77 წლის წინათ, 1943 წლის 18 იანვარს, ოპერაცია “ისკრის” მიმდინარეობისას საბჭოთა მეომრებმა ლენინგრადის ბლოკადა გაარღვიეს.
ლენინგრადისა და ვოლხოვის ფრონტის ქვედანაყოფები ლადოგის ტბის სამხრეთ ნაპირზე შეერთდნენ, მაგრამ ბლოკადის სრულად მოხსნას ლენინგრადელები კიდევ 1 წელიწადს ელოდნენ.
ლენინგრადის ბლოკადა ერთ-ერთი ტრაგიკული ფურცელია საბჭოთა და, საერთოდ, მსოფლიოს ისტორიაში. გერმანელებმა ქალაქ ლენინგრადს ალყა შემოარტყეს 1941 წლის 7 სექტემბერს და ეს საშინელება თითქმის 900 დღეს გაგრძელდა. გაყინულმა ლადოგის ტბამ გასწია გზის მაგივრობა, რომლითაც ლენინგრადელებისთვის სურსათ-სანოვაგე გადაჰქონდათ. ამ გზას “სიცოცხლის გზა” უწოდეს. ბლოკადის პერიოდში, სხვადასხვა მონაცემით, დაიღუპა 400 ათასიდან 500 ათასამდე ადამიანი, მათი უმრავლესობა შიმშილმა შეიწირა.