GEWORLD.GE:
«ახალმა მემარჯვენეებმა» პარტიაში განხორციელებული ცვლილებების შესახებ ოფიციალურად განაცხადეს. როგორ აისახება ფერის, ლოგოსა და გარეგნული დიზაინის ცვლილება პარტიის საქმიანობაზე, რა გზა განვლეს და როგორია მათი სამომავლო გეგმები, «საქართველო და მსოფლიოს» ესაუბრება «ახალი მემარჯვენეების» ერთ-ერთი ლიდერი მამუკა კაციტაძე.
_ ათი წელია, რაც «ახალი მემარჯვენეები» პოლიტიკურ ასპარეზზე გამოჩნდა. კმაყოფილი ხართ ათი წლის მანძილზე მიღწეული წარმატებებით?
_ იყო როგორც წარმატება, ასევე წარუმატებლობა, ამიტომ, ერთმნიშვნელოვანი შეფასება გამიჭირდება. როგორც წესი, პიროვნებისა თუ ორგანიზაციის შეფასებას ისტორია ახდენს და მაშინ, როდესაც ორგანიზაცია აქტიურად აგრძელებს პოლიტიკურ საქმიანობას, რაიმე ვერდიქტის გამოტანა რთული იქნება.
დაგროვილი გამოცდილების საფუძველზე, გავაანალიზეთ რა განვლილი გზა, ქართული პოლიტიკა, გადავწყვიტეთ, მომავალ საპარლამენტო არჩევნებში, რომელიც უაღრესად მნიშვნელოვანი იქნება ქართული პოლიტიკისთვის, დამოუკიდებლად მივიღოთ მონაწილეობა.
_ თქვენი პარტიის რეიტინგი, რომელიც ბოლო წლებში საკმაოდ დაბალია, გაძლევთ იმის საშუალებას, რომ წარმატებას დამოუკიდებლად მიაღწიოთ?
_ რეიტინგი მხოლოდ ბოლო წლების შედეგებით არ იზომება. თუ რეიტინგზე ვსაუბრობთ, მაშინ წინა წლების რეიტინგიც უნდა გავიხსენოთ. «ახალმა მემარჯვენეებმა» 2002 წლის არჩევნებში საკმაოდ მაღალი შედეგი აჩვენა. ასეა თუ ისე, ის კარგი რეიტინგიც ჩვენი დამსახურება იყო და ის უარყოფითიც ჩვენი რეალობა გახლავთ.
_ მაგრამ მთავარი ხომ ისაა, რა რეიტინგი გაქვთ დღეს, ამ ეტაპისთვის, როდესაც სერიოზულ წამოწყებებს გეგმავთ?
_ არა, მთავარი ის კი არაა, რა რეიტინგი გვაქვს, მთავარია, რა პოტენციალია დღეს ჩვენში. თუ «ახალმა მემარჯვენეებმა» 8-9 წლის წინათ, მართალია, განსხვავებულ პოლიტიკურ ვითარებაში, მაგრამ მაინც შევძელით, მაღალი რეიტინგი გვქონოდა, რატომ არ შეიძლება ანალოგიური შევძლოთ დღესაც? მესმის, რომ ეს რისკიანი გადაწყვეტილებაა, მაგრამ პოლიტიკა რისკის გარეშე არ არსებობს.
_ რატომ ვერ გამართლდა ცნობილი სლოგანი «ექიმი, მეწარმე, ლიდერი»… რატომ ვერ იქცა «ახალი მემარჯვენეების» ლიდერი დავით გამყრელიძე ოპოზიციის ლიდერად?
_ ერთიანი ოპოზიციის ლიდერობა ჰქონდა მიზნად დასახული დავით გამყრელიძეს-თქო, რომ გითხრათ, ტყუილი იქნება. «ახალ მემარჯვენეებს» სურდათ სერიოზული გავლენის მოპოვება, რათა ეს გამარჯვება საკუთარი ხედვის განსახორციელებლად გამოეყენებინათ.
_ თქვენ უარი უთხარით რადიკალიზმს, მაგრამ თუნდაც საარჩევნო გარემოს გაუმჯობესებას მოლაპარაკებების გზით როგორ შეძლებთ, ხელისუფლებამ ხომ ბევრჯერ მოგატყუათ; რატომ ფიქრობთ, რომ შედეგს ამჯერად აუცილებლად მიაღწევთ?
_ კი, იყო შემთხვევები, როდესაც ხელისუფლებამ მოგვატყუა, თუმცა იყო შემთხვევებიც, როდესაც თავი მოვიტყუეთ ან შეგვეშალა, მაგრამ, მოლაპარაკების გარდა, სხვა ალტერნატივა, უბრალოდ, არ გვაქვს.
რადიკალიზმი, აგრესიულობა, პრინციპი _ ან ყველაფერი ან არაფერი, ხისტნარევი პოლიტიკა აზიანებს როგორც პარტიას, ისე პოლიტიკურ პროცესებსაც. საზოგადოებაში არ არის მოთხოვნა რადიკალიზმზე და საერთაშორისო საზოგადოების დამოკიდებულებაც უკომპრომისო პოლიტიკის მიმართ ერთმნიშვნელოვნად უარყოფითია.
_ უარის თქმა რადიკალიზმზე ხომ არ ნიშნავს, რომ ამიერიდან არც ერთ დაგეგმილ საპროტესტო აქციაში არ მიიღებთ მონაწილეობას?
_ «ახალმა მემაჯვენეებმა» კიდევ ერთი გამოცდილება შევიძინეთ _ უკვე დაგეგმილი და დაანონსებული ღონისძიებების მექანიკური შემადგენელი ნაწილი აღარ უნდა გავხდეთ. სხავადახვა სახის მოქმედება, ბუნებრივია, ჩვენთვის მისაღები იქნება, მაგრამ ამ გადაწყვეტილებებს მხოლოდ ჩვენ მივიღებთ.
_ ხომ არ გამომდინარეობს დამოუკიდებლად მოქმედების სურვილი და სხვის დაგეგმილ აქციებში მონაწილეობაზე უარის თქმა «ახალი მემარჯვენეების» ლიდერობის ამბიციიდან?
_ შეიძლება ამბიციურობა დავარქვათ, შეიძლება _ პირიქით, სწორი, გამოცდილებით ნაკარნახევ გადაწყვეტილებად შევაფასოთ. ეს ამომრჩევლის შესაფასებელია.
12 ოქტომბერს გაიმართება ჩვენი პროგრამის _ «ახალი მემარჯვენეები» მცირე ბიზნესისთვის» _ პრეზენტაცია. ეს საკითხი, მოგეხსენებათ, ჩვენთვის უცხო არ არის და თავიდანვე ბიზნესმენების პარტიას გვეძახდნენ. დღეს ბიზნესში ბევრი პრობლემაა _ კონკურენციის, საკუთრების დაცვის, მონოპოლიების. აუცილებელია საგადასახადო კოდექსის ლიბერალზიაცია და ბიზნესის დეკრიმინალიზაცია. საჭიროა, მცირე მეწარმეებს მივაქციოთ ყურადღება.
_ გგონიათ, რომ მიაღწევთ შედეგს?
_ ოპოზიციაში მყოფი პარტიისთვის ამ ყველაფრის განხორციელება, რა თქმა უნდა, იოლი არ იქნება, მაგრამ მთავარია, ჩვენმა ამომრჩეველმა დაგვიჯეროს.
_ თქვენი საუბრიდან მრჩება შთაბეჭდილება, თითქოს ნანობთ ოპოზიციასთან ერთად მიღებულ რადიკალურ გადაწყვეტილებებს?
_ როდესაც შენი ქმედებით კონკრეტულ შედეგს ვერ აღწევ, როგორც მინიმუმ, უნდა ინანო მაინც და შენს შეცდომას მიხვდე, თუმცა ჩვენ უარს არ ვამბობთ ჩვენს წილ პასუხისმგებლობაზე.
_ ბევრი შეცდომა ხომ არ დაგიგროვდათ ქართველ პოლიტიკოსებს?
_ თუ მიხვდები და აღიარებ შეცდომებს, ნაკლებია ალბათობა, კვლავ იგივე გაიმეორო. ჩვენ შეცდომებზე ვისაუბრეთ, მაგრამ წარმატებული ნაბიჯები რომ ჩამოვთვალოთ, ეგეც არ იქნება ცოტა. ის, რომ მონსტრი «მოქალაქეთა კავშირი» დაიშალა, ჩვენი დამსახურებაა და ეს მაშინ, როცა დღევანდელი ხელისუფლება ჯერ კიდევ გამყარებული იყო შევარდნაძის ნანრევების ნარჩენებში.
2003 წელს, როცა ქვეყანაში რევოლუციური აღტყინება სუფევდა, ჩვენ გამოვედით და ვთქვით, რომ ნეობოლშევიზმი მოდიოდა. როდესაც ალიანსი დაიშალა და თითქოს უიმედობამ დაისადგურა, ჩვენ დავიწყეთ ახალი პროცესი, რასაც საარჩევნო გარემოს გაუმჯობესება ჰქვია.
_ თუმცა არასამთავრობო ორგანიზაციებმა «საარჩევნო კოდექსის» პროექტი გააკრიტიკეს და განაცხადეს, რომ ის საარჩევნო გარემოს ვერ გააუმჯობესებს, რადგან არ შეიცავს არსებით ცვლილებებს საარჩევნო გარემოს გაუმჯობესების თვალსაზრისით და პირიქით, ზოგიერთ შემთხვევაში, კოდექსის მუხლები კიდევ უფრო აუარესებს და ბუნდოვანს ხდის ვითარებას.
_ არასამთავრობო ორგანიზაციების ვალია, ნაწილობრივ შედეგს არ დათანხმდნენ და, პარტიების ქების მაგივრად, მაინც ახალ შედეგზე იფიქრონ. ეს არის მათი დანიშნულება. შეიძლება ეს შეთანხმება არ არის იდეალური, მაგრამ დღეს არსებულ საარჩევნო კოდექსთან შედარებით უცილობლად პროგრესულია.
_ საარჩევნო კოდექსში შესატანი ცვლილებების პროექტმა, რომელიც ვენეციის კომისიაში გაიგზავნა, ოპოზიციური პარტიების უკმაყოფილება გამოიწვია, ვინაიდან აღმოჩნდა პუნქტები, რომლებიც ოპოზიციასთან შეთანხმებული არ ყოფილა. გამოდის, რომ ხელისუფლება ამჯერადაც ეცადა თქვენს მოტყუებას?
_ ხელისუფლებამ ჩვენი 12-პუნქტიანი შეთანხმება ასახა პროექტში, მაგრამ ამას დაამატა სამჯერ თორმეტი პუნქტი, რომლებიც ჩვენთან არ შეუთანხმებია და სურდა, ეს ერთიანი ცვლილებები გაესაღებინა როგორც შეთანხმების შემადგენელი ნაწილი, რაზეც ჩვენ უარი განვაცხადეთ.
როცა დასრულდება ეს პროცესი, ეს პუნქტები აისახება კანონმდებლობაში, მერე ვისაუბროთ შედეგებზე; ჯერ, ვფიქრობ, შეფასება ნაადრევია. მაგრამ, როდესაც ზოგიერთები გამოდიან და ლანძღავენ 12-პუნქტიან შეთანხმებას, რომლის ათი პუნქტიც იმ დოკუმენტის შემადგენელი ნაწილი იყო, რომელიც ცოტა ხნის წინათ «რვიანმა» წარადგინა, ჩვენი ძველი პარტნიორების კრიტიკა გაუგებარია. ხოლო, მხოლოდ იმიტომ, რომ გაააკრიტიკო შეთანხმება, რომ შენს ყოფილ პოლიტიკურ პარტნიორს დადებით ქმედებაში არ ჩაეთვალოს, ეს უფრო პოლიტიკურ პოზას ჰგავს.
_ ბატონო მამუკა, თქვენი ნაბიჯის შემდეგ ლამის მთელმა პოლიტიკურმა სპექტრმა, მათ შორის ყოფილმა პარტნიორებმა, მოღალატეებად შეგრაცხეს.
_ ესეც გაუგებარია ჩვენთვის. «რვიანს» სურდა, პარტიას, რომელიც საარჩევნო ბარიერს გადალახავდა, 2 მილიონი დოლარი მიეღო, მაგრამ ხელისუფლება არ დათანხმდა ამ შეთავაზებას. ყველამ უნდა გაიგოს, რომ 1 მილიონით დაფინანსება არ არის ოპოზიციისთვის ჯილდო.
აქ ორი მომენტია. «რვიანი» შეიქმნა მხოლოდ საარჩევნო გარემოს გასაუმჯობესებლად, სხვა ტიპის გაერთიანებაზე საუბარი არ ყოფილა, მაგრამ აღმოჩნდა, რომ ზოგიერთ პარტიას უფრო შორსმიმავალი გეგმები ჰქონდა და პოლიტიკური ბლოკის შექმნაც კი სურდათ.
_ რამდენიმე დღის წინ «ექვსიანიც» დაიშალა, რაც «ეროვნულ ფორუმს» და «თავისუფალ დემოკრატებს» ბრალდებათ. თქვენ რას ფიქრობთ?
_ ამაზე კომენტარს არ ვაკეთებთ. ყველა პოლიტიკურ პარტიას თავისი არჩევანი აქვს და ჩვენი მხრიდან შეფასების საჭიროებას ვერ ვხედავთ. თუ ისინი მეტის გაკეთებას შეძლებენ, თუნდაც საარჩევნო გარემოს გაუმჯობესების კუთხით, ჩვენ მხოლოდ მივესალმებით.
ხელისუფლება არჩევნების გზით უნდა შეიცვალოს, სხვა ალტერნატივა არ არსებობს. სხვა გზა, უბრალოდ, დამღუპველი იქნება სახელმწიფოსთვის. ყველა ხელისუფლება, რომელიც ძალადობრივი გზით მოდის, შემდგომშიც ასე აგრძელებს. ხელისუფლების ძალადობრივი გზით შეცვლის შანსი ხვალვე რომ მოგვეცეს, ჩვენ, «ახალი მემარჯვენეები», ყველაფერს გავაკეთებთ, რომ ამ პროცესს წინ აღვუდგეთ. ჯერ კიდევ 2003 წელს, პარლამენტში მისვლით, ჩვენ ამ პროცესს წინ აღვუდექით.
_ მაგრამ ამის გამო კრიტიკაც დაიმსახურეთ.
_ მაშინ კი დავიმსახურეთ, მაგრამ «ვარდების რევოლუციიდან» რამდენიმე თვის მერე უკვე ბევრმა ინანა რევოლუციაში მონაწილეობა და ჩვენ მართლები აღმოვჩნდით. თან ნატოსა და ევროკავშირში შესვლა გინდოდეს და თან ძალადობრივი გზით ხელისუფლება ცვალო, არ გამოდის.
_ გავრცელდა ინფორმაცია ბიძინა ივანიშვილის პოლიტიკაში მოსვლის თაობაზე, როგორია თქვენი დამოკიდებულება: თუ აპირებთ მასთან თანამშრომლობას მომავალში?
_ საქართველოს კონსტიტუციით, ნებისმიერ ადამიანს აქვს უფლება, შექმნას პარტია. ერთი კი უნდა ითქვას, წარმატებული ბიზნესმენი არ ნიშნავს წარმატებულ პოლიტიკოსს და პირიქით. ფულის ფაქტორი გასაგებია, მაგრამ პიროვნების გაფეტიშება ფულის გამო, ვფიქრობ, გადაჭარბებულია. ამას გარდა, მნიშვნელოვანია, რა იქნება პარტიის წევრებისა თუ ლიდერის ფასეულობები, საგარეო ორიენტირები, რადგან ეს კითხვა საზოგადოებაში ამ დღეებში აბსოლუტურად ლოგიკურად გაჩნდა. ერთს ვიმედოვნებ, რომ ბატონი ბიძინას გადაწყვეტილება მისი დამოუკიდებელი გადაწყვეტილებაა და არ უკავშირდება იმ სახელმწიფოს პოლიტიკური ელიტის დაკვეთას, სადაც ის საქმიანობს.
_ საფრანგეთის პრეზიდენტის ვიზიტს როგორ შეაფასებთ? ხელისუფლება ნიკოლა სარკოზის საკმაოდ პომპეზურად დახვდა, მეტიც, 7 ოქტომბერი დასვენების დღედ გამოაცხადა.
_ რა თქმა უნდა, საფრანგეთის პრეზიდენტის საქართველოში ჩამოსვლა ძალიან მნიშვნელოვანია, მით უფრო 2008 წლის ომის მერე, მაგრამ, რომ გითხრათ, დიდ ცვლილებებს უნდა ველოდოთ და ხვალ ახალ საქართველოში გავიღვიძებთ-თქო, ტყუილი იქნება. რამდენი ქვეყნის ლიდერი ჩამოვა, ყველაფერი უნდა გაჩერდეს და კოლექტიურ ყურძნის წურვაზე გადავიდეთ? ვფიქრობ, ყველაფერთან ერთად, ეს ხელისუფლების პროვინციული პოლიტიკის გამოხატულებაცაა, მაგრამ, სანამ სააკაშვილი ხელისუფლებაში იქნება, მოსახლეობა უნდა შეეგუოს, რომ ტაშ-ფანდური, ჭრელა-ჭრულა ინსცენირებები ჩვენი მუდმივი თანამგზავრი იქნება.
ესაუბრა
შორენა ცივქარაშვილი
