ულტრამემარჯვენე პარტიამ “ალტერნატივა გერმანიისთვის” გერმანიის აღმოსავლეთის ორ მხარეში _ ბრანდენბურგსა და საქსონიაში ადგილობრივ არჩევნებზე პოზიციები გაიუმჯობესა და მეორე ადგილზე გავიდა.
საქსონიაში პირველ ადგილზეა მმართველი “ქრისტიანულ-დემოკრატიული კავშირი” 32,1%-ით, რომლის პოზიციებიც წინა არჩევნებთან შედარებით 7,3%-ით გაუარესდა. “ალტერნატივამ გერმანიისთვის” ხმების 27,5% მიიღო. მესამე ადგილზეა პარტია “მემარცხენეები” (გერმანიის დემოკრატიული რესპუბლიკის ყოფილი კომუნისტური პარტია) _ 10,4. ბრანდენბურგის მხარეში პირველ ადგილზე სოციალურ-დემოკრატიული პარტია 26,2%(-5,7%) გავიდა. ეს პარტია ამ მხარეს უწყვეტად მართავს გერმანიის გაერთიანების შემდეგ. მეორე ადგილზეა “ალტერნატივა გერმანიისთვის” 23,5%-ით, მესამეზე _ “ქრისტიანულ-დემოკრატიული კავშირი” 15,6%-ით.
კოალიციების შექმნა ორივეგან რთული იქნება, რადგან წამყვანი პარტიები _ “ქრისტიანულ-დემოკრატიული კავშირი” და “სოციალ-დემოკრატიული პარტია” (რომლებიც ფედერალურ დონეზე კოალიციაში არიან) ულტრამემარჯვენეებთან გაერთიანებას გამორიცხავენ. ამ ორ პარტიას კი კოალიციისთვის ხმები არ ჰყოფნის და წვრილ პარტიებთან მოლაპარაკებები დასჭირდება.
