საქართველოს ჯანდაცვის სამინისტრომ C ჰეპატიტის ელიმინაციის ეროვნული პროგრამის მეორე ეტაპი დაიწყო, რომლის მიზანიც დაახლოებით 80 000-მდე ინფიცირებულის გამოვლენა და მკურნალობაა. პროგრამის დაწყებიდან მკურნალობა 50 000-მდე პაციენტმა უკვე დაასრულა და მათი განკურნების მაჩვენებელი 98 %-ს შეადგენს.
ჯანდაცვის კომიტეტის თავმჯდომარე აკაკი ზოიძის ინფორმაციით, 2020 წლის შემდეგ საქართველოში C ჰეპატიტის მკურნალობა ფასიანი გახდება. ამიტომ მოქალაქეებს მოუწოდებს, დროულად მიმართონ C ჰეპატიტის ელიმინაციის უფასო პროგრამას.
„C ჰეპატიტით ავადობა. ეს არის 90-იანი წლების პირდაპირი შედეგი არამხოლოდ ნარკოდამოკიდებულების მხრივ, არამედ იმის მხრივ, თუ როგორ იცავდნენ იმ პერიოდში ჰიგიენას საავადმყოფოებში. საოცრებაა, რომ 65 000 ადამიანიდან, რომელმაც გამოიკვლია და იმკურნალა, 98%-მდე განიკურნა. 25 000 ადამიანმა კი იცის, რომ აქვს ცე-ჰეპატიტი და არ მკურნალობს. მობრძანდით, იმკურნალეთ, ეს არის უნიკალური შესაძლებლობა 2020 წლამდე. 2020 წლის შემდეგ ცე ჰეპატიტის მკურნალობა საქართველოში ფასიანი ხდება“- აღნიშნა აკაკი ზოიძემ.