მამა ბასილ მკალავიშვილის მიმართვა

საქართველოს პრეზიდენტს, ბატონ გიორგი მარგველაშვილს,

საქართველოს პრემიერმინისტრს, ბატონ გიორგი კვირიკაშვილს,

საქართველოს პარლამენტის თავმჯდომარეს, ბატონ ირაკლი კობახიძეს,

რუსეთის პრეზიდენტს, ბატონ ვლადიმერ პუტინს!

ჩვენი ერი _ მრავალტანჯული, მრავალ ჭირ–ვარამგამოვლილი, მოყოლებული ქრისტედან, ჯვარცმის, გოლგოთის გზას მიუყვება. მიუხედავად უთვალავი შემოტევისა, აოხრებისა, ხოცვა–ჟლეტისა, ტრადიციების, ზნეობის, ოჯახური სიწმინდეების დამცველ და, რაც მთავარია, სარწმუნოებისთვის თავდადებულ, უძველესი კულტურის მქონე ქართველ ერს თავი დაბლა არ დაუხრია და დღესაც მყარად დგას წინაპართა სისხლით გაპოხიერებულ მიწაზე.

ყოველი ეპოქა გამორჩეული იყო ღვთის ერთგულთა სიმრავლით, რომლებიც, ქრისტეს ჯვრის ფრთებქვეშ შეყუჟულნი, უკომპრომისოდ იცავდნენ ერის მეობას. დღეს კი რა ხდება? _ კაცობრიობა ავისმომასწავებელ დენთის კასრზე ზის. უკიდეგანო ბურუსში ვართ გახვეულნი. წარსულით ვამაყობთ. აწმყოს კბილებით, დიდი ძალისხმევით ვინარჩუნებთ, ღვთის შემწეობით. რაც შეეხება მომავალს, ესეც ჩვენს ქმედებაზეა დამოკიდებული.

ამ მიმართვას უფლის შთაგონებით ვწერ მართლმადიდებელი მღვდელი, აღშფოთებული ბოლო ჟამის შემაძრწუნებელი მოვლენებით, რომლებიც მართულია მსოფლიოს ანტიქრისტიანული ბნელი ძალების მიერ, ქართველთა დაუძინებელი მტრების _ არასამთავრობო ორგანიზაციების წარმომადგენელთა, თანამონაწილეობით, რათა ამოძირკვონ ყოველგვარი სარწმუნოებრივი, ტრადიციული.

მსოფლიოს მასონიზმის მიზანია, დაშალოს, დაანაწევროს, ერთმანეთს განაშოროს მართლმადიდებელნი და მერე იბატონოს. ეს პროცესი ეხება რუსეთ-საქართველოს ურთიერთობას. რუსეთი უძლიერესი, ერთმორწმუნე, მართლმადიდებელი ქვეყანაა და სწორედ ჩვენი დაპირისპირება აძლევს ხელს ანტიქრისტეს მოციქულებს.

მოგმართავთ უფლის სახელით: გამოიჩინეთ თავმდაბლობა, რადგან უფალი მაღალს დაამდაბლებს, ხოლო მდაბალს აღამაღლებს. სასწრაფოდ დასხედით; მშვიდად, გონივრულად გადაწყვიტეთ ქვეყნებს შორის ურთიერთობის ურთულესი პრობლემა.

მივმართავ რუსეთის პრეზიდენტს, ბატონ ვლადიმერ პუტინს: მართალია, გაღიზიანებული ბრძანდებით (საფუძვლიანადაც) ჯალათი ყოფილი პრეზიდენტის უხამსი ქმედებით, რომელიც ისე გაკადნიერდა, რომ პიროვნულად შეურაცხგყოფდათ, მაგრამ ამის გამო თქვენ შეტევა განახორციელეთ არა სააკაშვილზე, არამედ ქართველ ხალხზე. ქართველი ხალხი კი, სამწუხაროდ, მძიმედ დაზარალდა.

სავალალოა, რომ ფაქტობრივმა ხელისუფლებამ ვერ გამოიჩინა გონიერება, არ მიმართა ურთიერთობის მშვიდობიან ფორმას _ დიალოგს, პირიქით _ ზნედაცემული სააკაშვილის მიერ აღებული კურსი განაგრძო და აირჩია დასავლეთის, ოკეანისგაღმელთა გზა, საიდანაც ნიაღვარივით მოედინება ყოველგვარი სიბილწე _ მამათმავლობა, ლესბოსელობა და სხვა უმსგავსობა. მათი მიზანია, პატიოსნება, წესიერება დასაცინი გახდეს. ნერგავენ ხალხში ლოთობას, ნარკომანიას, ღალატს, ურთიერთშუღლს; ცდილობენ, ამოძირკვონ სულიერების ფესვები. მთავარი მიზანი კი ახალგაზრდების გარყვნა, ადამიანთა ზნეობის დაცემაა.

საქართველოს პარლამენტის თავმჯდომარე ამბობს, კომუნიზმი დამთავრდა საქართველოში და ჩვენ ილიას გზით მივდივართო. შევახსენებ მას: იქნებ წაგეკითხათ ილია, აკაკი და, საერთოდ, საქართველოს ისტორია. დიდი ილიას, აკაკისა და სხვა მამულიშვილთა გზა არ არის ის, რომელიც თქვენ აირჩიეთ. მათი გზა რუსეთთან მეგობრული ურთიერთობა იყო.

დიდმა ილიამ 1899 წელს სტატიაში “ასი წლის წინათ”, რომელიც საქართველოში რუსის ჯარის შემოსვლის 100 წლისთავს მიუძღვნა, რუსეთთან საქართველოს შეერთების ისტორიული მნიშვნელობა ასე გადმოსცა: “ამ ღირსსახსოვარ დღიდან საქართველომ მშვიდობა მოიპოვა… დამშვიდდა… დაღალული ქუეყანა დაწყნარდა აკლებისა და აოხრებისაგან, დადუმდა ჟღერა ხმლისა”.

ერის სულიერი მამა საქართველოს ხსნის გზას ეძებდა და არა იმას, რაც თქვენმა ხელისუფლებამ გააკეთა: მიიღო საბედისწერო ანტიდისკრიმინაციული კანონი, რომელიც წინაპირობაა ერთნაირსქესიანთა შორის სამოქალაქო პარტნიორობის დაკანონებისა. ეს არის ჩვენი ერის გასანადგურებლად ჩადებული ნაღმი, საზღვარგარეთიდან შემოსული ბინძური გრანტების საფასურად.

დღეს საქართველოსა და რუსეთის ურთიერთობაზე ბევრი რამ არის დამოკიდებული. ღმრთის ნებით, უნდა აღდგეს ჩვენს ქვეყნებს შორის მეგობრული ურთიერთობა, წინააღმდეგ შემთხვევაში, საქართველოსა და რუსეთს ღვთის საშინელი რისხვა დაატყდება თავს.

კიდევ ერთხელ მოვუწოდებ ხელისუფლებას: გვერდზე გადადეთ პირადი ინტერესები (უკვე ყველაფერი აწყობილი გაქვთ), თავი დაანებეთ ერთმანეთის შეურაცხყოფას, პარლამენტის დარბაზის მუშტი-კრივის ველად გადაქცევას. თქვენ ხართ ერის სარკე და რა უნდა ვისწავლოთ ასეთი ადამიანებისგან? თქვენი გულგრილობით ქვეყანა უფსკრულის პირას დგას. გაითვიცნობიერეთ ყოველივე, თვალი გაუსწორეთ რეალობას და მიიღეთ გონივრული გადაწყვეტილება. საქართველო მხოლოდ თქვენ არ ხართ, ქვეყნის ბედს ხალხი წყვეტს. ნუ შეჰყურებთ სააკაშვილსა და მის ბანდას, რომელმაც მუხანათურად გამოუთხარა ერს ძირი და საქართველოს მიწა-წყლის 20% რუსეთს ჩააბარა. მან ორი მართლმორწმუნე ერი ერთმანეთს გადაჰკიდა. 2008 წლის აგვისტოს ომში ქართული გენი, ახალგაზრდა მეომრები, ბომბების წვიმაში მიატოვა, თვითონ კი ლაჩრულად დაიმალა. სწორედ სააკაშვილისა და მისი გარემოცვიდან იღებს სათავეს სოდომ-გომორის ცოდვა, რომლის მორევშიც თანდათან ვეფლობით. ნაცვლად იმისა, რომ ხალხისთვის დაპირებები შეგესრულებინათ _ შეგექმნათ საწარმოები, დაგესაქმებინათ შეჭირვებული ადამიანები _ გახსენით ბორდელები, თბილისის ცენტრალური ადგილები გადამთიელთა მიერ მოწყობილი ღამის კლუბებით გაივსო. ამის გამო მკაცრად მოგეკითხებათ ხელისუფლების წარმომადგენლებს.

მიუჯექით მოლაპარაკების მაგიდას, რათა თავიდან ავიცილოთ ღვთის სასჯელი, გადავარჩინოთ ჩვენი ქვეყნები, რომლებსაც ქრისტე აერთიანებს. სანამ გვიან არ არის, გამოასწორეთ საბედისწერო შეცდომა, რადგან ქვეყანა თავზე გვენგრევა, ერი გადაგვარების გზას ადგას. ამას ღმერთი არ გაპატიებთ! აღადგინეთ რუსეთთან ჩვენი წინაპრებისდროინდელი ურთიერთობა.

შევთხოვ უფალს, შეგეწიოთ ერის საკეთილდღეო გადაწყვეტილების მიღებაში!

სახელითა მამისათა და ძისათა და სულის წმიდისათა, ამინ!

ჩვენთან არს ღმერთი!