. გაიხსენეთ, თქვენი დეპუტატები და მთავრობის წევრები პარლამენტში შესვლამდე როგორ გამოიყურებოდნენ და ახლა როგორები არიან _ ღაბაბი და თავ-ყბა კადრში რომ აღარ ეტევათ! ალბათ, გინახავთ ნაგვის ყუთებთან მდგარი ხალხი ანდა ჩვენი ბანკებისგან გამწარებული უსახლკაროდ დარჩენილი ქართული ოჯახები; ქართველი ბაზრებიდან გამოძევებული გლეხობა და გენმოდიფიცირებული და შხამქიმიკატებით გაჯერებული უცხოური პროდუქტით გატენილი ბაზრები…

_ გამოსავალს თუ ხედავთ?

_ უნდა ჩატარდეს ვადამდელი საპარლამენტო არჩევნები რაც შეიძლება სწრაფად! უნდა დადგინდეს საარჩევნო სიები და კანონმდებლობა. ჩვენ ველოდით, რომ საქართველო ეროვნული და ჭეშმარიტად დემოკრატიული ღირებულების მქონე ქვეყანა გახდებოდა, მაგრამ «საოცნებო» ფაშიზმის კონტურები გამოიკვეთა. ხალხი შიმშილობს, ერი სულს ღაფავს, დემოგრაფიულ პრობლემებზე აღარაფერს ვამბობ. რუის-ურბნისის საეკლესიო კრება რომ ჩაატარო, დავით აღმაშენებლის დონის საერო და სასულიერო პირი უნდა იყო. მოსაძებნია გზა ერის და ბერის გასაერთიანებელი. ხალხმა უნდა აირჩიოს ისეთი მთავრობა, რომლის უპირველესი ნიშანი იქნება მართლმადიდებლური ცნობიერება. ასეთი ცნობიერებისა კი დღევანდელ ხელისუფლებაში არავინ მეგულება.

ქართველისთვის დემოკრატია მართლმადიდებლური აზროვნებაა.  ამიტომ საჭიროა, ქვეყანაში გაჩნდეს ახალი ძალა ეროვნულად მოაზროვნე ადამიანებისა, რომლებიც ქართულ ეკლესიასთან ერთად გადაარჩენენ საქართველოს. დღეს ერის ყოფნა-არ ყოფნაზეა საუბარი. ღმერთის იმედადღა ვართ დარჩენილნი. არადა, ნამდვილად მეგონა, რომ ბიძინა ივანიშვილის სახით ქვეყნის სათავეში მოდიოდა ეროვნული ცნობიერების პიროვნება, რომელმაც თავის დროზე ბევრი კარგი საქმე გაუკეთა საქართველოს; მეგონა, რომ ეროვნული ცნობიერების გადასარჩენად მოდიოდა, მაგრამ დღეს ამ ყველაფერში ეჭვი მეპარება.

დასკვნის სახით დავსძენ; რამდენჯერაც ქართველმა ხალხმა პატრიარქის მოწოდება არ შეისმინა, იმდენჯერ სავალალო შედეგებამდე მივედით. ჩემო ქართველებო, დავუგდოთ ყური ჩვენს სულიერ მწყემსს და ვიაროთ ერთად ღვთისკენ! მივენდოთ უფალს… და არა პოლიტიკოსთა მოწოდებებს. გავუფრთხილდეთ ქართულ ენას _ ქართული საგალობლებივით ღვთიურად ტკბილხმოვანს, ღვთიურად სრულყოფილს. «ყოველი საიდუმლო ამა ენასა შინა დამარხულ არს!», ნუ განვიკითხავთ ჩვენს პატრიარქს ამა ენითა…

ესაუბრა ნინო მაისურაძე