საქართველოს მთავრობის განკარგულებით, 97,52 ჰექტარი არასასოფლო–სამეურნეო დანიშნულების მიწის ნაკვეთები ერთ ამერიკულ დოლარად სს “ნენსკრა ჰიდროს” გადაეცა. მთავრობამ შესაბამისი განკარგულება 2017 წლის 14 მარტს გამოსცა.
ამ განკარგულებით, უძრავი ქონების საპრივატიზაციო პირობებია:
ხელშეკრულების გაფორმებიდან ერთი თვის ვადაში საპრივატიზაციო თანხის გადახდა;
ნენსკრაჰესის აშენება და ექსპლუატაციაში მიღება.
280 მეგავატის სიმძლავრის ჰესის მშენებლობის დაწყების შესახებ ხელშეკრულებას ხელი 2015 წლის აგვისტოში მოაწერეს. მშენებლობას კორეული კომპანია K waters ახორციელებს. ოფიციალური ინფორმაციით, ჰესი ელექტროენერგიის გამომუშავებას 2019 წლიდან დაიწყებს, ხოლო პროექტი 2021 წელს დასრულდება.
ჰესის ღირებულება 1 მილიარდი აშშ დოლარია. ჰესის მშენებლობის საბანკო სესხის ნაწილში “ევროპის რეკონსტრუქციისა და განვითარების ბანკი”, “აზიის განვითარების ბანკი” და კორეის “ექსიმ ბანკი” მონაწილეობენ. ჰესმა წელიწადში 1.2 მილიარდი კვტ/სთ უნდა გამოიმუშავოს.
ჰესის მშენებლობას აპროტესტებს ადგილობრივი მოსახლეობა.
მესტიის მუნიციპალიტეტის სოფელ ჭუბერში დიდი ჰესების მშენებლობის წინააღმდეგ აქცია 2016 წლის ივლისშიც გაიმართა. აქციის მონაწილეებმა ხელისუფლებისადმი 4-პუნქტიან მოთხოვნათა წერილი შეიმუშავეს. ისინი განსაკუთრებით ნენსკრაჰესის მშენებლობას აპროტესტებენ. მათ სურთ, რომ შეწყდეს პროექტის დაფინანსების განხილვა, სანამ:
*არ შეიქმნება ალტერნატიული პროექტი, რომელიც არ გულისხმობს ხეობის დატბორვას;
*არ იქნება წარმოდგენილი ინფორმაცია, რა სარგებელს მოუტანს პროექტი თემს და საპირწონეა თუ არა ეს სარგებელი იმ ზიანის, რომელიც მიადგება ქვეყანას;
*არ მოხდება გეოლოგიური საფრთხეების შესწავლა და თემისათვის წარდგენა;
*არ მოხდება პროექტის საჯარო განხილვა, რომელშიც ჩართულნი იქნებიან, როგორც საერთაშორისო ექსპერტები, ასევე, სამთავრობო და არასამთავრობო ორგანიზაციები.
ლუკა მაისურაძე
ჰესები უნდა აშენდეს! და მერე უნდა მოვახდინოთ მათი ნაციონალიზაცია .- აი სადაა შველა !!!