გაზეთმა New York Post–მა მწვავედ უპასუხა აშშ–ის პრეზიდენტ დონალდ ტრამპის მიერ სოციალურ ქსელში გამოქვეყნებულ ჟურნალისტების შეურაცხმყოფელ განცხადებას.
“შეჩერდი, უბრალოდ, შეჩერდი!” _ წერია 30 ივნისის გაზეთში გამოქვეყნებულ რეპლიკაში სათაურით “ტრამპის ტვიტების შესახებ”.
გაზეთ New York Post -ის რედაქტორმა მეგი კუგლანმა სოციალურ ქსელ “ტვიტერში” გამოაქვეყნა გამოცემაში დაბეჭდილი მასალის ფოტო. ასეთი რეაქცია ჰქონდა New York Post -ს ტრამპის განცხადებაზე, რომლითაც მან შეურაცხყო ტელეარხ MSNBC-ის გადაცემა Morning joe-ს წამყვანები მიკა ბჟეზინსკი და ჯო სკარბორო.
ეს მოხდა მას შემდეგ, როცა ჟურნალისტებმა აშშ-ის პრეზიდენტი გააკრიტიკეს. ტრამპმა მიკა ბჟეზინსკის “დაბალი IQ-ს მქონე გიჟი” უწოდა, მის კოლეგას კი _ “ფსიქოპათი”.
ტრამპი პრეზიდენტად არჩევამდეც ხშირად აკრიტიკებდა აშშ-ის წამყვან მედიასაშუალებებს და მათ “ყალბსა” და “ჩაფლავებულებს” უწოდებდა, ამ მედიასაშუალებებში მომუშავე ჟურნალისტებს კი _ “ყველაზე უსინდისო ადამიანებს”.
