კანონი ხმაურის შესახებ პარლამენტმა 28 ივნისს დაამტკიცა, რომელიც ძალაში 15 აგვისტოს შევა. 1 აგვისტომდე მთავრობას დაგეგმილი აქვს ტექნიკური რეგლამენტის მომზადება, რომელიც დეციბელების დასაშვებ ზღვარს დაადგენს. ხმაურის დასაშვები ნორმების გადამეტებისას პირველ შემთხვევაზე პირი გაფრთხილდება, მეორე შემთხვევაზე კი დაჯარიმდება.
ანალიზისა და კონსულტაციის ჯგუფი ეი-სი-თი დაინტერესდა, რა ტიპის ხმაური არის ყველაზე შემაწუხებელი თბილისის მოსახლეობისთვის და ემხრობიან თუ არა ხმაურის გამომწვევი ობიექტების (სუბიექტების) სანქცირებას. კვლევის შედეგად აღმოჩნდა, რომ თბილისის მოსახლეობის ნახევარს (48%) აწუხებს რაიმე ტიპის ხმაური, მათ შორის, 22%-ს _ ხშირად. თბილისელებისთვის ყველაზე შემაწუხებელია მანქანების მოძრაობის (27%) და მეზობლებისგან გამოსული ხმაური (15%).
ხმაური, რომელიც მშენებლობის წარმოებასთან ან გასართობ დაწესებულებებთან არის დაკავშირებული, თბილისელების 7-8%-ს აწუხებს.
თბილისელები ხმაურით, ძირითადად, ღამის 12 საათიდან დილის 3 საათამდე პერიოდში წუხდებიან (30%). თბილისის მოსახლეობის უმრავლესობა (67%) ეთანხმება იმ ობიექტების (სუბიექტების) დაჯარიმებას, რომლებიც იწვევს ხმაურს ღამის 12 საათის შემდეგ.
გამოკითხვა ჩატარდა შემთხვევითი შერჩევის გზით 400 ზრდასრულ თბილისელს შორის, 2017 წლის 16-დან 19 ივნისამდე პერიოდში. მონაცემთა სტატისტიკური ცდომილება არ აღემატება 4,9%-ს.
